لیوجی کۆلانی، بەڕەچەڵەک کوردی لەدایکبووی ئەڵمانیا ڕۆژی دووشەممە 17-09-2019 لە تەمەنی 91 ساڵی لە شارۆچکەی کارلسرو لە باشووری ڕۆژاوای وڵاتەکە کۆچی دواییکرد.
کۆلانی دیزاینی لە بوارەکانی ئۆتۆمبێل، قەنەف، شوشەوات، تەلەڤزیۆن، کامێرا و جلوبەرگ دەکرد.
بەهۆی کارە سەرنجڕاکێشەکانی، دەرفەتی کار لە هەریەک لە وڵاتانی ئەڵمانیا، ئیتاڵیا، مەکسیک، ئەمریکا، ڕووسیا، چین و ژاپۆن بە لیوجی دراوە.
لیوجی دیزاینی بۆ کامێرای کانۆن T90 کردووە کە بە یەکێک لە چیرۆکە هەرە سەرکەوتووەکانی ئەم پیاوە کوردە دەناسرێت.
لیوجی دەڵێت: بیرۆکەی چوار هەزار دیزاینی لەسەر پارچە کاغەزێک نووسیبوو، ئەمە جیا لەو دیزاینانەی کە لە بوارە جیاجیاکاندا ئەنجامیداوە.
لە چاوپێکەوتنێکدا لەگەڵ گاردیانی بەریتانی، لیوجی دەڵێت: لە ئەڵمانیا لەدایکبووە، بەڵام 200 ساڵ لەمەوبەر باپیرە گەورەکانی لە ئەڵمانیا و سویسرا ژیان و بەڕەچەڵەکیش لە کوردستانەوە هاتوون.
لیوجی هەمیشە جلی سپی پۆشیوە، هەموو جلوبەرگەکانی لە شەڕواڵ، پێڵاو، جلی ژێرەوە و کاژێرەکەی دیزاینی خۆیەتی. دەڵێت: تەنیا شتێک کە دیزاینم نەکردووە ملپێچە سپیەکەمە.[1]