#میرزای لوڕستانی#

کەردشان وە هەم ئی عەهد و پەیمان
تەمام شین وەلای ئەمیری زەمان
شا بوات پەنەش فەرزەندی ئازاد
مەبەرە غەمگین خاتر بکەر شاد
سەحەر زۇ بە ئەمر بەنای لایەنام
چەند جە سەرهەنگان عالیجا مەقام
چەنی دە هەزار سوارەی نامدار
ڕاهی بان چەنیت بشان بەو دېیار
چەند سەندۊقی پەڕ جە لەعل و مروار
چەند پارچەی عەجیب جە مەتای بوڵغار
چەند ئەسپانی خاس تازی زەڕنگار
چەندێ جە ئەجناس حەربی جەوهەردار
چەنێ چەند پېشکەش سافی دڵپەسەند
ببەر پەی ئەمیر مەردی هونەرمەند
ئەوەڵ بە مۊبەت بە مېهرەبانی
دۇەم وە لەشکەر و جەنگەرانی
بە هەر نەوع کارت مەبۊ مەیسەر
سەرئەنجامش دە زۇ بەرگەرد وە بەر
ئەمیر چۇن شنەفت جە شاﮪ ئی خەبەر
زەڕێ هۊش فام بەرئاماش وە بەر
سوپاهی حەبەش شۊر ئەنگېزنا
وە فەوقی کافۇر عەمبەر* ڕېزنا
هېندی و حەبەشی پۊشان سېیا و دېز
شکەست دان کافۇر واتن دەست مەڕېز
عەمبەر** ڕېزیان ئه و تاقان و دەر
شین وە خواب خۆش عالەم سەرانسەر
سوپای ئەبیەزی و ئەندەکی زەمان
بەرئاما وە بەر چۇن شېری ژیان
بە سەد تەمتەراق پەڕەی عەلەم شەند
قەساس دۇشین جە شای حەبەش سەند
ڕۊشنی خېزا نە ڕۇی سەر بەسات
بېدار بین جە خاو حەیات و مەمات
چاوشان جاڕدان یانە بە یانە
سواران جەم بین نە هەر تەرانە
عەلەمدار ئاما و پاش کەرد عەلەم
دە هەزار سوار داشان نە قەڵەم
دان نە کۆرس حەرب کەڕەنا ژەنیا
لەشکەر جە شەهر یەمەنشار کنیا
تەمام پېشکەشان ڕاهی بین ڕاهی
نەعرەی ئەسپان نشت نە گاوماهی
گەرد پای ستۇر پۊشا سەرزەمین
خورشید تاریک بی سەما ماتەمین
ئەو ڕۊ فەترەدان تا وەقت ئێوار
ئێوار نە جایێ گېرتشان قەرار
پاسێ جە شەو شی دە هەزار سوار
هەزیمەت کەردن بە قەتر و بە غار
نە هیچ دېیارێ نەگېرتن قەرار
وەقت سوب سەحەر داخل بین وە شار
تا مەنزل و جای پەنجەمین بەردن
هەر شۆ دە هەزار هەزیمەت کەردن
خولاسە بە غەیر جە میر و بەنگین
سوارێ نەمەند نە ڕۇی خانەی زین
بەنگین وات وە مەم میر عالی جاﮪ
سوار و سوپا تەمام بین تەباﮪ
ئەڵبەت ئی دەغەڵ جە بابۊت بېیەن
وەر نە جە سوپا ئی دەغەڵ نېیەن
-------
پەراوېزۍ
*. دلۍ دەینۋیسەکەیەنە پېسەو (غەمبەر)ی ئامان
**. دلۍ دەینۋیسەکەیەنە پېسەو (غەمبەر)ی ئامان
[1]