بەختەنەسری
دمایین بەش
دلې ڕاینە هەر دوە بې‌دەنگ سەرو سەڼەڵیاوە نیشتێبێنمېرە و هیچ کام هیچ نەواچېنمێ. بابەم بڕېو قسېش بېنې نەزانې چەنی واچۊشا. زوانش قۆڵفش کەرڎەبێ. نزیکێ یانەی بییێمێوە ماشیێنێو داش وەرو چەمامەرە جە هێنەکەو ئارامی شێ، بەڵام بابەم پېچناش بۊنەو ئانەیوە عال سەرەنجش نەڎوو. تاریک و لێڵوو وېرەگای بې یاوایمێوە یانە. فرە شەکەتە بېنا، هەر یاوانی وەروە، شۊنی هەواڵپەرسیرە وەرمم پۊرە کەوت، دوې سەعاتێ بې و نەبې وتانی. دمایی واتم بە بابەیم پەی یانەو هەسوورەیم ملو خۊ ئارام ناما شۊنیم وېم ملو. بابەیچش زانێ چېویە قۆمیان سەرە نارێ ڕاسە، ئاخرش بە زۊرو وېش کەوتە ڕا، کاتێ لوا چ مەگیرە یانەشا پەڕەن خەڵک و یۊ مەی یۊ ملۊ.
کناچێوە هێوەرەزایش زاناش پەنەش ماچۊ مامۆژەنیم ئاماوە. هەواڵش دا بە یانەو باوایش. ئێڎەیچ جە گرم و قاڵەکەی سەرەش سڕ مەنەبې. دیسان کناچەکې ئاما و واتش: مامۆژەن گېیان مزانی فرمێسکە بییە مامۆژەنی تازێم شووش کەرد بە مامۊ ئارامی و کەرڎەما وێوە. ڕېزانەی ئەرامەڼێ هەر ئڼە دنیای ڕۊشنەش وینا، کاتێ چەمېش کەرڎېوە هەنە بیمارستان و وسناینەشا. چ مەگیرە بېهۊشە کەوتێنە بە حاڵ یاوناینەشا دوکتری. هیچ چەنی ڕوېش بلا و چېش کەرۊ و چېش نەکەرۊ؟ ئی قسانە وەقرەشا بڕیێبێ، دڵش مێڕیا بې و بابەیچش بەردەوە پەی یانەی تاکو نەختێو خاسە بۊوە. ڕېزانەی فەقیرە ئەسڵەن هۊشوو وېش نەبې. ئاماوە یانە و بابەش واتش: تازە با ئارام بێوە بڕۊش بارێوەرە و تەکڵیفش ڕۊشن کەرۊوە. یا ملۊوە یا تەڵاقش مڎۊ. دە ڕوێ زیاڎش پۆوەشی هەواڵێۋەش نەپەرسا. تاکو ئاخرش یانە هەسوورانی تازەش زۊرشا ئاورد پەی ئارامی و واتشا: ئەڎایت واتەن ڕېزانێ تەڵاق مڎۊ پا شەرتێ کناچېما داینە. ئێڎیچ سەرو دوە ڕایېوە گیرش واردەبێ ئاخرش چەنی ژەنە تازە ئاماوە بڕۊش بارێوەرە. دڵێ ڕاینە تەلەفوون کەرۊوە ماچۊ ئەڎا هەنا ڕانە گەرەکمەن بەوە. ئەڎایچش هەڕەشێش وەنە کەرۊ و ماچۊ گېڵەوە وېت سووک نەکەری با ئێدێ بېیاوەشۊنیتەرە. ئەر بێوە ئانە نیەن بزانی ئارامیچ چەنی خاتوونە تازەکېش گېڵۆوە، بەڵام قسەکاو ئەڎایش سەر شوویاش مەکەرا. هۊشێ مۆحێبەتەکاو ڕېزانێ مەکەرۊوە و عەزاب ویژدان گېرۆش. چن جارێ فرمانوو ماشینەکەی دەسشەنە مەخڵەتیۆ. فرمێسکەیچ میەو بە حاڵیشرە تەرسی منیشۆ جەسە و ڕۊحیش. هەر جۊر بۊ نزیکێ یانەی گناوە. چاگەنە پېسەو یۊ بۊقێ بنیۆ بە ماشینوە و گېڵنۊشوە لار بۊوە و ملۊ چېرو خاوەرێوەرە و کۆتایی مەی بە ژیوایش. فرمێسکەیچ شۊنی چن ڕوارە جە بیمارستان مەرەخەسش مەکەرا و مەیوە پەی یانەو بابەیش.
نویستەی: گوڵزار شەریفی بېساران.[1]