پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: ویس و نۊهەمە
نویستەی: #ئیبراهیم میکە عەلی#
ئایین و ئایینداریی جە هۆرامان
شونەمێکیٛ ئایینو میترایی و دماتەر زەردەشتیەتی و دماتەر سەردەمو پیرەکا هۆرامانی و ئایین و ڕیٛچکەو یارسانی و سەرهوردای وەنای دلیٛ پەرسگایەکانە و دماتەریچ وەڵاو بېیەیۆ ئیسلامی و زیاڎبېیەی جوڵەی ئەدەبی و عیرفانی و دماتەر سەرهوردای تەریقەتو نەقشی ناوچەکەنە، ئینیٛ گرد بەڵگیٛنیٛ سەرو ئا ڕاسیەیە هەکە هۆرامیەکیٛ بەتایبە و خەڵکو ناوچەکەی بەگردیی خوڎا ئەژناسیٛ بینیٛ و دووریٛ بییٛنیٛ جە پەرسای دار و دەوەنی و خوڎا دەسکردا، مزانمیٛ چا وەختەنە هەکە هۆرامیەکیٛ خوڎای تاقانەی پەرسیٛنیٛ، عەرەبەکیٛ بتە دەسکردەکا ویٛشا پەرسیٛونیٛ.
پیٛسە سەرەتاو پەنجەم تەوەرەو ئی کتیٛبینە واتەنما، بە جورێوە هەر دوە ویروبڕواکە، وەڵین شوٙنەماو میترایی و زەردەشتی و دمایینیچ ئیسلام، ئاویٛزانیٛ یوٙترینی بییٛ هەکە لاو خەڵکی فامیڎەیۆ جیاوازیی نەکرییٛ میانشانە، پیٛسەو نمونێوە پەی ئا ڕاسیەیە، سەرئاما و قسیٛ پیرێوە جە پیرەکا هۆرامانی مارمیٛوە: سەردەمو ویٛشەنە پەرسا ئەو یوٙ جە پیرەکا هەکە نامیٛش (شالیارە سیاو) بوٙ و هەڵای سەرو دینو زەردەشتی بوٙ، ماچا: چی مەبی بە موسڵمان؟ ئاڎیچ پەرسوٙ چی ئا پەرسیٛمە وەنە پەرسدیٛ؟ مەگەر منیچ خوڎای مەژناسونە؟ حەر ئا خوڎایە مەپەرسونە هەکە موسڵمانەکیٛ پەرساش؟ ئانەنیا منیچ نماو تاعەت کەرونە؟ ئانەنیا منیچ یاردەی فەقیر و نەدارا مڎەونە و باج مڎەو بە خەزیٛنەی و گردیتا بە براو واڵەو ویٛم مزانونە؟ ئیٛتر چینەیە فرەتەر شمە گەرەکتانە من چیٛش بکەروو.[1]