نامې: سدېق
نازنام: بابایی
ڕۊ پېڎابییەی: #23-09-1951#ز.
یاگۊ پېڎابییەی: #پاوە# _ هۆرامان
$ژیۋاینامە$
نامېش سدېق، نارنامش بابایی، تاریخو (#23-09-1951#ز.) جە شارو پاوەی، هۆرامانو وەرکۆتی ئامان پېڎا. هەر ئەچاگە وانای سەرەتایی و میانیش تەمامنان، دماتەر پەی گېرتەی بڕوانامەی بەرزی لوان پەی شارو کرماشانی، چاگە دیبلومش گېرتەن. دماتەر گېڵانۆ پەی پاوەی و پېسە فەرمانبەرو میری مەرزیانەرە.
سەرەتاو خېزیای خەڵکی وەرانوەر بە دەسەڵاتی پاڎشایی جە ئێران، بۊنەو چالاکی مەدەنی بە ئەندامو شووراو شارو (پاوە)ی، هۊرچنیان.
دمای فتواکې خومەینی 28 گەلاوېژ 1979ز. پەی هۊتەرە بەرڎەی پاسدارا جە تاران و ئێران پەی سەرو کورڎەسانی، بە نیازو داگیرکاری و قەتڵ و کوشتاریشان، ناچار شاری جیامازۊ و پەی داکۊکی کەرڎەی جە مافەکا خەڵکی، دلې ڕیزو پېشمەرگەکا (حېزبو دیمۆکراتو کورڎەسانی)نە، یاگې مەگېرۊن. دماو چڼ مانگا جە هۆرامان مەلۊ مەهاباڎ لاو سەرکردایەتی حېزبو دیمۆکراتو کورڎەسانی.
سدېق بابایی، ماوەو کۊششی چەکداری و وەرگیرینە ئەرکو ڕاوەبەری ئی یاگاشە گېرتەن گەردەن:
ساڵۊ (1980 و 1981ز.) ڕاوەبەری کۊمیتەکا حېزبی جە تکاب و سایین قەڵا (هەوشار). ساڵۊ (1982ز.) ئەندامو کۊمسیونی کۊمەڵایەتی و وەرپەرسو بەشو شواراکا کوردەسانو (حېزبو دیمۆکرات). ساڵۊ (1983ز.) ئەندامو ڕاواچکارو میانی حېزبی و ڕاوەبەری کۊمیتەکا کرماشان و کامیارانو حېزبو دیمۆکراتی. ساڵۊ (1984و 1985ز.) ئەندامی مییانی حېزبی و ڕاوەبەری کۊمیتەی حېزبی شارەسانو پیرانشاری (خانێ)، ساڵۊ (1986 و1987ز.) ئەندامی مییانی حېزبی و ڕاوەبەری کۊمیتەو شارەسانو مەهابادی. دماتەر ساڵۊ (1990ز.)یاوان وەڵاتو ئەڵمانیای، پېسە پەنابەری چاگە مەنەنۆ.
سدېق بابایی شارەزایی و تەواناو قسەکەرڎەی و نۋیستەیش بە زۋانا هەن: کوردی -هۆرامی، -سۆرانی، -کەلهوڕی و زۋانی فارسی و زۋانی ئاڵمانی.
کۆتا وەرپەرسیاری ڕامیاری سدېق بابایی:
تەلەفزیۆنو تیشکی جە فەرانسە ساڵۊ (2006 و 2007ز.)، پېسە ڕاوەبەری ڕامیاری کاناڵەکەی جە پاریس. دماتەر مەگېڵۊوە ئاڵمانیا. ئی کاراکتەرە سیاسییە، بەدەر جەبابەتە جۊراوجۊرەکان، پەی ڕۊنامە و گۊوارە کورڎی و فارسییەکان، ئی بەرهەمېشە چاپ و وەڵێ کەردېنێ:
* مەم و زین بە هۆرامی (دەسنویسی کۊن) بە ڕانویسی تازە.
* کەنوڵە تارېخ، بە هۆرامی.
تیرۆر از هەخامنشی تاکو خامنەای (بەڵگەنامە) بە زوانی فارسی کە جە سلېمانییە جاریوتەر بە نامې (ترور دولتی) چاپکریان.
* کۊمەڵە پاچاڵ (حەکایەت)، بە ئاڵمانی، سۆرانی و هۆرامی، کە زیاتەر جە سەڎ ساڵا وەڵتەری، ئۆسکارمانی ئاڵمانی گلېرې کەردېبېنێ.
* دیمەنەکانی هۆرامان (وێنەگر ڕەحمەتی باقی سەفاری) و چەن تاییبەتمەڼی کوردستان بە ئاڵمانی و هۆرامی و سۆرانی.
* بەرهەمە تازەکې: هاڵ ( ڕۆمان) کە کردې و ئەتوارې ئاساییشییە واتە ژاندارم جە هۆرامان سەردەمېو ڕەزاشا و کوڕەکەیش شیکاری مەکەرۊ.
* کۊمەڵە ڕازې کورڎی، کە خاتوونێ ئاڵمانییە بە نامې لوئیزە شارلۆتە، زووتەر یاوناینېش ئاڵمانیا، بە ئاڵمانی و سۆرانی گنان وەرچەمو وانیارانی.
سدېق بابایی، کۊششکارێ ڕامیاری و فەرهەنگی هۆرامانو وەرکۆتییەن، ئاڎ پەی چڼیین ساڵا هەم دلې خاکو ئێرانینەو هەم بەرو ئێرانیۆ سەرەمڕە حۆلېش دێنې مەسەلې نەتەوەکەیش بشناسۊ بە جەهانی، تاکو پەیش لېویابۊ دلې وەڵاتو وېشەنە کۊششی ڕامیاریش وستەن ڕا، خەڵکش هوشیارکەرڎەنۆ و جەمېش کەردېنێ پەی یەکدەنگی جە بەدەسئاوەردەی مافەکاشان، پەی ئا مەرامەیچە کۊشش فاڕانۆ پەی بەشێ جە ناوچەکانو کورڎەسانی، چکۊ پەیش لېویابۊ، چاگە مڎرامانش کەرڎەن و لوان گژې داگیرکەریرە. دمای ئانەی مێڎانو کۊششیش وەردەمەنە وەرتەسک بیەنۆ، ڕاو ئاوارەییش گېرتېنەو چاگەیچ کۊڵش نەڎان و بە قەڵەمەکەیش دلې ڕۊنامەکانە دەنگو خەڵکی ستەمدیڎەو هۆرامانی و کورڎەسانیش یاونێنە ئازاڎیوازاجەهانی.
پاڵو کۊششی ڕامیاریشەنە ئاگاش جە فەرهەنگ و ئەدەبو میللەتەکەیچش بییەن، شۊنیرە لوان پەی گلېرکەرڎەیۆ ئا کەلتوورە ڕەسەنەیە کە سەردەمانێ دلې سەرزەمینو کورڎەسانینە باڵا بییەن، جەمش کەرڎەن و چاپشدان. ئی کۊششکارە ڕامیار و نویسەرە، تاکو ئارۊیچ قەڵەمەکەش بە پېزەن و ئینا خزمەتو مەسەلې ڕەواو نەتەوەکەیشەنە، ئاواتش ئانەن هۆرامانی بە سەربەرزی و هۆرامییەکا بە ئازاڎی بوینۊن، تەمامو خەڵکو کورڎەسانی بیاوان بە مافە ڕامیار و فەرهەنگی و کەسیەکاشان، پەوکەی بەبې مانیای ئینا ڕاو ئا ویر و باوەڕیشەنە.
ئەسعەد ڕەشید. [1]