وەلی دېوانە
چراغم بی ڕام، چراغم بی ڕام
فەڵەک بېمەیلەن، باوانت بی ڕام
تۊ (لەیل)ی قەدیم من (قەیس)ی ئەییام
چۇن مەبۊ حاسڵ عومرم وا بە کام
ئەر وەسەر ڕازین سەر نە پاشانم
گېیان وەسەر توفەیل خاک ڕاشانم
ئەر ماڵ مەسۊزان من بېماڵەنان
مەجنۇنی موفلس خەم خەیاڵەنان
غەیر جە سەودای عەشق دین تۊ دیدەم
ڕابەر نیم وە هیچ ئەی بەرگوزیدەم
ئەر وەلای حاکم داد وېم بەرۇن
داد و بېداد جە دەست باوانت کەرۇن
تەرسۇن حەکایەت (نەوفەل) بڎۊ سەر
تۊ شاد وە باوان من هەر دەربەدەر
ئەر نا گاڕۊیێ نە کۊچی خېڵدا
وېڵ بای وە ماوای مەجنۇنی وېڵدا
هۊردارۊت بە ڕۇت بەو جامازەوە
بەو جاماز خاس پڕ جېیازەوە
مەترسۇن کە نام نیکیت نەنگ بۊ
جەو بابەت زوان بابۊت لەنگ بۊ
قەوم و قەبیلەت گشت بەدنام مەبۊ
من جەوان بەدتەر ڕیسوای عام مەبۇ
ئەر سەد بېماڵم بېپارە و بېپۇڵ
من یانەی هیچ کام نەدارۇ قبۇڵ
هەر تا زندەنان جە ڕۇی سەر بیسات
دایېم وە مەیلت مەکەرۊ قنیات
خۊفم هەن جە جەور چەرخ بېڕامی
پەیدا بۊ پەرېت ئیبن سەلامی
ئەو سا دۇبارە زامم خەتەر بۊ
ئی داخېچ وە بان داخانی تەر بۊ
[1]