کام لای گوریسەکە بگیرێت؟
هێرشە ڕاستەوخۆکەی ئێران بۆ سەر ئیسرائیل بوێرییەکی زۆری پێویست بوو تا ئێران ڕاستەوخۆ هێرش بکاتە سەر ئیسرائیل ئەگەرچی سنووردار و بەپێی ئاگادارکردنەوەی پێشتریش بوو.
=KTML_Bold=ئێران:=KTML_End=
دوای هێرشەکەی ئیسرائیل بۆ سەر باڵیۆزخانەی ئێران لە دیمەشقی پایتەختی سووریا، بەگوێرەی بۆچوونی ئێرانییەکان چیتر بۆ ئەو وڵاتە نەدەگونجا لە ڕێی گرووپە چەکدارە توندڕەوەکانەوە وەڵام بداتەوە، چونکە هێرشکردنە سەر باڵیۆزخانە بە هێرشکردنی ڕاستەوخۆ بۆ سەر خاکی وڵاتی هێرشکراو ئەژماردەکرێت ئەگەرچی بەپێی هەواڵگری ئیسرائیل باڵیۆزخانەکە وەک بنکەیەکی سەربازی و کاری سیخوڕی بەکارهێنراوە، بەڵام ڕۆژگار دەیسەلمێنێت کە ئێران هەڵەشەیی و پەلەی کردووە لەو بڕیارەیدا.
* دەوترێت هێرشە ڕاستەخۆکەی ئێران بەپێی ڕێکەوتن و ئاگاداری پێشووتری ئەمریکا و ئیسرائیل کراوە، ئەویش بە مەبەستی پاراستنی شکۆی سەربازی و سیاسی ئێران کە چەندین جار لەلایەن ئیسرائیلەوە شکێنراوە و ئێران بە ناڕاستەوخۆ وەڵامی سنوورداری هەبووە.
* ئەگەر ئێران ڕاستەوخۆ هێرشی نەکرادایە چیتر لەلایەن هێزە هاوسۆزەکانییەوە لە دەرەوەی سنووری ئێران متمانەی ئەوەیان نەدەما کە ئێران توانای پاراستی ئەوانی هەیە، چونکوم ئەگەر ئێران توانای پاراستنی زەوی و خاکی خۆی نەبێت بێگومان توانای پاراستنی کەسی تریشی نابێت.
* ئەگەرچی باس لەوە دەکرێت کە ئێران لە ڕێی باڵیۆزخانەی سویسراوە نەخشە و کاتی هێرشەکەی گەیاندووەتە ئەمریکا و ئیسرائیل بەڵام ئەگەر ئەو گریمانەیەش لاوازبێت بەڵام ئێران بەردەوام لە ڕێی بڵاوکردنەوەی بەیانامە و ڕاگەیاندنە فەرمی و نافەرمییەکانییەوە ئاگاداری دەدا بە ئیسرائیل کە نیازی هێرشی هەیە، ئەوەش بە مەبەستی ئەوەی ئیسرائیل ئامادەسازی بکات و کەمترین زیانی بەربکەوێت چونکە ئێران و ئابوورییەکەی بەرگەی کاردانەوەی توندی ئیسرائیل ناگرێت.
* هێرشەکەی ئێران بۆ سەر ئیسرائیل بە شکستی ئەو وڵاتە کۆتای هات و سەرەنجام بۆ ئێران و هەموو هێزە هاوسۆزەکانیشی سەلمێندرا کە موشەکەکانی ئێران ناتوانێت بەسەر تەکنۆلۆجیای ئیسرائیل و هاوپەیمانەکانیدا زاڵببێت.
* ترسی ئێران لەو کارەی و کاردانەوەی ئیسرائیل و ئەمریکا هێندە زۆربوو هێشتا موشەکەکانی ئێران بە ئاسمانەوە بوون کە ئێران ڕایگەیاند ئەوان کۆتاییان بە هێرشەکە هێناوە ئەمەش ئەوە دەسەلمێنێت کە ئێران ئەوە دەزانێت کە تەکنۆلۆجیای سەربازی ئەو وڵاتانە توانای خستەنخوارەوەی موشەک و هێزە دەریایی و بۆردومانی فڕۆکە جەنگییەکانی ئیسرائیلی نییە.
* بەم کاردانەوە و هێرشە هەڵەشەیەی ئێران هاوکاری و سوودێکی زۆری بە ئیسرائیل گەیاند و جارێکی تر کردیەوە بە منداڵە خۆشەویستەکەی ڕۆژاوا.
=KTML_Bold=ئیسرائیل:=KTML_End=
ساڵانێکە ئیسرائیل بە چەندین هۆکار لە هەوڵی ئەوەدایە کە ئێران لە شەڕێکی ڕاستەوخۆ تێوەگلێنێت لەبەر چەند هۆکارێک:
* تا بتوانێت ڕاستەوخۆ هێرش بکاتە سەر پێگەی چەکە ئەتۆمییەکانی ئێران و کۆتایی بە دڵەڕاوکێی بەدەستهێنانی چەکی ئەتۆمی ئەو وڵاتە نەیارەی خۆی بهێنێت.
* تا جبەخانەی موشەک و فڕۆکە بێفڕۆکەوانەکانی ئێران پیشانی جیهان بەگشتی و بەتایبەتیی وڵاتانی کەنداو بدات کە ئێران چ جبەخانەیەکی کۆکردووەتەوە و چەندیش مەترسییە بۆ سەر جیهان بەتایبەتیی وڵاتانی کەنداو.
* ئیسرائیل توانی پشتگیری بێ مەرجی ڕۆژاوا و زۆربەی هەرەزۆری وڵاتانی جیهان بەدەستبهێنێتەوە و ئەوەش بۆ ئێران و هەموو ئەوانە بسەلمێنێت کە بەهەڵە لە لێکدانەوەیان بۆ پشتگیری مرۆڤدۆستانی جیهان بۆ خەڵکی سیڤیلی غەزە دەکرد.
* لە دوای هێرشە تیرۆرستییەکەی (#07-10-2024#)ی ئیسرائیل کار بۆ ئەوەدەکات بیسەلمێنێت کە بزووتنەوەی حەماسی فەلەستین باڵی ڕانەگەیەنراوی سوپای قودسی ئێرانەوە، بۆیە ئیسرائیل کار لەسەر ئەوە دەکات کە خودی ئێران ڕاپێچی جەنگێکی ڕاستەوخۆ بکات لەبری هاوسۆزەکانی، لەمەشدا سەرکەوتووبوو.
ئیسرائیل بێ وەڵام نابێت، چونکوم لەلای ئیسرائیل کار بە هاوکێشەیەک دەکرێت کە لاوازی بەواتای نەمان و کۆتایی ئەو وڵاتەیە بۆیە وەڵامیان دەبێت، ئێستاش کاتە گونجاو و ئاڵتونییەکەی ئیسرائیلە کە هێرشی ڕاستەوخۆ و بێ پەردە بکاتە سەر پێگە ئەتۆمییەکانی ئێران و تواناکانی ئەو وڵاتە بەشێوەیەکی بەرچاو لاوازبکات، هەر ئەوەشنا بگرە ئەگەر بەگونجاوی بزانن دوورنییە هێرش بکەنە سەر مۆڵگەی موشەک و فڕۆکە بێ فڕۆکەوانەکان و ژێرخانی ئابووری ئەو وڵاتە و توانای سەربازی و ئابووری ئێران بەشێوەیەکی بەرچاو لاوازبکەن بەڵام ئەم کارە بەبێ گڵۆپی سەوزی ئەمریکا نابێت و ناکرێت.
ئەگەرە بەهێزەکە ئەوەیە کە ئیسرائیل هێرشی سایبەری بکاتە سەر ئێران و لە ڕێگەیەوە زیانی زۆر و گەورە بگەیەنێتە ئێران و لەم کارەشدا پێویستی بە گڵۆپی سەوزی ئەمریکی نییە و لە هەمانکاتیشدا دەتوانێت کەڵک لە تواناکانی کۆی وڵاتانی هاوپەیمانی خۆی وەربگرێت بەبێ ئەوەی تووشی کاردانەوەی ئێرانیان بکات.
=KTML_Bold=USA:=KTML_End=
لەبەر ئەوەی ئەمریکا و وە بەتایبەتیی دیموکراتەکان و جۆ بایدن هەڵبژاردنیان لە پێشە کار بۆ ئەوە دەکەن کە کارلەکار نەترازێت و ئیسرائیل وەڵامی نەبێت، هەروەک چۆن لە پێشووتریشدا هەوڵی زۆریان دەدا کە ئیسرائیل هێرشی سنووردار بکاتە سەر کەرتی غەزە، چونکوم بەشی هەرە زۆری دەنگدەری عەرەب و ئیسلامەکانی ئەمریکا دەنگ بە دیموکراتەکان دەدەن بۆ نموونە ویلایەتی میشیگان، وە بەشێوەیەکی گشتیش بنکەی جەماوەری دیموکراتەکان دژی هەڵگیرسانی جەنگ و تیوەگلانی ئەو وڵاتەن.
لە ئەگەری تێوەگلانی ئەمریکا لە جەنگێکی ڕاستەوخۆدا لە بەرژەوەندی دیموکراتەکان و جۆ بایدن نییە و کارەکە لەبەرژەوەندی دۆناڵد ترامپ و کۆمارییەکان کۆتایی دێت، لەبەر ئەو هۆکارە لە ئێستادا تیمەکەی جۆ بایدن هەوڵێکی زۆردەدەن کە ئیسرائیل وەڵامی نەبێت، بەڵام:
ستراتیجی قوڵی ئەمریکا و بەرژەوەندی ئەو وڵاتە شتێکی ترە و لەسەرو جۆ بایدن و هەڵبژاردنەکانەوەیە و پاراستنی ئیسرائیل بۆ ئەوان پاراستنی ڕاستەوخۆی ئەمریکایە و نەمانی ئیسرائیل نەمانی کۆتایی بەرژەوەندییەکانێتی ئەو وڵاتەیە لە ڕۆژهەڵاتی ناوین و بگرە ئاسیا و بەشێکی ڕۆژهەڵاتی ئەوروپاش.
ئەمریکا و هاوپەیمانەکانی هیچ بژاردەیەکی تریان نییە جگە لەوەی کە پاڵپشتی سەربازی و ستراتیژی ئیسرائیل بکەن و شەوی ڕابردووش بەکردار ئەوەیان سەلمان.
ئەمریکا خودی خۆی هێرشی ڕاستەوخۆ ناکاتە سەر خاکی ئێران بەڵام چەند کارێکی تری زۆر گرنگ و یەکلایکەرەوە بۆ ئیسرائیل دەکات، لەوانە:
1. هێرش دەکاتە سەر هەر هێزێکی هاوسۆزی ئێران کە بیانەوێت زیان بە ئیسرائیل بگەیەنن.
2. سنووری ئیسرائیل دەپارێزن و ڕێگەنادەن هیچ موشەک و فڕۆکەیەکی بێ فڕۆکەوان ببێتە هەڕەشە بۆ سەر ئاساییشی ئیسرائیل.
3. چەک و جبەخانەی زۆر و بەهێز و نوێترین تەکنۆلۆژی ئەگەیەننە ئیسرائیل کە دەبێتە هۆکاری یەکلاکەرەوە لە ئەگەری هەڵگیرسانی جەنگی ڕاستەوخۆیدا.
4. درووستکردنی هاوپەیمان دژی ئێران و توندکردنەوەی گەمارۆی ئابووری لەسەری.
=KTML_Bold=G7:=KTML_End=
کۆی ئەو وڵاتانە پشتگیری خۆیان بۆ ئیسرائیل ڕاگەیاند و ئەمەش هەنگاوێکی ترە کە بەسوودی ئیسرائیل و شکستی ئێران دەشکێتەوە، ئەمە لە کاتێکدایە کە پێش هێرشیکەی دوێنێ شەوی ئێران بۆ سەر ئیسرائیل کۆی ئەو وڵاتانە هەڵوێستێکی جیاوازتریان هەبوو بەرانبەر شێوازی مامەڵەکردن و جێبەجێکردنی پلانی سەربازی ئیسرائیل لە غەزە، بەڵام کوورتبینی ئێران ئەم هاوکێشەیەی پێچەوانە کردەوە و گەڕانییەوە سەر ڕێچکەی پێشوو و هەمیشەیی خۆی.
=KTML_Bold=وڵاتانی کەنداو:=KTML_End=
وڵاتانی کەنداو بەتایبەتیی سعودییە سیاسەتێکی زۆر زیرەکانە پەیڕەودەکەن و خۆیان تێوەناگلێنن.
سعودیە، ئیمارات، بەحرەین، عومان و کوەیت تا ئاستێک یەک ستراتییژ و یەک سیاسەتیان هەیە و لەسەرەتای هێرشە تیرۆرستییەکەی حەماسەوە بۆ سەر خەڵکی سڤیلی ئیسرائیل ئەوان بێدەنگن، ئەگەرچی ناوبەناو سەرکۆنەی کوژرانی خەڵکی سڤیل دەکەن لە کەرتی غەزە بەڵام هیچ کاردانەوەیەکی وایان نییە بەرانبەر ئیسرائیل کە ببێتە هۆکاری خراپبوونی بەرژەوەندییە هاوبەشەکانیان لەبەر چەند هۆکارێک:
1. ئەوان بزووتنەوەی حەماس، حیزبوڵای لوبنانی، حووسییەکانی یەمەن و هێزە شیعیە یاخییەکانی ئێراق بەباڵی سەربازی ئێران دەزانن و ئێرانیش نەیاری سەرسەختی ئەو وڵاتانەیە و سەرکەوتنی ئیسرائیل لە بەرژەوەندی ئەوانیشە.
2. حەماس، حیزبوڵای لوبنانی، حووسییەکانی یەمەن و هێزە شیعیە یاخییەکانی ئێراق چەند هێزێکی ئیسلامی جیهادین کە ئەوان بە نەیاری بەرژەوەندییە سیاسییە ناوخۆییەکانی خۆیانی دەبینن.
3. بەهێزبوونی ئێران بەواتای لاوازی ئەوانە.
4. سەرکەوتنی ئێران دەبێتە هۆکاری دەستبەسەراگرتنی سنوورە ئاوییە هاوبەشەکان و سەرەنجام پاشەکشێی ئابووری ئەو وڵاتانەی لێ دەکەوێتەوانێ.
5. ئاشتی لەگەڵ ئیسرائیلێکی بەهێزە بۆ ئەوان گرنگتر و ستراتیژی ترە لە ئێرانێکی نەیاری شیعی و دژ.
6. وڵاتانی کەنداو ئامادەنین دەست لە پڕۆژەی ئاشتەوایی ئایینە ئیبراهیمییەکانی نێوان ئەوان و ئیسرائیل هەڵبگرن و بگەڕێنەوە چوراگۆشەی یەکەم.
=KTML_Bold=ڕووسیا:=KTML_End=
ڕووسیا گەورەترین سوودمەندی کۆی ئەم هەموو پشێوی و جەنگە نەخوازراوەی ناوچەکەیە چونکە سەرنجی کۆی جیهان لە ئۆکرانیاوە گواستراوەتەوە بۆ ئیسرائیل-غەزە و ئێران. لە ئەگەری فراوانبوونی جەنگەکەدا ڕووسیا دەستی واڵادەبێت کە جەنگی ئۆکرانیا-ڕووسیا لە بەرژەوەندی خۆی کۆتایی پێ بهێنێت و هەژموونی خۆی بەسەر ئەوروپادا بسەپێنێت.
=KTML_Bold=هەرێمی کوردستان:=KTML_End=
ئەزموونەکان ئەوەیان سەلماندووە کە کورد و کوردستان هیچ بەرژەوەندییەکی ستراتیژی و درێژخایەنی لەگەڵ هیچ وڵاتێکی هەرێمی و نێودەوڵەتیدا نییە بەڵکوو کۆی ئەو وڵاتانە کورد و خاکەکەشی لە بەرژەوەندی خۆیان بەکاردەهێنن، بۆیە گرنگە کورد بە دوورییەکی یەکسان لە کۆی لایەنەکانی ئەو جەنگانە بوەستێت و بگرە هەوڵ بدات باشترین پەیوەندی لەگەڵیاندا هەبێت و کاربکات بۆ درووستکردنی بەرژەوەندی ستراتیژی بە جۆرێک کە زلهێزەکان و وڵاتانی هەرێمی پاراستنی کورد و کوردستان بە بەشێک لە ئاساییش و بەرژەوەندی خۆیان ئەژماربکەن، نموونەی ئەوەی وڵاتانی ڕۆژاوا بۆ ئیسرائیلی دەکەن.
گرنگە کورد بەگشتی، بەتایبەتیی هەرێمی کوردستان لەناوخۆیدا یەک و یەکگرتووبێت و دەست بە ناوەڕاستی گوریسەکەوە بگرێت.
#سامان بەکر (سامانی وەستا بەکر)#
#14-04-2024#
سوید-ستۆکهۆڵم [1]
=KTML_Link_External_Begin=https://www.kurdipedia.org/docviewer.aspx?id=565644&document=0001.PDF=KTML_Link_External_Between=کلیک بکە بۆ خوێندنەوەی کاملای گوریسەکە بگیرێ؟ بە شێوەی پی دی ئێف=KTML_Link_External_End=