خەندان- ئاسۆ شەیدا
بەڕێوەبەری گشتی کاروباری ئێزیدییەکان ڕایگەیاند تائێستا 3398 کوردی ئێزیدی لەژێر چنگی #داعش#دا ماون و ڕزگارنەکراون، ووتیشی لەو ژمارەیە 1655 یان لەرەگەزی مێ- ن و 1743 یان نێرن.
بەگوێرەی ئەو ئامارانەی دەست خەندان کەوتوون، ژمارەی کوردانی ئێزیدی پێش هاتنی داعش لەعیراقدا و تارۆژی 3ی ئابی 2014، 550 هەزار کەس بوون، دوای داعشیش نزیکەی 360 هەزار کوردی ئێزیدی لەناوچەکانی خۆیان ڕاگوێزران و 90 هەزاری تریان کۆچیان کردووە.
خەیری بوزانی بەڕێوەبەری گشتی کاروباری ئێزیدیان لە وەزارەتی ئەوقافی حکومەتی هەرێمی کوردستان بەخەندان-ی ڕاگەیاند، دوای کۆنترۆڵکردنەوەی شەنگال، نزیکەی 43 گۆڕی بەکۆمەڵی کوردانی ئێزیدی دۆزراونەتەوە جگە لە سەدان گۆڕی تاکە کەسی.
بوزانی ووتیشی 6417 کوردی ئێزدی لەسەر دەستی چەکدارانی داعش فڕێندراون، لەو ژمارەیەش (3547- مێ و 2871- نێرن)، ئەوەشی ڕوونکردەوە کەتائێستا 3019 فڕێندراو ئازاد کراون کە (1083- مێ و 334- نێر)ن و 808 یان منداڵی کچن و 793 یان منداڵی کوڕن.
بەڕێوەبەری گشتی کاروباری ئێزیدیان لە وەزارەتی ئەوقافی حکومەتی هەرێمی کوردستان ئاماژەی بەوەشکرد کە لەو کاتەی شەنگاڵ لەژێر کۆنترۆڵی چەکدارانی داعشدا بووە، 68 مەزارگەی کوردانی ئێزیدی خاپوور کراون.
رۆژی 3ی ئابی 2014 قەزای شەنگال لەلایەن چەکدارانی داعشەوە کۆنترۆڵکرا، و لەماوەی مانەوەیان لەو قەزایەدا چەندین تاوانیان دژ بە دانیشتووانەکەی ئەنجامدا.
ڕۆژی 13ی تشرینی دووەمی 2015 ش ئەو قەزایە لەلایەن هێزی پێشمەرگەی کوردستان و بەپشتیوانی هاوپەیمانی نێودەوڵەتی دژ بەداعش کەلەلایەن ویلایەتە یەکگرتووەکانی ئەمەریکاوە سەرپەرشتی دەکرێت کۆنترۆڵکرایەوە.
12-06-2017