جەژنا بێلندێ ( گورگەگا)
جەژنا بێلندێ یان ژی گورگەگا جەژنەکە پیرۆز و هەرە کەڤنارە یا #ئێزدی#ان، دکەڤیتە ئینیا دووێ ژ چلێ زڤستانێ ئانکو پازدە (15) ڕۆژان پشتی جەژنا ڕۆژیانە. ئەڤ چەژنە ب تایبەت گرێدای ڕۆژێ یە، ڤێ جەژنێ چەندین ڕێ و رەسمێن تایبەت هەنە لێ ب تایبەت ئەڤ جەژنە گرێدایی ئاگر و ڕۆژێ یە.
1- ل هێڤارا ڕۆژا چارشەمبوو جەژنێ نانەک تایبەت دهێت دروست کرن و دبێژنێ سەوک هەر مالەک وان سەوکا ل مالێن دەوروبەر و جیرانان بارڤە دکەت بۆ وێ مەبەستێ نانێ وان تێکەلی هەڤ بت و دلێ وان لێک خۆش بیت.
2- سەرەدانا گۆرستانێ: ل ڕۆژا چارشەمێ ل دەمێ سپێدێ هەر مالەک بەرەف گۆرستانێ دچیت شریناهی و چەندین خوارنێن کەلتوری دگەل خوە دبەن و سەرەدانا مریێن خوە دکەن.
3- گورگەگا: ئەڤ جەژنە گرێدایی ب جۆتیارییە، ل هێڤارا جەژنێ بەری ڕۆژ بچیت ئاڤا هەر مالەک ئێزدی ئاگرەک ژ ( ڕەشکێ ) ڕەشک جۆرەک ستریانە ژ ئاقارێ گوندان دئینن ژبەر کو ئاگرێ ڕەشکی ئاگرەک کێمە و بێ زیانە و ئەو ئاگر هیمایا ڕۆژێ و خێرێ و بەرەکەتێ یە، ئو نابیت چ جۆرە ئاگرێن دی بهێت هەلکرن لبەر دەرگەهێ ماڵا و زاڕۆکێن وی گوندی مال ب مال دگەڕن و هەمی مال شریناهیێ دسەر ئاگردە دهاڤێژن و هەر کەسەک سێ جاران خوە لسەر ئاگر دا دهاڤێژیت.
4- خەولێرە: ل شەڤا هێڤارا جەژنێ هەر مالەک ئێزدی نانەک تایبەت دروست دکەن ( ژبلی هۆزا دووملی ) کوو هندەک ژ نانێ ئاسایی ستور ترە و مێوژەک یان نافکەک زەیتون لناڤ وی نان دهێت ڤەشارتن، ل وێ شەڤێ مەزنێ مالێ دێ ڕابت ب پارچە کرنا وی نانی و پارڤە دکەت ل سەر ئەندامێن خێزانێ هەر کەسێ خەولێرە ژبۆ وی دەرچۆ ئەو نیشانا وێ چەندێیە کوو ئەو کەسێ ب خەڵاتێ وێ مالێ یە.
5- ل ڕۆژا جەژنێ : ل ڕۆژا ئینیێ جەژنە ل هندەک گوندان یان ژی دەڤەران وەکی هەموو جەژنا سەرەدانا مالێن هەڤ دوو دکەن و ل هندەک گوندێن دی مەزنێن وی گوندی لبەر خاس و چاکا ئامادە دبن لوێدەر شریناهی پارڤە دکەن و جەژنا هەڤدوو پیرۆز دکەن، هەر مالەک خوارنەک فلکلوری یا تایبەت چێ دکەت و خێزان هەموو لێک کۆم دبن. [1]