چاشتەو خاڎمی
هورگېڵنای پەی سەرو زوانی هۆرامی: #ئەسعەد ڕەشید#
بەشەی دوەسەڎ و هەشتەمە
نیایمېشا دلې قیتاری، پۊلیسێشا نیارە دیارماوە، چەمڎاریش کەردیمې تاکو سنورو ئەڵمانیای ترازیایمې. گەر وېما نەوەستێنمېرە تاکو پاریس و مەدریدیچ لوېنمې و کەس نەبې بواچۊ پەشتەو چەماتا کلش پۆن. وېرەگا جە شتوگارت وەستیمېرە. دلې مدرگاکانە هۊڎې شیشێنې هەنې کە چاگە ژەنێ مەنزڵە پەی مېمانا ئاماڎې مەکەرۊن، نەخشې ئۊتیلەکایچ ئینێ پۆ دیوارەکاشۆ. کام هۊڎە دلې کام ئۊتیلېنە بەتاڵەن، یام تەختێ بې مېمانەن. بە کارەبا نیشان دریان قیمەتەکەیچش نویسیان. تەنیا تەختێما دەسکۆت کە سینەمە چوونکی ژەنینە چاگە بوسۊن، کرەکېش حەڤڎە مارکې بې. تەکسی بە حیسابو قوماربازی فرەش سوڕنایمێ، ئاڎیچ حەڤڎە مارکېش چەنە وەرگېرتیمی. یاگې پەی سینەمې ئاماڎې بییە؛ وېچمان دلې مدرگاینە سەرگەردانې مەنیمێ. کیلوێ چایی، کیلوێ قاوەی هاڕیا، عەبێوە سیاوەی ژەنە عەجەماما پەنەبې کە جە مۆسکۆ بڎەیمېش بە ژەنە ئەفسەرێ تارنریێ ئېرانیې. ڕیزە سڼۊقې پېسە سڼوقو پۊست کیاستەی بېنې پەی باوڵ نیانەی، ویس (فنیک)ې بنیە دلې وڵەکېش و مەکریۊوە. ژەنەش و کرېڵەکەش لاو وېتۆ بۊ. جە لواڕانەی مانیێبېنمې، وەرممان ئې. دلې سوچو مدرگاکەیۆ سەرو تەوەنا فەرشەکەیشۆ بېژیایمېرە. زەبیحی عەبا سیاوەکېش دا وېشەرە. هەر کە پرخەش ئې، ماڵام پۊرە: هورزە!
ماچۊ: چی نمازی بوسو؟
منیچ واتم: هەتیم تۊ پا عەبێوە کە دێنەت وېتەرەو پاڵمەنە کېشیانی، ژەنە عەجەمېم مەیا وەرچەما؛ هینم مەهورزۊ!
هەڵای وەرممان نەکۆتەبې پۊرە، سەربازې ئەمەریکیې راسېشا کەردیمێ، واتشان: مەمنووعەن چېگە بووسدې. دیسان بە پێ کۆتیمێ ڕا، هەم لوایمێ پەی دلې وەرمەکەی، سەربازێ جە دوە سەربازەکانو وەڵې هایی کەردیمێ، واتش: مەمنۊعەن بووسدې!
ئېمەیچ بە ئینگلیزیێ شەق و شڕ، هەر مەواچېنی عەرەبېنمې و بە کوردی قسې مەکەرمېن، یاونامانە مانیێنمې، ئەشۊم چېش بکەرمېن؟
کۊت وەڵېما، بەردیمېش پەی دلې کافێ فرە خەفەی دلې مدرگاکەینە، گارسۆن ئاما، بە ئیشارە ماچۊ: زەڕتان پەنەن؟ زەڕی ئەڵمانی چن فنیکێمان پەنەبې، زەڕی سوریچش گەرەک نەبې. بە هەردویماوە کۊکێوەو دوې پەرداخېش پەی ئاردیمې. دەمئەژمارێ بنیشەرە، دوې دەمئەژمارې بنیشەرە، وەڕەزې بیەیمې. لوایمې پەی پیاسکا تاکو هیلاکې بیەیمې، ڕۊ هەر نمەبۊوە! لوایمێ پەی کافێی؛ ڕاوە بەرشانکەردیمې. ئیسەر و ئۆسەرو ئېزگەیمان کەرد، تووشو سەربازە ئەمەریکیەکا بیەیمێ. یاونێمانە دەنگ و باس چېشەن. ئاردیمېشاوە پەی کافێ و واتشا: تاکو سەوای وەرکۆت چېگە بیدې! نمەتاوان بەرتان بکەران. بە نیشتەرەی دلې کافێ و بە پیاسەکەردەی ڕۊمان کەردۆ. سینەم خانمەمان ئېستۆ، هەرنۆعێ بی یاگێما پېڎا کەرد، بە دە مارکې، بە غار دای لوایمې پەی تەلەفوون کەردەی.
تەلەفونمان کەرد پەی قاسملۊی: قاسملۊ، دەخیلەن عیلاجێمان بکەرە! (ئا دەمە جە پراگ ئوستاز بې).
وېرەگا تەلەفون، ساعبێ تەلەفون.
قاسملۊ ماچۊ: کاکە! خالید بەکتاشی چەنە تېک دێندې؛ ئانا ئینایمې حۆلېنە پەیتان.
جارێشا ماچۊ: دمای چوار ڕوا پاسەکەرمې بلڎې پەی بەرلینی و چاگۆ ڕاس بەراتان پەی مۆسکۆی. نیشتیمېرە حسابو دارایی بکەرمېن: هەقو پەڼج ڕوا یاگې مەنەیۆ، ئاڼە؛ کرې جە شتوتگارتۆ تاکو بەرلین، ئانە؛ ئەی چېش بوەرمېن؟ هیچ! چی گاندی پەی ماوەو مانگێ هیچش نەوارد و گۊشیچش پەنە نەڎا؟ بییەیمې بە گاندی! چوار ڕوې ڕېک زاڎ نەلا سەرو زوانی. پاسەم پەنە ئامابې ڕاکەردەینە لڼگېم مەلەرزېنې. ئاڎیچې هەر پېسە من؛ بەڵام کوچێ خاستەرې بېنې، شکەو ئانەی کەرېنا بە دزی منۆ ژەمێشا واردېنە! خوڎای زیاڎ بۊ پاسنە نەبی. بەشێ جە کتېبو چێشتی مجێور، نویستەی #هەژار موکریانی#، هورگېڵنای پەی سەرو زوانی هۆرامی: #ئەسعەد ڕەشید#. [1]