باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و سی و نۊهەمە

میرزا ئۆلقاڎرو پاوەی باس چا کەسە نزیکا کەرۊن کە هاگاڎارۍ ئامای وەحیۍ بیېنۍ پەی پېخامئاوەری، کە باس جە بارو وەزعو محەمەدی کەران، جە دەمو نازڵ بېیەی وەحیېنە.
نەقڵەن، جە حەزرەت، ئومەلموئمنین
عایشە، سەدیق قیبلەی دنیا و دین
سای حوری تەڵعەت، ڕېزەی ڕاز شەکەر
ڕازی بۊ لېش حەقق، جە باڵایی سەر
فەرما، یەک ڕۊژ دیم، یەک سەردای سەخت
بی بە وەڵەک ڕېز، وە سەڎ جوهد و جەخت
وەحیی، وە حەزرەت ڕیسالەت یاوا
چەمیا، چوون چەمە، نەوتوولی ساوا
جە ڕووی پېشانش، ئەو شەمسی پەڕ نوور
دەسدەس، مەڕېزنا، عەرەق چوون کافوور
هەم ئیبن عەبباس، ڕازی بۊ حەقق لېش
کەردەن ڕیوایەت، جەو شای خەیر ئەندېش
چوون یەک ڕۊ حەزرەت، شای ئەعلا سیفات
خەتمولمورسەلین، خواجەی کائینات
جە فەزای کەعبە، نیشتەبۍ وە شاد
لوتفی خوداوەند، ماوەرۊش وە یاد
جە ناگاه عوسمان، بن مەعزوون یاوا
خاک و پای حەزرەت، وە دیڎە ساوا
حەزرەت، چەنی ئەو، تەوازوع کەردش
ڕەسمی بوزورگی وە جا، ئاوەردش
ڕووی موبارەکش، وە ئاسمان کەرد
کەمکەم، تا نیگاش، وە زەمین ئاوەرد
نەزەر، تا وە لای، ڕاستی وېش ئاوەرد
بەڵام، جە عوسمان ئیحتراز مەکەرد
چوون کەسێ، عیلم و دەری وەرکەرۊ
مەعنا و مەتنی ئەو، نە دڵ باوەرۊ
نەدارا، پەی پەی، نامی حەقق مەبەرد
وە چەم، چن هەزار، ئیشارەت مەکەرد
سا بەعد ساتێ، شای مینای بېگەرد
دیسان، هەم نەزەر، وە ئاسمان کەرد
چەو دما، وە لوتف، دیا وە لای ئەو
نەزەر کەرد بە ڕەمز، سەرتاپای ئەو
عوسمان، عەرز کەردش، واتش: یا مەحموود
من تۊم، وەیتەورە، نەڎیەن وە وجوود
فەرماوا، عوسمان: حەڵی بیت جە کار
وات: ئانە چېش بیی، شای واڵا تەببار
فەرما: قاسید بێ، جە قاپی باڵا
حوکمش ئاوەردەن، جە هەقق تەعالا
عوسمان وات: چېشەن، بفەرما، کامەن
حوکمش، چە تەورەن، جە کام ئەقسامەن
عوسمان وات: ئەو ڕۊ، من سوجدە بەردم
باوەڕ، بە حەزرەت، پېغەمەر کەردم
بە وەحدانییەت، پادشای جەببار
نەتۊی دەروونم، ئیمان گرت قەرار
ئەر سەد، جە حەزرەت، وېم نەکەرد غافڵ
بەڵام، هەر دوودش مەدا، نە تۊی دڵ
دیسان، هەم بە قەول، عولەمای سییەر
جە نزوول وەحی، وە لای پېغەمبەر
جەستەی موبارەک، ئەو شای شیرین خۊ
جەودما، سەنگین، مەویا، وېنەی کۊ
هیچ کەس نەواچۊ، یە حیکایەتەن
جە موجتەهیدان، یە ڕیوایەتەن
وەختێ کە نازڵ مەبۊنە جە دوور
ڕۊخساری حەزرەت، مەویا وە کافوور
مەواهیم، مەبۊ، جیسمی لەتیفش
سەدا، هەر وە فەوق، فەرقی شەریفش
ئیمامی عوسمان حەقق ڕازیی بۊ لېش
کیتابەت مەکەرد، یەک ڕۊ نە جای وېش
جیسم هیدایەت، فەرقی خۊش مەزموون
هەر تا کە ئایە(لا یستوی القاعدون).[1]