نامۍ: فەرهاد
نازنام: کۆبانێ
نامۊ تاتەی: عەبدی
ساڵۊ پېڎابېیەی: 1967ز.
یاگۊ پېڎابېیەی: #کۆبانێ#
$ژیۋاینامە$
فەرھاد عەبدی شاھین؛ ئەشناسیا بە مەزڵوم کۆبانی، مەزڵوم عەبدی، شاھین سلۆ. فەرماندارێ سەربازیی کوردو وەرنیشتیەن. ئاڎ جە ئیسەنە فەرماندەو گرڎینەو ھېزەکانو سوریای دیموکراتیەن(هەسەدە).
سەرەتا دلۍ ڕیزەکانو پارتو هەرمانبەرانو کوردەسانی ژڵېوەی ڕامیارش دەسپەنەکەردەن جە سوریا، چڼیین جارۍ دەسگیرکریان، ساڵەو (1996ز.) بەشداریش دلۍ چن جەنگێنە چەنی هېزەکانو پارېزناو گەلی کەرڎەن جە هەکاری دژو سوپاو تورکیای، میانو ساڵەکانو (1997 پەی 2003ز.) جە ئۆروپا مەنەنۆ و دمای داگیرکەرڎەی عېراقی ئامان پەی شارو مەخمووری جە پانیشتو کوردەسانی، دلۍ کەرڎەوێ سەربازینە بەشداریش کەردەن، تاکو ساڵەو (2004ز.) چاگە مەنەنۆ، ساڵەو (2014ز.)پېسە کیانیاو یەکینەکانو پارېزناو گەلی جە شارو سلېمانی دلۍ ڕېککۆتێ چەنی ئېران و ئەمەریکای ئاماڎە بییەن پەی وەشکەرڎەی هامپێمانیێ دژو داعشی، ساڵەو (2015ز.) بییەن بە فەرماندارو گرڎینەو هېزە چەکدارەکانو (هەسەدە)، زیاتەر جە (60,000 پەی 70,000) سەربازا چېرو دەساشەنە بیېنۍ.
مانگەو (9) ساڵەو (2019ز.)، کاتێ هېزەکانو تورکیای هېرششان بەرد سەرو وەرنیشتی، بە ناچاری چەنی سوپاو سوریا و ڕوسیای ڕېککۆت، مەزڵوم کۆبانی چەربارەو ئا ڕېککۆتەنامەیە واتش (گەر ناچارۍ بیمۍ مییانو سازش و جینۆسایدی یۊشان ھۊرچنمۍ، ئانە ئېمە خەڵکو وېمان ھۊرچنمۍ).
مەزڵوم کۆبانێ، فەرماندارو گرڎینەو هېزەکانو سوریای دیموکرات (هەسەدە) هاوارش کەردو ماچۊ: ئا سیاسەتە کە ناقەولی جە بییەی کورڎی کەرۍ، کە بە پێماڼامەو لۊزانی دەسش پەنەکەرد، هیچ بەرهەمێش سۆز نەکەرد و مەڕیارە.ئارۊ جە وەرکۆتو مییانی، کورد دەرفەتو ئانەیش هەنە کە هەقیقەتو گرفتەکۍ وېش و بییەی وېش نیشانە بڎۊن، داواش جە خەڵکو کوردەسانی و گرڎو هېزە ڕامیار و سەربازییەکانو کورڎی کەرد کە پەی یاوای بە ئامانجەکاشا یۊبگېران.
مەزڵوم؛ ساڵەو (1990_ 2012ز.) پېوەڼیش بە پارتو کرېکارانو کوردەسانیۆ بییەن، ساڵەو (2015ز) تاکو ئیسە پېوەنیش ئینا هېزەکانو سوریای دیموکراتیۆ (هەسەدە).
دلۍ ڕیزەکانو (پەکەکە) بەشداری جەنگەکاش کەرڎەن دژو داگیرکاری تورکی، هەر دلۍ جەنگو دلېنەو سوریای بەشداریێ ئازایانەش کەرڎەن.
کۆبانی یام کۆبانێ، ئاوایێ کورد نشینەن، مەگنۊ وەرنیشتو کوردەسانی دیمو چەپو ئاوەو فوراتی، سەرحەڎو میانو سوریا-تورکیا، پېسە ڕاوەبەری ئیداری سەر بە پارېزگاو (حەلەب) و سەڎ و پەنجا کیلومەترۍ چەنەش دوورەن. گوزەرانو فرەینەو خەڵکو کۆبانێ ئینا سەرو کشت و کیاری. ئەرەنیشتەکۍ کۆبانێ و دەگایەکانو چواردۆریش گرڎشان کوردېنۍ. کەمینێ عەرەبېش چەنەنۍ.
تاریخو (#19-07-2012#ز.) یەکینەکانو پارېزنای گەلی جە ڕووبەڕووبیێوەنە چەنی ھېزەکانو حکوومەتو سوریای، کۆبانێشان کۊنترۆڵ کەرد، دمای گفتوگۊی چەنیشان، ھېزەکانو حکوومەتی کېشیێوە. یەکەکۍپارېزنای گەلی، کۆبانێ و عامودێ و عەفرینشان کۊنترۆڵ کەرد. مانگەو یەکی، ساڵەو (2014ز.) پېسە ناوچێوە سەر بە ئیدارەو وېسەری دیموکراتی ئەشناسیا.
مەزڵوم کۆبانێ ئینا دلۍ قائیمەو داواکریایانە جە لاو حکومەتو تورکی، ژمارە (9) دلۍ لیستەکەین، بەپاو داواکاری تورکیای هەرکەس بتاوۊ دەسگیرش بکەرۊن، یام تیرورش بکەرۊن خەڵاتێ گۆرەش خەڵات کریۊن.
مەزڵوم کوبانێ، تاکو ئیسەیچ پېسە کۊششکارێ فەرمانداری هېزەکانو پارېزنای گەلو کورڎی مەکەرۊن، گیانش ئینا سەرو دەساشۆ، جە هیچ تەرسێ نمەسڵەمۊوە، وایە و ئاواتش ڕزگاری نەتەوەکەیشەن.
ئەسعەد ڕەشید.[1]