وەشڵەی پەشیمانی شاخېش بېیێنۍ
نویستەی: #ئاکۆ مارانی#
دەردیدڵ چنی هامدەردیۋۍ
یاۋەری ئازیز، گەنجی و ڕەنجو ئېمە بی بە دەسمایە پەی ڕەنجوەرا؛
من هەر دەم ۋاتەنم ئەر ساڵەو (1961ز) چەک پەی چەکی پەنانەبریێ و ساڵەو (1974ز) و (1976ز) جەنگ هۊرنەگیرسیێۋە، یەرۍ هەزارۍ دەگۍ بارنەکریېنۍ، هەزاران گەنجۍ ئازاڎیوازۍ جوانەمەرگۍ نەبېنۍ، جەنگو ئێران-ئێراقی ڕوەنەڎۍ و ملێۆن ملێۆن ئێراقییۍ و ئێرانییۍ نەکوشیېنۍ و پەککۆتۍو دیلۍ نەکریېنۍ، کیمیاۋان و ئەنفالۍ و کۊڕەۋ ڕوەنەڎېنۍ، پەلامارۍ هامپەیمانە ملهوڕەکا ئەمەریکای و ئۆرووپای پەی سەرو ئێراقی ڕوەنەڎېنۍ، چەکی یۆرانیۆمی و لێزەری تاقییۍ نەکریېنېۋە، چە ماوەو 23 ساڵۍ ۋېیەرڎەینە دەسەڵاتدارۍ ئێرانی و تورکیەی نەتاۋېنۍ دەگا مەرزییەکا تۊپۋاران کەرا و پەی سەرو هەرېمی هورووژمۍ بارا و ژیۋارو هەرېمی پیس و ۋیران کەرا، سامانو هەرېمی تاڵا کەرا، کولتوورو ئوسمانیی و کەمالیزمی چە هەرېمەنە تەشەنە پنە کەرا، داعېش نەتاۋۍ واڵە و براڵە ئێزیدییۍ و شەبەکۍ و کاکەییۍ و مەسېحیەکاما کۊمەڵکوژۍ کەرا و حەزارەتو ئێراقی شېۋنا، لای سەری گرڎو ئانیشاۋە دەگێ و باخەکېما ۋېرانۍ نەبېنۍ، زاڕۊڵەیی و گەنجیی ئېمە سەرگەرڎانۍ شارا و وڵاتا نەبېنۍ و چە هامسایا و هامپۊلا و هامکارا و یارا و یاۋەرا وېما نەبڕیېنمۍ و ئاستو وەنەی و زانایی و هۊشېیاری گرڎو بېدەسەڵاتا ئێراقی نەۋەزېرە و نەبېنمۍ بە سواڵکەرۍ یوئێنی و پەنابەرۍ جەهانی، ...تد تەنانەت ئەر دەسەڵاتو بەعسییەکاچ مەنەبېیێ، چە ئیسەی خاستەر بۍ، چوونکە ڕادەی کەم گەنجی و دەگێ و وەنەی و پەیۋەڼییە کۊمەڵایەتییەکاما چە دەس نەڎېنمۍ، هامدەردی ئازیزم، ئەر گەنجۍ پېسە من و تۊ و ئەۋیسا تەری بە چەکی و ڕامیاریی وەشباۋەڕۍ نەبېیێنمۍ، ملهوڕەکۍ ئیسەی کەس نامېشا نەزانۍ، ئاخ وەشڵێ پەشیمانی شاخېش بېیێنۍ، قلیچکەش زنیێ، ئاسمانەنە پېسەو ڤیدیۆی نیشان دریابېیێ، بەدڵنېیایی شاخۍ و قلیچکەو من ڕیکۊردی جەهانی بڕېنۍ.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 477 جار بینراوە
ڕای خۆت دەربارەی ئەم بابەتە بنووسە!