شیعر؛ دلاوەر قەرەداغی
من لە شارێکی زۆر دورم..!
کۆترەکان دێن و
دەنیشنەوە
باراناو
لە چاڵوچۆڵییەکانی دڵم دەخۆنەوە
ڕێبوارێک لەوێوە تێدەپەڕێ
بە دەم پیاسەوە خەون دەبینێ
هیتفۆنێکی لە گوێدایە
گوێ لە هەواڵەکانی سەعات شەش
ڕادەگرێ
کۆترەکان دەفڕنە سەر
قوبەیەکی شین
من... تەنیا و تەڕ
لەو تەمەدا جێ دێڵن
بانگیان دەکەمەوە
کۆترەکان نامبیستن
دەبێ من زوو زوو لە کاتژمێرەکەم بنۆڕم
سبەینێ هەمدیس
سەعات شەش
لە کاتی پەخشی هەواڵەکانی سەعات شەشدا
دەنیشنەوە
تینووێتی زۆریان بۆ دێنێ و
باراناو
لە چاڵوچۆڵییەکانی دڵم دەخۆنەوە
کاتێ دێن
کە ڕێبوارێک خەریکە بەوێدا تێدەپەڕێ
بە دەم پیاسەوە خەون دەبینێ
هیتفۆنێکی لە گوێدایە و
گوێ لە هەواڵەکانی سەعات شەش
ڕادەگرێ
کۆترەکان دەفڕنە سەر
قوبەیەکی شین
من... تەنیا و تەڕ
لەو تەمەدا جێدێڵن
من دەبێ ئاگام لە وەخت بێ
سبەینێ کۆترەکان سەعات شەش
دەنیشنەوە
کە ڕێبوارێک لەوێوە تێدەپەڕێ و
بەدەم پیاسەوە خەون دەبینێ
خودایە... من دەبێ لەم تەمەدا
هەر ئاوها تەڕ و تەنیا بم
تا سبەینێ ئێوارە
تا کاتی پەخشی هەواڵەکانی سەعات شەش
کە ڕێبوارێک لەوێوە دێ
هیتفۆنێکی لەگوێدایە
بەدەم ڕێوە خەون دەبینێ و
گوێ لە هەواڵەکانی سەعات شەش
ڕادەگرێ...
هەیوانی تەنیایی
دلاوەر قەرەداغی