#وەزارەتی ناوخۆ#ی حکومەتی هەرێم بە فەرمی نرخی تابلۆی ئۆتۆمبێلی بەناوی #هەڵەبجە#وە لە ژمارە (1) تا ژمارە 1988 دیاریکرد، بەڕێوەبەری هاتوچۆی پارێزگاکەش ئاماژە بەوەدەکات لە ئایندەیەکی نزیکدا دەست بەفرۆشتنی تابلۆکان دەکەن.
عەمید حەسەن عەبدوڵا، بەڕێوەبەری هاتووچۆی پارێزگای هەڵەبجە (ئەمڕۆ سێشەممە 25ی حوزەیرانی 2019) بە دواڕۆژی ڕاگەیاند: دواجار لەلایەن وەزارەتی ناوخۆی حکومەتی هەرێمەوە نرخی تابلۆی ئۆتۆمبێل بە ناوی پارێزگای هەڵەبجەوە دیاریکرا بەجۆرێک کە ژمارە نایابەکان نرخی دیاریکراویان بۆ دانراوە و ناتوانین له و نرخە کەمتر بیانفرۆشین کە بە زیادکردنی ئاشکرادەبێت.
وتیشی: نرخی تابلۆی ژمارە (1) بە یەک ملیار دینار و هەروەها ژمارە (2 تا ژمارە 9) بە بڕی 600 ملیۆن دینار دەفرۆشرێن، هاوکات ژمارە (10 بۆ 99) بە 300 ملیۆن دینار و لە ژمارە (100 بۆ ژمارە 999) بە بڕی 200 ملیۆن دینار دەفرۆشین.
عەمید حەسەن ڕونیشیکردەوە: ژمارە (1000) بە 180 ملیۆن دینار و هەروەها ژمارە (1988) کە هێمایە بۆ ساڵی کیمیابارانکردنی هەڵەبجە بە بڕی 600 ملیۆن دینار دەفرۆشین.
راشیگەیاند: هەر کەس ئارەزوومەندە بۆ کڕینی ئه و ژمارە نایابانە، دەتوانێت لە سبەینێوە داواکاریمان پێشکەشبکات.
بەڕێوەبەری هاتووچۆی هەڵەبجە ئەوەشی خستەڕوو: لە ئایندەیەکی نزیکدا دەستدەکەین بە دروستکردنی تابلۆکان و دواجار فرۆشتنیان، بۆیە هەر بەگوێرەی بڕیارێکی ئەنجومەنی وەزیران ئه و داهاتەی کە لەڕێگەی فرۆشتنی تابلۆکانەوە دەستمان دەکەوێت لە 80%ی بۆ پەرەپێدانی پڕۆژە خزمەتگوزارییەکان و هەروەها لە 20% داهاتەکەی بۆ پەرەپێدانی سیستەمی هاتووچۆ خەرج دەکرێت.[1]
#25-06-2019#