بەختەنەسری
بەشو یەرۆمی
چن ڕوېشا پۆوەشی و مەرەخەسیش تەمام بی. وەقرەش بڕیابێ چەنی واچۊ مشۊم بلوە سەرو هەرمانەکېیم. هەر جۊر نەبی واتش پەنەشا و کەوتێ ڕا. گجار یۊ دوعای خەیری هەنې شۊنیشۆ و تەرەفی بە وەشە ڕوانە بۊ. گجاریچ دوعاېوەشەڕی جە دڵی پیسی پېسەو پەردەی وەرو چەما گېرورە و بەڼوو وەشەسیای بڕۊ. ئاخ گجار چن خەمێ پېسەو قەڵا کۊنێ سەرە ڕام گېرا، نمەیارو لاپاڵیچشانە ویەرو. خەمێ سەرەشا کەرڎەنە دڵیم و وەشیێم چەنە تۊریای، بە نەوەدڵی تەرکوو دیاریما کەرد و کەوتێمێ ڕا. بە چەمۍ نیمە تەڕېو سوارو ماشینی بییێمێ. دوې شارېما جیا ئاسێ. دڵما هاڵی بې، بەڵام هیچکامما نان نەویارێنمێ. بې‌دەنگ و مات نیشەێبێنمرە و واقێ بییێبێنمێ یۊترینیەرە. من دڵوەشی ئارامی دێناوە و ئارامیچ هێنوو من. چا یەرە مانگەنە هەر چن غەریویچەنە بېنمێ جە داروو خەماما وردە خەمێما هۊرپاچابێ و خەریک بې شێنەی شێنەی تاموو ژیوای نیمە وەشی چەشمێ. نیمەو ڕاینە وەرمم پۊرە کەوت. ئارام لامەنە نیشتەبێرە و ماشینەکە نەمدرا بې، بەڵام من پېسەو ویەرێبۊوە نەزانابێم. چا بېنە ئارام وەسەبێرە بڕێوە واردەمەنیێش سانای بېنې. بە خشەو دڵقەکەیش چڵاکنانیرە. واتش: چېوېوی بوەرە با دڵت نەلۆ لارە. چینەنە بېنې دڵقی واز کەروو تەق و پۆقێو کەوتەرە و ماشین کەوت مەلەق واردەی. دەسما کەرد قیژەو و هاوار کەرڎەی. ئڼە دنیای ڕۊشنەم دیە تاکو ماشینەکە دوې تلێش واردێ. کاتێ ئامانیوە هۊش پەشتەرە قەفای کەوتێنا و سرۆمە هێنا باڵموە و کزەو دەسیم مەی. لام کەردوە ئارام هەن پاڵو سەریمەنە و گرەوای گرەوۆ. چەمەش کەوت پەنەم دڵش پەڕ بی داش چېرو گرەوەی. چن ڕوێ بیمارستان وسنانیشا تاکو حاڵم تۊزیە خاس بی. کاتیە ئامانیوە وېمەرە دیم دوې دانێ پەنجېم نەمەنێنێ. کاتەبێ شێتە بوو. یاگێوەیچەنە شوکروو خوڎای کەرېنا و واچېنا خوڎاا شکور بۊ بە بەشیت کە هەنمێ. دەوێ نەفەرێ وەڵێ وېما و دوېچ پەشتەو سەرەیما مەردێبېنې. هەواڵ یاوابێ یانەو باوانیم چەنی هەسوورەیم ئامێ پەی هەواڵپەرسی، چن ڕوێ مەنێوە و لوایوە. باسشا گېڵنابێوە پەی هەسروېم. ئاڎیچە جاران زەنگ نەڎێ پەی هەواڵی، ئیسە بۊنەو ئانەیوە مەکی کەرۊ سەرو زاماو ئارامیەرە تایوە نە تاویوە زەنگێ دێ و ئارامی شێت کەرې پەی گیانیم. ئامان و تۊبەو ئارامی دێرە کە زاڕۆڵەتا نەبۊ ئاڎە نۆقسانە بییێنە و دمایی کەرۊش ملو تۊ مشۊم وەردەسی ئاڎېچی کەری. ئڼە ئارام پەیش عەزیز بییەبێ هەر نەبۊوە.
دیسان خەمێ تازێم کەلاوشا کەرد و ئاژینوو باخە بې بەرەکەو ژیوایم بییێ. چن مانگێم پۆوەشی و عاڎەتم کەرد بە دەسە نۆقسانەکەیم و هېزم وسوە جەسەی نیمە گیانیش. هەر چی هەرمانێ دلې یانەینێ و جە جارانیم وەشتەر کەرېناشا. ئارامیچ پەنەش وەش بې، بەڵام هەر کات زەنگش پەی دریایا حاڵش شېویێ. ژیوایم ڕەنگ و بۊ وەشیش گېرتوە و یانې وەشێما گېرتێ و واڕاماوە. بە دڵوو وېما کەل و پەلما سانا و مەرزیێمېرە. ڕوېما هەر پی شێوە ئێنێ و لوێنێ. منیچ چېوېم پەی ئارێنێ بەسەشا کەرېنێ پەی دووکاندارا و هەقەدەسم دێنێ. وەشما بې و ئارامیچ وەشحاڵ بې. دوې ساڵې جە ژیوایما لوا. ئارام هەرمانە کەرې و منیچ بەتاڵ نەنېشێنارە بڕېو پووڵما وسەبێ دماوە. لوا تەسێقوو شۆفێریش گېرت و بە قەرز و قوڵە ماشینېوەما سانا. دەسش خاس ئامەرە بە ماشینی و ئی جارەکېوە ئێتر بە ماشینوو وېما لوایمێ پەی سەفەری. ڕوێوەشا بە وەشی و وەش و کەیفوە گراڵەما گېرت و لوایمێوە پەی دیڎەنی. چن ڕوێ مانایمێوە من و ئارام خەموو وېما ویر شیەبێوە، چ مەگیرە هەرچی قەوموو کەس و کارمانەن مجیان ملمارە و بە تخالێ تخالێ کەرڎەی هەسروەمشا شێتە کەرڎېنە. لووتەش حەڼامەنە ترشناوە و دلېچەماش پېسەو هۆرو وەهاریش سەر ئاما. ئارامش کەرد پېسەو گڕی پەی گیانیم. مەرخەسیش تەمام بی و لوایمێوە پەی یانەو وېما، تاکو جارێو قسېش کەردایانې دە کەڕەتێ نەدۆنێم. شێتە بییێبېنې، زانێنا جار جار تەلەفوونېش پەی کریا. هەر کات ئامایاوە یانە تووڕەی تووڕە بې. جارێوشا ئاماوە یانە و بە لالووتێوە واتش: من دوې ڕوێ مەرەخەسیم گېرتەن یانەو فڵانەکەسی مەنیشی تاکو بەوە. هەر چی پەرسام پەی چێ جواوش نەڎانیوە. پەی دوې ڕوا لواوە دە ڕوېش پۆوەشی، منیچ بابەم تەلەفوونش پەی کەردانی و ئاما شۊنیم، دڵم لەرزا. واتش: ڕۊڵە گیان ئارامی واتەن چیگەنە هەرمانێما هەنې بەشکووم بلی شۊنیش باریشوە من کاتم نییەن.
نویستەی: گوڵزار شەریفی بېساران.[1]