بەداخەوە لەکاتێکدا پارێزگا سوننە نشینەکانی وەک سەڵاحەدینو نەینەواو قەزای حەویجەو دەوروبەریان و چەند شارۆچکەیەکی تری سوننەنشینی عیراق، دووچاری شەرێکی نەخوازراو بوونەتەوە کە هەڕەشە لەژیانی خەڵکی ئەو ناوچانە دەکات، سوپای عیراقیش لەڕووبەڕووبوونەوەیاندا دووچاری دۆخێکی نەخوازراو بووەوە، لەکاتێکدا ئێمە وەکو لایەنی کوردستانی هەمیشە پابەندی عیراقێکی دیموکراتو فیدراڵ بووین، پابەندی ئەوەبووین کە کێشەکانی نێوان بەغداو هەرێمی کوردستان، نێوان پێکهاتە جیاوازەکانی عیراق لەشیعەو سوننەو لەکورد بەشێوەی گفتوگۆو دەستوری چارەسەر بکرێن، ئێستاش ئەم دۆخە هاتۆتە پێشەوە، ئێمە سەرەڕای ئەوەی ئەم کێشانە بەکێشەی خۆمان دەزانین و چیمان پێبکرێت درێغی ناکەین.
لەکاتێکدا کە هەڵوێستی هێزی پێشمەرگەی کوردستانو هەڵوێستی سیاسیی یەکێتیی نیشتمانیی کوردستان لەبەرەنگاربوونەوەی ئەم دۆخە نەخوازراوەدا ڕوونو ئاشکرایە کە پاراستنی گیانو ژیانی هاووڵاتیانی نەتەوەو مەزهەبە جیاجیاکانی ئەو ناوچانەیە کە کەوتوونەتە ژێر دەسەڵاتی هێزی پێشمەرگەی کوردستانەوە، بەداخەوە لەوکاتەدا هەندێک ئەندام پەرلەمانی عیراق و کەسانی تریش لەجێی ئەوەی بیرێک لەچارەسەری ئەم دۆخە بکەنەوەو پێشنیازی بنیاتنەرانە بکەن بۆ چارەسەری کێشەکان بەجۆرێک کە پەیوەندیی نێوان پێکهاتە جیاوازییەکانی عیراق ئاسایی ببێتەوە، بەجۆرێک کە ئەو درزەی بوو بەمایەی ئەم کێشانەو بەهۆی داعشو گروپە چەکدارە توندڕەوەکانەوە دروست بووە، ئەوانە لەجیاتی ئەوەی کە وانەیەک لەم بارودۆخە وەربگرن و بیر لەپێشکەشکردنی چارەسەر بۆ حکومەتی عیراقیو لایەنە ناکۆکەکانیش بکەنەوە، دەیانەوێت بەلێدوانی جیاجیاو توانجی جیاجیا بەشێکی ئەوکێشانە بخەنە ئەستۆی کورد.
لەکاتێکدا ئێمەو هەموو لایەنەکانمان پێویستمان بەکەشێکی دۆستانەی گفتوگۆیە بۆ چارەسەرکردنی کێشەکان، گەڕانەوە بۆ ئەو بنەما دەستوورییانە کە پەیوەندیی پێکهاتەکان ڕێکدەخات و کێشەکانیان چارەسەر دەکات، ئەم بەڕێزانە بەگەورەکردنی کێشەی بچوکو لابەلا دەخوازن کەشێکی نەخوازراوی سەرباری ئەم کەشە سەربازیو ئەمنییەی دروست بووە بهێننە کایەوە، ئێمە گومانمان هەیە لەدڵسۆزی ئەوانە بۆ پێکهاتەی شیعەو پەرۆشییان بۆ پەیوەندییەکی دروستی نێوان پێکهاتەکانی عیراق لەگەڵ برایانی شیعە، ئێمە سەرباری ئەوەش هەموو تواناکانی خۆمان دەخەینەگەڕ بۆ ئەوەی پێکەوە کاربکەین عیراق لەم دۆخە ڕزگاربکەینو نەهێڵین هیچ دەستێکی گوماناوی پەیوەندیی لەمێژینەی نێوانو کوردو شیعەو سوننە تێکبدەن، هەوڵدەدەین زمانی مەنتقو زمانی دیالۆگو دیموکراسی بۆ چارەسەری کێشەکان زاڵببێتو کێشەکانی عیراق بەرەو فیدراڵییەتو دیموکراسییەکی ڕاستەقینە ڕوو لەچارەسەر بکات و لەهەمووشی گرنگتر ئەوەیە کە ڕێگە نەدرێ بەشێواندنی ئەولەویاتی ئێستا لەعیراقدا، ئەویش ئەولەویەتی ڕووبەڕووبوونەوەی تیرۆریستان و ڕزگارکردنی ئەو ناوچانەی عیراقە کە لەلایەن داعش و هاوپەیمانانی داگیرکراون و هاووڵاتیانی ئەو ناوچانە، بەبێ جیاوازی ڕووبەڕووی هەڕەشەی کوشتن و سەربڕین و کەرامەت شکاندن بوونەتەوە.