سەروای چیبکەم؟ لای شەفیق
زەلیلی زوڵمەتی نەفسم بە بێ ڕەحمی خوا چیبکەم؟
بە جیفە دڵ دەکەن مائیل، لە دەس نەفس و هەوا چیبکەم؟
ئەسیری نەفس و شەیتانم، غەریقی بەحری عیسیانم
بە بێ کەشتیی شەفاعات و نەجاتی موستەفا چیبکەم؟
عەمەل مادەر، پدەر ئیحسان، قەبر گەهوارە، تەقوا شیر
بە بێ ئەعمال و ئیحسان و بە بێ تەقوا خوا چیبکەم؟
لەنێو تۆماری ئەعمالم بە غەیری شەڕ، نییە خەیرێ
منی بێ زاد و بێ تۆشە لە ڕێی بێ ئینتیها چیبکەم؟
نەگەر دەستی ئەجەل لێیدا لە تەپڵی ڕیحلەتا ئاخر
چلۆن بێمە سەفی مەحشەر، زەلیل و ڕووسیا چیبکەم؟
دەمی قامی قیامەت گەر خەلائیق دێنە سەر میزان
منی مەخجوول و شەرمەندە خودا ڕۆژی جەزا چیبکەم؟
بە بێ سەنگی محەک وەرناگرن نەقدی عەمەل، سوبحەی
کە من خاڵیی لە ئیخڵاسم لەگەڵ تۆشەی ڕیا چیبکەم؟
لەسەر پردی سیرات مەردی خوا دێن و دەچن وەک بەرق
ئەمن لەو ڕۆژە داماوم، خودا بێ دەست و پا چیبکەم؟
لە ڕۆژێکدا کە دەستێنن جەزای گەنجی عەمەل، جەننەت
بە بێ هیچ مایە و نەقدێ ئەمن لەو ڕۆژەدا چیبکەم؟
دڵم بۆ فەیزی مەردێکی خوا زۆر تالیبە، چونکە
لەخۆوە خونچە ناپشکوێ بە بێ بادی سەبا چیبکەم؟
ئەڵێی سەرهەڵگرم ڕۆژێ بڕۆم تەنیا بەدنیادا
هەتا ئەمرم بڵێم بۆ خۆم خودا چی چیبکەم خودا چییکەم؟
لە تاری زوڵمەتی نەفسا ( شەفیق) ئێستە بەداماوی
ئەڵێ هەردەم بە بێ شەمسی وجوودی موستەفا چیبکەم؟
#گوڵزاری شاعیرانی کورد#
[1]