ئای دی: 08BAGHDAD3776
سەرچاوە؛ باڵیۆزخانەی ئەمریکا لەبەغدا
بەروار: 1ی کانونی یەکەمی 2008
پۆلێن: زۆر تایبەت
لەمیانی سەردانێکی ڕاوێژکاری ئەمریکا بۆ هەرێمی کوردستان، بەرپرسانی حکومی و ناحکومیش باسیان لەوە کردوە کە ململانێی دەسەڵات لەنێوان دو پارتە دەسەڵاتدارەکەی هەرێمی کوردستان زۆر قوڵە، حکومەتی هەرێمیش ڕێز لەئازادی ڕۆژنامەگەریی ناگرێت و گەندەڵی ئابوری لەهەرێم پێویستی بەچاکسازیی هەیە. هەریەک لەمەسرور بارزانی، بەرپرسی پاراستنی پارتی و نەوشیروان مستەفا و کۆسرەت ڕەسوڵ لەگەڵ ڕاوێژکارەکەی ئەمریکا باسیان له و تەوەرانە کردوە.
ئازادی ڕۆژنامەوانی و کوشتنی ڕۆژنامەنوسێک لەکەرکوک
گەورە ڕاوێژکاری باڵیۆزی ئەمریکا لەبەغدا بۆ کاروباری باکوری عێراق، تۆماس کراجێسکی سەردانی چەند بەرپرسێکی حکومی و ناحکومی کرد لەهەولێر و سلێمانی لەرۆژی 25 و 26ی تشرینی دوەم. مەسرور بارزانی، سەرۆکی ئاژانسی پاراستنی پارتی دیموکراتی کوردستان پێیوابو یەکێتی نیشتمانی کوردستان پیلانی لەدژی خۆی و پارتی گێڕاوە، بەتایبەتی لەمەسەلەی تیرۆرکردنی ڕۆژنامەنوس سۆرانی مامە حەمە-دا کە ناوبراو ڕاپۆرتی لەسەر گەندەڵیەکانی حکومەتی هەرێم بڵاوکردبۆوە. بارزانی بێئاگایی خۆی دەربڕی لەدەستگیرکردنی هەرکەسێک لەسەر ئه و کەیسە، بەڵام ڕایگەیاند، کوشتنی سۆرانی مامە حەمە پلانڕێژیی بوە لەلایەن یەکێتی نیشتمانی کوردستانەوە بۆ لەکەدارکردنی ناوبانگی خۆی و پارتی دیموکراتی کوردستان.
مەسرور پشتیوانی حکومەتی هەرێمی نیشاندا بۆ لێکۆڵینەوەی ورد لەبارەی کوشتنی سۆرانی مامە حەمەوە، لەگەڵ ئەوەشدا باسی لەوە کرد کە کۆمەڵگەی نێودەوڵەتی گرنگی زۆرتر دەدات بەکوشتنی ڕۆژنامەنوسێکی سەربەخۆ وەک لەکوشتنی ڕۆژنامەنوسێکی سەر بەحکومەت. وتیشی، ئەمە دەریدەخات ژیانی ئەوانەی ڕەخنە لەحکومەت دەگرن زۆر بەبایەختر بێت لەوانەی پشتیوانی لەحکومەت دەکەن. بارزانی ئاماژەی بەوەش کرد، کە زۆرێک هەوڵدەدەن لەرێگەی میدیا و (کوژرانی سۆران)ەوە، سەرکەوتنەکانی حکومەتی هەرێم کەمبایەخ بکەن. لەلایەن خۆیەوە باڵیۆز هاوڕابو لەسەر ئەوەی پاراستنی ڕۆژنامەنوسان زۆر گرنگە، لەهەمانکاتدا فشاری خستەسەر مەسرور بارزانی تا بەردەوامبێت لەدۆزینەوەی بکوژانی سۆرانی مامە حەمە.
نەوشیروان مستەفا پارتی تۆمەتباردەکات
لەلایەن خۆیەوە، میدیاکاری دیاری کورد، نەوشیروان مستەفا بەهەمانشێوە بێئاگایی خۆی نیشاندا لەدەستگیرکردنی بکەرانی کوشتنی سۆرانی مامە حەمە، بەڵام بێ دودڵی ئۆباڵی تەواوی ئه و کردەوەیەی خستە ئەستۆی مەسرور بارزانی و پارتی. کاتێکیش تەئکیدی لێکرایەوە، مستەفا دانی بەوەدا نا کە هیچ بەڵگەیەکی نیە بۆ سەلماندنی ئه و وتەیەی. لەگەڵ ئەوەشدا، بەپێویستی نەزانی بەڵگە بهێنێتەوە و وتی، زۆرینەی سەرکردەکانی سوپای ئایرلەندا بەلای حکومەتی بەریتانیاوە ناسراوبون، بەڵام دەستگیریان نەکردن لەبەرئەوەی بەڵگەی سەلمێنەریان لەسەر نەبو.
سەبارەت بەبابەتی ئازادی ڕاگەیاندن بەگشتیی، مستەفا وتی، چەندین فشاری دیکە لەسەر ڕۆژنامەنوسان هەن، لەوانە پیادەکردنی سیاسەتی نانبڕین و دەرکردنیان هەرکاتێک پێویست بێت. وتیشی، مەحاڵە بۆ ڕۆژنامەنوسانی میدیای سەربەخۆ کێبڕکێ لەگەڵ میدیای سەر بەیەکێتی و پارتی بکەن: یەکێتی و پارتی نزیکەی 8 هەزار کەسیان هەیە. ئەمەش قورسە کێبڕکێ لەگەڵ میدیایەکی لەوشێوەیە بکەیت.
کۆسرەت ڕەسوڵ ئیدانەی دەکات
لەلایەن خۆیشیەوە کۆسرەت ڕەسوڵ عەلی، جێگری سەرۆکی هەرێم و ئەندامی مەکتەبی سیاسیی یەکێتی نیشتمانی کوردستان، بەهەمانشێوە هیچ زانیاریەکی نەبو لەسەر دەستگیرکردنی کەسانێک پەیوەست بەکوشتنی سۆرانی مامە حەمە. لەگەڵ ئەوەشدا، بەدورودرێژی باسی لەوە کرد کە چۆن کوژرانی ئه و ڕۆژنامەنوسە دژ بەئیرادەی کورد بوە. ناوبراو ئیدانەی ئه و کردەوەیەی کردو وتی، بۆ ماوەی 37 ساڵە، حزبی بەعس نکۆڵی لەئازادی ڕادەربڕینی کورد کردوە. ئێمە پێویستە نەگەڕێینەوە دواوه و هەمان شت بکەین بەرامبەر کوردانی دیکە.
گەندەڵی هەرێمی کوردستان
سەبارەت بەگەندەڵی لەهەرێمی کوردستاندا، کۆسرەت ڕەسوڵ ئاماژەی بەوە کرد کە حکومەتی هەرێم پێویستە پەلەبکات لەپیادەکردنی شەفافیەت لەبودجەدا. هەرچەندە کۆسرەت، جێگری سەرۆکی هەرێمە، بەڵام ئەویش نازانێت بەچ شێوەیەک بودجە سەرفدەکرێت. ڕەسوڵ دانی بەوەدا نا کە یەکەمین شوێن کە پێویستە لەگەندەڵی پاکبکرێتەوە، ئەنجومەنی وەزیرانە.
کۆمێنت:
ئێمە توشی سەرسوڕمان بوین لەوەی مەسرور بارزانی زانیاری نەبو لەسەر دەستگیرکردنی دو گومانلێکراو بەتۆمەتی کوشتنی سۆرانی مامە حەمە. تەنها دو هەفتە لەوەوپێش، بەرپرسێکی ناو ئۆفیسی نێچیرڤان بارزانی، سەرۆکی حکومەت کە ئامۆزاو زاوای مەسرور بارزانیە، دەستگیرکردنی ئه و دو کەسەی بۆ ئێمە تەئکیدکردەوه و دڵنیایکردینەوە کە نێچیرڤان بارزانی خۆی سەرپەرشتی لێکۆڵینەوە دەکات له و بابەتە. مەسرور بارزانی یان درۆدەکات یان لەلایەن ئۆفیسەکەی نێچیرڤان بارزانیەوە ئاگادارنەکراوەتەوە، کە ئەمەش جێگەی سەرسوڕمانە بەوپێیەی مەسرور بەرپرسی ئاسایشی پارتیە. بەبێ گوێدانە ئەوەی کە کێ چی دەزانێت لەبارەی کەیسی سۆرانی مامە حەمەوە، ئێمە بەردەوامدەبین لەداواکردنی لێکۆڵینەوەی تەواوەتی لەوبارەیەوە. وەک چۆن کراجێسکی لەدوای کۆبونەوەکە، بەشێوەیەکی نهێنی پێیڕاگەیاند: ئەم کەیسە هەروا تێناپەڕێت.