نڤیسەر: مڵلەت محەمەد
2019
ل کارەکێ ئێکانە ژ ڤی جوری ل دەڤەرێ و پشتی کارەکێ زۆر و زەحمەت و وەستیانەکا مەزن نڤیسەر مڵلەت محەمەد ڕومانا “گەشتا داعشێن فۆراتێ” ب زمانێ کوردی و ب زارێ بادینی بەلاڤکر .
ئەڤ رومان دوو تەوەرێن سەرەکی بخۆڤە دگریت، تەوەرێ ئێکێ ل دۆر رێکستنا داعش یا تیرورست و تاوانێن وی یێن کرێت ل دەرحەقێ سڤیلا ل چەرخێ بیست و ئێکێدا ئەنجام دایین و لپێش چاڤێن جیهانێ تەڤێ ،و تەوەرێ دووێ ل دۆر کومەلگەها بادینا و تایبەت دەڤەرا دهۆکێ.
چیرۆکا ڕومانێ دوو کارێکتەرێن سەرەکی بخۆڤەدگریت و ئەوژی کچەکا ئێزدی یە کو کەفتیە دەستێ رێکخستنا داعش یا تیرورستی و باس ل وان تاوانێن داعشێ دکەت یێن کو دگەل کچێن ئێزدی ئەنجامداین ژ شنگال بو ڕەقە ل سوریێ و هەروەسا کچەکا موسلمان یا ژ رۆژئاڤایێ کوردستانێ ئانکو کوردستانا سوریێ کو پەنابەرە ل هەرێما کوردستانا عیراقێ و کەڤتیە ل بەر پێلێن جڤاکی.
ل دیدارەکێ دا “مڵلەت محەمەد” بۆ “ئێزدی 24” گۆت “پێش ھزر د نڤیسینا ئەڤێ پەرتووکێ دا بکم، من دیت کو چ نڤیسکارەکێ بەھدینان خوە ل ڤێ پرسێ نەکریە خودان، سەرەڕای وێ چەندێ کو پرانییا جەنگێ داعش و تاوانێن وان ژ بو لایێ مە بەھدینان بوو ب تایبەت تاوانێن دگەل ئێزدیان ھاتینە ئەنجامدان. کو ھندەک جورە تاوانبوون وژدانا مروڤایەتیێ د ھەژاند. لەوڕا من ب فەر زانی وژدان و ھزر و ھەستێن خوە وەکوتاکەکێ ڤێ کومەلگەھێ تێکەلی ڤی بابەتی بکم و ھندەک پرسێن گرنگ ب ئازرینم و ڕوویەکێ دی ئاشکرا بکم و ئەڤە بۆ یا کو من ل 176 لاپەری دا کری”.
هەروەسا گۆت “بابەتەک ھوسان کو تا نوکە ژی پرسگرێکا ھەرە مەزن یا ڕوژھەلاتا ناڤینە، ھەلبەت دخوازم ب ڕێکا خواندەڤانان و ڕەخنەگران بگەھت جیھانێ گرنگە و پێدڤییە ھەر مرۆڤەک د کارێ خوە دا خەباتا خوە بکت لێ ب مەرجەکێ ب ڕاستگویی بزانت ئەو کارێ دکت بزانت یێ وی یە”.
“ب شێوەیەک گشتی ھەر دەم ھزرێن ئازاد و جیاواز بەرھەنگاری ئاستەنگ و ڕێگریێ نە، لێ خوە ڕاگرتن و بەردەوامبوون سنورێن ڕێگریێ دشکێنن، ھەگەر ھندەک ڕێگری ھەبت یا بو من بوویە پالدەر کو ل سەر ڕێکا خوە بەردەوامبم و پێنگاڤێن باشتر بھاڤێژم” ئەڤە بوو یا کو “محەمەد” ل داویا ئاخفتنا خو دا ژ بۆ “ئێزدی 24” گۆتی.
دهێتە زانین کو نڤیسەر “مڵلەت محەمەد” ژ دایک بوویێ سالا 1990ە و ب نڤیسینا هۆزانێ دەست ب نڤیسینێ کریە هەتا کو گەهشتی رومان و پەرتووکا ب زمانێ کوردی و ئەوی رومانا (ئاخبرینوس) ژی هەیا و دیوانەکا شعری.