ناونیشانی بابەت: شیعر و دەستنووسێکی مێژوویی سەرۆکی یەکێتیی زانایانی ئایینی کوردستان لە هەولێر بۆ شێخ عەلائەدینی خەلان
ئامادەکردنی: #محەمەد هەسنانی#
مەلا ساڵح کۆزەپانکەیی، لەناوەڕاستی سەدەی ڕابردوودا، ئەوکات سەرۆکی یەکێتیی زانایانی ئایینی ئیسلامی #کوردستان# بووە، لە ساڵی 1957 لە شیعرێکیدا ستایشی شێخ (#عەلائەدینی خەلان#) دەکات.
$دەقی شیعرەکە:$
زۆر دوعاگۆم بۆ دەوامی خۆت و خوڵقی نادرت
بۆیێ هەرکەس جارەکی دیبنی دەبیتە شاکرت
هەر لە هەولێر تاکو بەغدا زائرینت سەرتاسەر
واعەجەب ماون لە خۆش خولقیت بە چاکە زاکرت
غائبانە و حازرانە کەس نییە مەمنوون نەبێ
ئەهلی ئیران هەر مەپرسە بووینە بەندە و چاکرت
حیکمەتێکی خوایی تێدایە کەوا عالەم هەموو
موخلیص و مونقاد، غائیب دوور و نیزیک حازرت
مەعنەویاتم نییە تا باسی مەعنەویاتت بکەم
شاهیدی مەعنەویاتی تۆیە خوڵقی زاهیرت
ئەهلی ئینساف مابێ گۆ بگرێ لە گوتی مونکران
کەس بەبێ مونکر بووە جددت تا خوای قاهرت
من دوعاگۆم بەهرەوەر بێ خانەقاکەت پڕ لە نوور
هەر کەسێ دەستی لەدەستت نا عەفووی کا غافرت
یا خودا جێت چۆل نەبێ بۆ خزمەت و ئەڕشادی ناس
چاوت رووناک بێ بە عبداللە و عبدالقادرت
(صالح)ی تالح ڕەجاکاری دوعاتە و مخلیصە
لوتفی پار لێ ناگەڕێ یادم نەکات خاترت
خۆ بەرامبەر لوتفەکانت هیچ مەناعیێکم نییە
هەر دوعا مەکە لە دونیا زێدە بێنن ئاخرت
موحتەڕەم بێت لای خودا و مستەفای جدت بڵێ
شێخ علائەدین کوڕی خۆمە بە ڕەحمی باهرت
خۆی و ئەتباعی عەفوکا ربنا انت العفو
جێی ئومێدە دوور نییە ئەتوار و خوڵقی فاخرت
مەلا ساڵح کۆزەپانکەیی، ئەدەب دۆست و نووسەری سەرەتاکانی سەدەی ڕابردوو، لە گوندی کۆزەپانکەی نزیک #هەولێر# لەدایک بووە، هەر لە منداڵییەوە دەستی داوەتە خوێندن، لەسەردەستی مەلا فەتاحی خەتێ ئیجازەی زانستیی وەرگرتووە، شارەزایی زۆری لە ئەدەبی کوردی و زانستە شەرعییەکاندا هەبووە، چەند بەرهەمی چاپکراو و دەستنووسی لەدوا بەجێ ماوە، دیارە ئەمەش وایکردووە لەو سەردەمدا بکرێتە سەرۆکی یەکێتیی زانایانی ئایینی ئیسلامی کوردستان.
هەروەها شێخ عەلائەدین جەلالەدین شێخ کەمالەدین نەقشبەندی، (شێخی زینوێ و خەلان) لە دەڤەری باڵەکایەتی لە سنووری قەزای #چۆمان#، پشتاوپشتیان زیاتر لە سەدەیەکە تەکیە و خانەقایان لە خزمەت مورید و دەروێش و خەڵکدایە، لەسەرەتاوە لە گوندی خەلان لە سنووری قەزای چۆمان بوونە، بەڵام دوای کۆچی دوایی شێخ عەلا ئەدین، شێخ عەبدوڵای کوڕی شوێنی گرتووەتەوە و ساڵانێکە تەکیە و خانەقایان گواستووەتەوە بۆ شاری هەولێر، دوای کۆچی دوایی شێخ عەبدوڵاش، ئێستا شێخ عەبدولسلامی کوڕی سەرپەرشتیی تەکیە و خانەقایان دەکات لە شاری هەولێر.[1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!