نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ڕاۋەبەری ناوچەو ھۆرامانی
ڕېکۋستەی و ڕاۋەبەریی ھەر کۊمەڵېۋۍ تایبەتمەڼیی وېش ھەن و ڕەنگۆدای پەیۋەڼییە کۊمەڵایەتییەکا و پېکئامای کۊمەڵایەتیی ئا کۊمەڵۍ ھەن؛ سەرو ئا بنەمێ، کۊمەڵۍ خېڵەکییە و پەیۋەڼییە کۊمەڵایەتییەکېش سەرۊکخېڵ و تفەنگچیۍ سەرۊکخېڵی و ڕەشەخەڵک موازۊ، بە واتێۋە تەرە، ڕېکۋستەی و ڕاۋەبەریی خېڵەکی - سیستەمی فیئۆدالیستی موازۊ، ھەر پاسە شار و کۊمەڵۍ چینایەتییۊ ھەرمانبەری و بۆرجوازی، دۆڵەت و دەزگەی پۆلیسیی و زیڼان و ئەشکەنجە و ھامشاری و ھاموڵاتی ملکەچ موازۊ. ۋەرانۋەرو ئاڎېشاچۆ کۊمەڵۍ ئازاڎە یان شار و دەگا ئازاڎەکۍ ڕېکۋزیا و ڕاۋەبەریی ئازاڎ موازا، کە ڕېکۆتە کۊمەڵایەتییەکۍ و یاسا سرۇشتییەکۍ با بە سیستەم و یاسا و بنەماو ڕاۋەبەریشا و بەس چنی سیستەمو دێمۆکراسیی ڕاسەۋانە یان وېڕاۋەبەریی کۊمەڵایەتی گونجېیا.
ئەر ئېمە بېلایەنانە سەرنجو ۋەڵېنەو (مێژۇ) ھۆرامانی بڎەیمۍ و گەرەکما نەبۊ لاسایی کۊمەڵەکا دۆروبەری کەرمېۋە و ۋەڵېنەی دۆڵەتمەداری پەی وېما نەسازنمۍ، ناوچەو ھۆرامانی فرەتەر ئازاڎ-شار و ئازاڎ-دەگا بېیەن و ھەر یاگېۋو ۋەڵېنەو ھۆرامانینە سیستەمی دەسەڵاتداری| دۆڵەتسالاریی بېیەبۊ، یان ۋەرەنجامو نمایەڼەیی داگیرکەرا بېیەن، یان ۋەرەنجامو ۋەرەنگاری ھەڵمەتۊ دۆروبەری بېیەن، کە بە ساچیای چنی دوژمنو دوژمنی، جەنگاۋەری ئازا و سەرکۆتە کریان بە سەردار و سالار. پەی ئانەیە کە بە تەمامیی پەی ئېمە بەرگنۊ، کە پېکئامای کۆمەڵایەتیی ھۆرامانی ڕیکۋزستەی دەسەڵاتدارانە| دۊڵەتگەراش ھۊرنەگېرتەن، متاۋمۍ سەرنجو یەرۍ چېۋا بڎەیمۍ:
یەکەم : دەرەبەگایەتی چە ھۆرامانەنە ۋەرەنجامو پېکئامای خېڵەکی نەبېیەن، کە پېکئامێۋی چینایەتی ھەن و خۊبەخۊ سەرۊک و ملکەچ سەپنۊ، بەگەکۍ یان دەسکەلاو سەفەوییەکا بېیېنۍ یان دەسکەلاو ئوسمانییەکا بېیېنۍ و فرەتەر دەفتەرداری| باجسانۍ ئیمپڕاتۆرییەکا بېیېنۍ، ھەر ۋەرو ئانەیچە بېیەن، کە بە بەگە ڕۇتۍ ئەژناسیێنۍ و خودو ۋاچەو (بەگ و بەگلەر)ی سەرچەمېۋی زۋانی تورکیشا ھەن.
دوەم : سەرو بنەماو ئانەیە کە ماچا چە ھۆرامانەنە جۊریۋ چە دێمۆکراسی و ڕاۋەبەری دێمۆکراسی بېیەن و ئاماژە بە ورڎەکارییەکاش مڎا [ھەرچڼە من چنی نامەنېیایش بە ژیرلەو مەرۍ ناکۊک ھەنا و ژیرلەو مەرۍ کەسایەتی بېیەن، نەک سیستەم، سیستەمو ھۊرۋچناکەی پارلەمانی نەبېیەن، بەڵکو بە جۊرو دێمۆکراسی ڕاسەۋانەی| کۊنیشتی گەلییانە بېیەن؛ چۇنکە ھەم کۊنیشتی گرڎینەو خەڵکیینە ئەنجامدریان و ھەم وېھۊرۋچنای و ھۊرۋچنای ڕاسەۋانە بېیەن و ھۊرۋچیێکۍ یاگەگیرو خەڵکی نەبېیېنۍ، بەڵکو ئەنجامدەرۍ بڕیارەکا خەڵکی و بەدیئاۋەری پەنەۋازییەکا خەڵکەکەی بېیېنۍ؛ کەسېۋ|کەسېۋە کە خەڵکی| دەنگدەرا ڕاسەۋانە دلۍ کۊنیشتی گرڎینەینە ھۊرۋچنابۊ، بەدڵنېیاییۆ مشیۊ ھەر ئا خەڵکە یان ھۊرۋچنۍ تاۋابۊشا کەسە ھۊرۋچیاکەی لابەرا. ھەر پېسەو دێمۆکراسی ڕاسەۋانەو [ڕیکۋزتەی و بڕیاردای وارۆ پەی سەری] یۊنانی کۊنی، نەک سیستەمی پارلەمانی، کە بە زۊردارەکی نامۊ دێمۆکراسیش باڵارە بڕیێنە و کریان بە دېۋجامەو دێمۆکراسی، تاکو دێمۆکراسی ڕاستینە [وېڕاۋەبەریی کۊمەڵایەتیی] چە ۋیرو خەڵکینە بەرکریۊ و شېۋیۊ، ھەر پا جۊرە کە چی سەردەمەنە ئېمە ۋینمۍ، کە دەسەڵاتی سەپیاو مشەوەرە ڕامیارەکا و سەرمایەدارەکا بەنامو ڕاۋەبەری خەڵکی [دێمۆکراسی] بە خەڵکی ئەژناسنیان.
یەرەم : چە ناوچەو ھۆرامانینە بەس ئا کاتۍ ڕاۋەبەریی کۊمەڵۍ شېۋەو دۆڵەتداریش بېیەن، کە ناوچەو ھۆرامانی کۆتەن چېرو دەسو داگیرکەرا، کە سیستەمو دۆڵەتەمەداریی پاشاییشا بېیەن و بەپاو ڕېکۋزستەو سیستەمی ئیمپراتۆرییەکەیشا، دەسەڵاتدارەکۍ ھۆرامانی نمایەڼۍ دۆڵەتمەداری ئیمپراتۆرەکا بېیېنۍ. ئەگینا سەردەمەکا بەرو داگیرکریاینە ناوچەو ھۆرامانی وېڕاۋەبەریی ئازاڎ-شار و ئازاڎ-دەگایشا بېیەن. ھەر ۋەرو ئانەیە تەنانەت چە ئیسەیچەنە، کە ناوچەو ھۆرامانی چېردەسو دۋۍ دۊڵەتا ھەن، ئەر پارتییایەتی و فەرمانداریی ئا دۆڵەتا چە دەگاکا ھۆرامانینە لابەرمۍ، ژیۋای و ڕېکۋستەی و ڕاۋەبەریی دەگاکا توشۇ گرفتاری نمەبۊ، چۇنکە ھەڵای کولتۇرو خەڵکو ھۆرامانینە بنەماکۍ ھەرەوەزی و ئاشتەۋایی کۊمەڵایەتی و پېۋەرەژیۋای و وېکۊمەکیۍ کۊمەڵایەتی مەنېنۍ، کە دماینەو سیستەمو ئازاڎ-شاری| ئازاڎ-دەگای بېیەن و ھەن.
چە ئیسەنە سەربارو ئاڵۇڎە-بېیەو ئاۋەزو فرەو کەسە ھۆرامەکا بە ڕامیاریی و پارتییایەتی و ئاراستەگەریی ئایدیۆلۆجی و ڕامیاریی-کەرڎەی ۋیرۆکەرڎەی و بڕۋای ئایینیۍ، ھەڵای بنەماکۍ ئازاڎ-شاری|ئازاڎ دەگای بەشېۋەنۍ چە ئاۋەزی کەسیی و کۊمەڵایەتیی ھۆرامەکا. سەرو ئا بنەمێ ئېمە چی ڕۊزگارەنە بە ئەۋەگېڵای پەی سەرو ۋېیەرڎەی ڕاۋەبەریما، کە ڕېشەی کولتۇرییش ھەن، متاۋمۍ وېما چە تەنگەلاییە ڕامیاریی و ئابۇرییەکا ڕزگارکەرمۍ و سیستەمېۋی ئازاڎ و یەکسان و داڎپەروەر پەی وېما ڕیکۋزمی و بەدیبارمۍ.
پەی ئانەیە، کە ھەنگام بە ھەنگام سیستەمېۋی چامنە بۊۋە بە بەشېۋ چە ئاۋەز و کولتۇری کەسیی ھۆرامەکا یان کەسانېۋی کە چە ناوچەو ھۆرامانینە مژیۋا، پەنەۋاز ھەن، کۆمەڵېۋ ھەنگامۍ سەرەتایی بنیەیمۍ و پایەکا ئا سیستەمەیە، کە ڕیکۋزیا کۊمەڵایەتیی و کولتۇریی و جەماوەرییەکۍ پېسەو ئەنجۇمەنی و شورێ و ھەرەوەزی و کۆمونۍ ھەنۍ، ڕېکۋزمۍ و کەرمېشا بە یاگەگیرو سیستەمی ملھوڕانەو دۆڵەتی، کە بېژگە نەھامەتی و دۋەبەرکی و ستەم و ملھوڕیی ڕامیاریی و پارتییایەتی و قاڵبدای ئایدیۆلۆجیی ھیچی تەرش پەی کۊمەڵۊ ئېمە و ھەر پاسە تەمامو کۊمەڵەکا جەھانی بەدیناۋردەن، بەڵکو چانەیچە زېیاتەر ڕۊبەڕۊ ئېمە چە بېیەی و بنەما کولتۇریی و ڕاۋەبەرییە مرۊڤییەکا وېما دۇرۍ ۋزۊۋە و ھەر کەسېۋی ھۆرامی-زۋان کە بە جۊرېۋ سەردەمو ۋەڵۍ سەرھۊرڎای پارتییایەتی و زاڵ-بېیەی سەراسەریگیریی سیستەمو دۆڵەتیش ۋیرمەنەبۊ، یان ئەژنەۋیەبۊ، متاۋۊ کەسایەتی و کولتۇرو کەسەکا ئیسەی و کەسەکا ھیزی بەراۋرڎ کەرۊ .
نەۋاچیا نەمەنۊ، نە ڕېکۋیێکۍ سیستەمی سرۇشتیی کۊمەڵەکا ھیزی بەبۍ خېیاڵ و ئارەزۇ و گەرەکبېیەو [ئیرادەو] ئەڼاما کۊمەڵەکا بەدیئامێنۍ و نە ڕېکۋستەی سیستەمی ڕامیاریی کۊمەڵەکا ئیسەی بەبۍ دلېنەبەرڎەی خېیاڵ و ئارەزۇ و گەرەکبېیەو [ئیرادەو] ئەڼاما کۊمەڵەکا بەدیئامان و سەپیان. سەرو بنەماو ئا ئەزمۇنگیرییا، ئەگەرو ڕزگاربېیەی مرۊڤایەتی چە سیستەمو سەروەریی چینایەتی [سیستەمی دژە-مرۊڤایەتی و دژە-ژیۋاریی و دژە-سرۇشتیی] پابەڼو کۊششی کۊمەڵایەتییانەو ئەڼاما کۊمەڵەکا بېیەن و ھەن، کە ئەزمۇنەکا ۋەرەنگاریی ۋەڵېنەیی کۊمەڵەکا سەرانسەرو جەھانی سەلەمنان و پېسەو کۊمەڵېۋ وانۍ.
ھەنگامە سەرەتایی و بنەڕەتییەکۍ ئەۋەگېڵنای و ڕېکۆۋزتەی وېڕاۋەبەریی کۊمەڵایەتیی کۊمەڵە سرۇشتییەکا:
- درۊسکەرڎەی گروپەکا ھامکاریی و ھەرەوەزیی کۊمەڵایەتی دۇر چە دەسەڵاتو پارتییە ڕامیارییەکا و ھەژمۇنو ئاراستە ئایدیۆلۆجییەکا و وېسەپنای فەرماندارییەکا و کۆمپانییەکا و دۊڵەتەکا.
- درۊسکەرڎەی ئەنجۇمەنەکا ڕاۋەبەریی کۊمەڵایەتی سەرو بنەماو پەیڕەۋکەرڎەی دێمۆکراسی ڕاسەۋانە|وۍ-بڕیاردای خەڵکی.
- ھۊرۋچنای ئەڼاما ئەنجومەنەکا سەرو بنەماو شارەزایی و تواناداری و دڵسۊزی و ئەزمۇنداری.
- ڕېکۋستەی ڕاۋەبەریی دەگایا و شارەکا سەرو بنەماو وېڕاۋەبەریی گروپە جەماوەریی و کۊمەڵایەتیی و ھەرەوەزییە کارە، یان پېکئاۋرڎەی ڕاۋەبەرییەکا چە ڕاو ئاڎیشاۋە.
- ئەڼامۍ ئەنجۇمەنەکا و ئەنجۇمەنەکۍ نمایەڼۍ ڕاسەۋانەو خەڵکی با، نەک یاگەگېرو خەڵکی و نمایەڼەیی ھەمیشەیی؛ نمایەڼەیی چە وېراۋەبەرییەکانە کاتیی و بېلایەنانە و بەبۍ بەرتەریی کریۊ.
- ئەڼامۍ ئەنجۇمەنەکا و ئەنجۇمەنەکۍ، دەسەڵاتدارۍ و بڕیاردەرۍ نېیەنۍ و ن.مەبا، بەڵکو ئەنجامدەرۍ داوازیا و بڕیارەکا خەڵکی ھەنۍ، کە دلۍ کۊنیشتە گرڎینەکا خەڵکینە گرڎو خەڵکی سەرشا بڕیارەمڎۊ و پەی ئەنجامدایشا ئەڼامۍ ئەنجۇمەنەکا و ئەنجۇمەنەکۍ هۊرۋچیا و دەسنیشانۍ کریا.
- ئەڼامۍ ئەنجۇمەنەکا ئازاڎۍ ھەنۍ چۍ ۋیرۆکەرڎېۋی ڕامیاریی یان ئایینییشا ھەن، بەڵام مافشا نېیا، ۋیرۆکەرڎەی و ئاراستەی ڕامیاریی و ئایینیی وېشا سەرو خەڵکییەرە سەپنا، یان تېکەڵو ھەرمانۍ و چالاکییەکا ئەنجۇمەنو ڕاۋەبەریی کەرا.
- گرڎو ئەڼاما ئەنجۇمەنەکا چە کۊنیشتی گرڎینەو خەڵکینە ھۊرۋچیا و ھەر کات ھەر ئەڼامېۋ چە ماۋەو ئەڼامەتیشەنە ھەرمانۍ یان چالاکی و بڕیارۍ نادرۊسی کەرۊ و بڎۊ، خەڵکەکە داۋاو کۊنیشتی نائاسایی ئا یاگۍ کەرۊ و ئەڼامەکەی لابەرۊ و ئەڼامېۋی تەر پەی ئەنجامداو ئا ھەرمانۍ، کە بە ئەڼامی ۋەڵینۍ ئەسپاریێنە، دەسنیشان کەرۊ.
- پەی ھۊرسەنگنای ھەرمانکەرڎەی و خزمتەکەرڎەی ئەنجۇمەنی و ئەڼامەکا ئەنجومەنی، گرڎ شش مانگېۋ جارېۋ یان ساڵېۋ جارېۋ کۊنیشتی گرڎینەو خەڵکو دەگاکا یان گەڕەکەکا شاری کە ئەنجۇمەنەکەشا چنە ھۊرۋچیان، ئەنجاممڎریۊ و چا کۊنیشتە جەماۋەرییەنە بڕیارۍ تازۍ مڎریا و بە ئەنجۇمەنی مسپاریا و ئەنجامگیریی بڕیارە ۋەڵینەکا کریۊ و ھەر پاسە ئەرکو ئەڼاما ئەنجومەنی تازەی یان ئەڼامە تازەکا دەسنیشان کریۊ.
- دماو ھۊرۋچنای و دەسنیشان-کەرڎەی ئەنجومەنو دەگاکا | گەڕەکەکا شاری ئەنجۇمەنی ناوچەیی گرڎو دەگاکا|سەرتاسەرو شاری ھۊرۋچیۊ و ھەر پاسە ئەنجۇمەنی باڵا یان سەرتاسەریی ھەر ھەرېمېۋی وېگەرڎانی [وېڕاۋەبەریی کۊمەڵایەتی] چە نمایەڼە ھۊرۋچیایا گرڎو ئەنجۇمەنە ناوچەییەکا دەسنیشان کریۊ.
- بڕیاردای سەرو دەسۇرو ڕاۋەبەریی و دەسنیشانکەدەی سیستەمو ڕاۋەبەریی پېسەو ھەر بڕیارېۋۍ تەرۍ مافو گرڎو خەڵکی ھەن و دلۍ کۊنیشتە جەماۋەرییەکانە چە بارەش بڕیارە مڎریۊ.
- بڕیاردای سەرو جۊرو سیستەم و پەرۋەرڎەی و وەنەی و ئاماڎەکاری پیشەوەریی، پەی گرڎو خەڵکۍ و کۊنیشتی گرڎینەو ئەنجۇمەنەکا و بەشداری شارەزایا ئا بوارا گېڵۊۋە. پەی نمۇنەی خەڵکی یان ئەڎا و تاتەکۍ چنی مامۊسایا ئازاڎۍ ھەنۍ، کە جۊرو ڕاۋەبەریی فېرگاو زاڕۊڵەکاشا و سیستەمو وەنەیشا چنین ھەن و مشیۊ چنین بۊ، دەسنیشان کەرا.
- سیستەمو ڕېکۋستەی خزمەتگوزارییە کۊمەڵایەتییەکا و ھەر پاسە گرڎو بوارەکا تەرو ژیۋای و پەنەۋازییە گرڎینەکا خەڵکی پەی گەرەک-بېیەی و ئارەزۇمەڼیی خەڵکی گېڵۊۋە و ئەنجۇمەنە پایەیی و سەرتاسەرییەکۍ تەنیا مافو ئەنجامداو بڕیارەکا خەڵکیشا ھەن.
- بەھرەمەڼیی خەڵکی چە خزمەتگوزارییەکا بە بەشداری و کۊمەکو خودو کەسەکا پەیوەست ھەن، چە سیستەمی کۊمەڵایەتی خزمەتگوزارییەکانە چڼ بەشداری و کۊمەک کەرا، ئاڼە بەھرەمەڼۍ با، ھەڵبەتە کەسانۍ ۋنەقۊمیێ و کەمئەڼامۍ و نەوەشۍ و زەیسانۍ بەبۍ ھیچ مەرجېۋ مافو بەھرەمەڼ بېیەیشا ھەن و مشیۊ پەنەۋازیی و ناچاریی کەسەکا ۋەرو چەما گېریۊ.
- پارتییایەتی و چالاکی ڕامیاریی و ئایینداری چە سیستەمو وېڕاۋەبەریی کۊمەڵایەتی جېیا ھەن و پېسەو حەزی و ئارەزۇمەڼیی کەسەکا مەنۊۋە و بە ھیچ جۊریۋ ن.مەبۊ چنی ڕاۋەبەریی کۊمەڵۍ تېکەڵ کریۊ. ھەر کەس ئازاڎ ھەن، کە سەر بە چ پارتییۋ، ئایینېۋ بۊ و چ حەزېۋی کەسیی وېش بۊ، بەڵام ھیچ کەس پەیش نېیا، حەزە تایبەتەکا وېش سەرو کۊمەڵېرە سەپنۊ، یان کەسانۍ تەرۍ بە ئەنجامدای و پەیڕەۋکەرڎەی حەزەکا وېش ناچارۍ کەرۊ. ھەڵبەتە ئانەیچە ڕۆشن بۊ، کە ئازاڎی ۋیرۆکەرڎەی و جېیاۋازی باۋەڕی بنەمێ سەرەکییۍ وېڕاۋەبەریی کۊمەڵایەتی ھەنۍ و مشیۊ با.
- یۊگیرتەی ھەر ھەرېمېۋی چنی ھەرېمېۋی تەری، یان جېیابېیەی ھەر ناوچېۋی چە ھەرېمېۋی، بەس سەرو بنەماو ڕاپەرسیی گرڎو خەڵکو ئا ھەرېمەیە یان ناوچەیە چە ڕاو کۊنیشتی ئاسایی یان نائاسایی ئەنجۇمەنە پایەیی و سەرتاسەرییەکاۋە بڕیارمڎریۊ، ئەرنا ھەر کۊششېۋ پەی جېیاکەرڎەی ناوچېۋی یان لکنای ھەرېمېۋی گنۊنە خانەو پیلانگێڕی ڕامیاریی دژو خەڵکی.
- سیستەمو وېڕاۋەبەریی کۊمەڵایەتی ڕېکۋزیا سەرو بنەماو بەشداریی ڕاستەۋانەو خەڵکی، تەمام پېچەۋانەو سیستەمی پارلەمانی|دۆڵەتیی ھەن و بەس سەرو بنەماو یۊگېرتەو ئەنجۇمەنە ئازاڎەکا، شورا ئازاڎەکا، ھەرەوەزییە ئازاڎەکا، گروپەکا یاگۊ ژیۋای و ھەرمان-کەرڎەی مەرزیۊرە و بە کۊنیشتی گرڎینەو خەڵکی و بڕیاردای ڕاسەۋانەو خەڵکی پەشتی بینۊ و گرڎ بڕیاردایېۋ یان ڕېکۆتېۋ بە ڕەزامەڼیی خەڵکی سەرو بنەماو ڕاپەرسییە گرڎینەکا مڎریۊ و ھەر بڕیارداییۋ یان ڕێکۆتېۋ سەرو بنەماو پارتییایەتی و فەرمانداریی و دۊڵەتی ڕەۋاییش نېیا و دژو سیستەمو وېڕاۋەبەریی خەڵکی بۊ.
- ئا بنەمێ و ھەر بنەمێۋۍ تەرە، کە چنی پېکئاۋرڎەو سیستەمو وېڕاۋەبەریی کۊمەڵایەتی سەرو بنەماو دێمۆکراسی ڕاسەۋانەی گونجیۊ و بە یاۋای بە مەرامەکا خەڵکی خزمەتکەرۊ.
- ....تد .
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]