سەربەۋۍ بېیەی پەی کۍ؟
نویستەی: #ئەسعەد ڕەشید#
وېیەردەی وەڵین شایەتحاڵەن پەی کەسێ چېوش ویر نەشۊوە، پەی کەسێ دەرسش وەرگېرتەبۆ، دماو لوای حکومەتی مەرکەزی چی دەڤەرەنە و وەستەرەی هېزی کوردی و دەسەڵات بەش کەردەی، ئا ناشیرینیۍ و ئا بەنام دەسکۆتۍ ئاردېشا پەی خەڵکی، بیۍ بە هوکارو هۊروەشنای کۊمەڵگەی و بەش بەشکەردەیشو وەشکەردەی تاکێ زاییفی و بېدەسەڵات و بۍ بەرهەمی کە ئیسە خەڵکی باجەکەیش مدۊ، بە ئامای ئاییشا گېرتەرەی مڵک و ماڵو دەوڵەتی، تاڵانکەردەی سەروەت و سامانی نیشتمانی و زاق کەردەیۆ گېیانو دوە بەرەیی و دژمەنکاری دلۍ خەڵکینە و نەمەنەی گېیانو هامکاری و یارمەتی مېیانو خەڵکینە، چن دەسکۆتێ بېنۍ پەی خەڵکی،
بەئامای ئاییشا و زاڵ بېیەی گېیانی حزبی و ڕەنگ دایۆش دلۍ گردو بوارەکاو ژیواینە، دلۍ دام و دەزگا حکومیەکانە، سیستەمی موئەسەساتی نەمەن، ئوخەی ئوخەی گردکەس پەی خۆی یاگېش گېرتۆ.
دمای ئانەیە جەنگو دەسەڵاتی و کوشتەی و بڕیەی بە نامۍ جەنگو برا کوشتەی و دروسکەردەی دژمنایەتی مېیانو خەڵکینە،
دمای ئانەیە بەنامۍ ئابوری سەربەۋېیۆ دەسشا کەرد بە بەردەی سامانی شاریایۆ چېرو زەمینی و دماجار دەس بەردەی پەی قوتو خەڵکی و مرنای سەرو وۍ خەڵکی.
ئاڎۍ نەتیجەو هەرمانە نەزانەکاشا کۊمەڵگێوە بۍ بەرهەم و بەتاڵشا دروسکەردەن، چوونکوم نەتاوانشا بنەمێوە داراییەی مەحکەمە بنیارە کەبۊ بە چېرخانو کۊمەڵگای، ئاڎۍ نەتیجەو منافەسەی حزبی فرەتەرین خەڵکشا کەردەن بار سەرو حکومەتیۊو خەڵکشا جە بوارەکاو کشتیاری و دەس سازی و پیشەسازی و حێوان داری بڕیەنەرە.
ئارۊ خەڵکێ فرە بۍ هەرمان، خەڵکێ فرە زانکۊ و پێمانگاش تەمامنانو بۍ یاگۍ، گەنجێ فرە یاوان تەمەنو وېشو بەبۍ پروسەو هامسەرگیری، بە دەها گرفتۍ تەریچ.
ئانۍ ئی بەرهەمېشا هەنۍ، ئارۊ دەهوڵو سەربە وېییی مەکوا، بابەتێ چینە قورس و گران بەیۊی کریۊ هەرمانۍ سەنگینېش بانۍ، بەخەڵکێ کریۊ کە ئەمانەت پارېز و دڵسۊز بۊ، قسېم سەرو لایەنێ دیاری کریای نېیەنە، چوونکوم ئی حزبە علمانیۍ ئېگەیە نۊعێ واردەشا واردەنو عەینو کاڵایشا کەردەنەنە.
جە حاڵەتێچەنە ئی هەرمانۍ کریۊ تەنیا دەسکۆتش پەی ئانېشانە کەتا ئیسە واردەنشا و بەردەنشا، گوزەرانو خەڵکی فرە چینەیە خرابتەر بۊن، دماڕوێ نادیار چەمەڕاو خەڵکی کەرۊن.
11-08-2017.[1]