#میرزای لوڕستانی#
جەو دەم بشنەو ئېستېھزای دوڵبەر
ئاگەدار نېیەن جە خەیر و جە شەڕ
ئەڵبەت حەرفێ بەد مەیۊش بە زبان
بە نامی خاتۇن ئەو نە ڕۇی دیوان
ھەر وەقت مەعلۇم بی جە میر و ئەعیان
حەرامزادەنان جە قاپیی شاھان
جەو دەم بفەرما داش نە ڕۇی تېغ
لادێ جە کوشتش مەکەرە دەرېغ
حەرفێ نەدارۊن پادشا و گەدا
ڕازشان نېیەن جە حەرفی بەدڕاە
ئەمیر چۇن شنەفت دەعوەتکەرد یاران
بە ئەمری قودرەت یاوان بە دیوان
وەقتی شام ئاما سوفرە ئاوەردن
شەھد و مەتعۇمات تەناولکەردن
نە وەقتی ئامای قەلیان و قاوە
میر زیندین دەمێ، دېیا وە لاوە
فەرمۇد تەختە و نەرد باوەران وە جەم
ئارەزۇم نەردەن ئارۊ چەنی مەم
ئاوەردن تەختە نېیان وە زەمین
داشان قەرار دان نە خانەی ڕەنگین
دۇ سێ مەراتب شانان داشی نەرد
ئەمیر وات وە مەم بواچە یەک فەرد
وات نمەزانۇن چېش واچۇ ئەمیر
بوېیەر جە گونام بۍ عوزر و تەقسیر
ئەمیر وات ئېم ڕۊ دینان یاری مەم
وېنەی عەجۇزان باڵاش بېیەن خەم
گۊشش وېنەی مۇش سۇراخی دیوار
کەریە ئەلمەنزەر غەلیز و مردار
جەو دەم خاتۇ زین مەگېلا شەراب
مەم چۇن خاتۇن دی جەرگش بی کەباب
ڕۇکەرد وە ئەمیر بە سەد قار و قین
واتش ئەی ئەمیر نادرەی گوزین
یارم خاتۇ زین دوختی ئەمیران
ئەمیری ئاودەل گوزیدەی شېران
ھامشیرەی ئەمیر زەیندین مەوانان
حەسرەتمەندشەن شاھانی جەھان
تاج‌ئەلدین ئەژنی ڕۇکەرد وە ئەمیر
واتش مەواچە حەرفی ناگوزیر
یە چېش مەواچی مەر ھۊشت نېیەن
ھۊش و فېکر و فام جە لات بەرشېیەن
ئاما بە زوبان ئەمیری ئەنام
زوانم غەڵەت ئاوەرد ئی کەلام
ئامام بواچۇن وە مەلەک ڕېحان
یا خاتۇن ئەستی نە شای پەریان
لەنگ بی زوبانم مەندم بۍ زوبان
ئاوەردم ئېسمی خاتۇنی زەمان
ئەمیر چۇن شنەفت فەرما بېقەرار
دەر سات جە دیوان بکۊشیش بەزار
تاج‌ئەلدین خېزا دەست دا وە خەنجەر
قەسەم بۊ بە زات پادشای ئەکبەر
ھەر کەس بەرخېزۊ جە قەسری جامڕېز
خەڵاسیش نېیەن جە ئەڵماسی تېز
عەفۆ بەرئاما توندی کەرد نە کار
گېرتەبۍ بە دەست تېغ زەھری ئابدار
ھەر کەس ئارەزۇی کوشتەی مەمێ*
جوربتدا و بە عەلەیهی ئەلسەلام کەرۊ*
بیلاە بە دەستم سزا ماوەرۊ*
*چە دەسنۋیسەکەنە، ئی دۋە بەیتەو دمایی نەتەمامیێنۍ، ڕەنگا پی جۊرە بۊ:
ھەر کەس ئارەزۇی کوشتەی مەم کەرۊ
بیلاﮪ بە دەستم سزا ماوەرۊ
[1]