پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: سی و ششەمە
نوستەی: #ئیبراهیم میکە عەلی#
هۆرامان سەردەمو ئەرەمەرزیای دەوڵەت نەتەوەینە
دمای هەر دوە جەنگە جەهانیەکا و نەمەنەی دەسەڵاتو ئیمپراتوریەتو فارس و ڕوٙمی و بەش بەش کەردەی ناوچەو وەرکەوتی دلیٛڕاسینی پەی چڼ دەوڵەتێوە، دمادمایی سەدەو نوٙزدەی و سەرەتاو سەدەو ویسینە هۆرامانیچ بەش کریا ملو هەر دوە دەوڵەتو ئیٛراقی تازە دروس بېیەی و ئیٛرانیرە، ناوچەو ژاوەروٙی بە گردیی و فرەو ناوچەو لهوٙنی و تەختیچ کەوتیٛ وەرو ئیٛرانی، بەشێوە جە لهوٙنی و بەشێوە جە تەختیچ کەوتیٛ وەرو ئیٛراقی.
ئی بەشکەردەیە هەروەرەنە خەڵکو ناوچەکەیش بڕیرە جە یوترینی و چەنی بەقوەت بېیەی دەسەڵاتو دوە دەوڵەتە تازەکەی و مەڕیای زوٙریشا ملو خەڵکو سەرحەڎەکارە، وەریٛسەو زوڵمیچشا قایمە بیە هەتا پاسەشە سەر ئاما ڕابڕانیشا وست میانو دوە بەشەکەو هۆرامانی و خجڵا وچیوٙ خەڵکەکەیچش جەیوترینی غەریبیٛ کەوتیٛ.
هۆرامیەکیٛ و بەتایبە دەگا نزیکەکیٛ هەردوی دیما پەی ماڕای ئا سەرحەڎە دەسکردا هەکە زاڵما کیٛشتیٛبیٛنیٛ، بە دزیی مەرزوانەکا و چەمدارەکاشاوە شەویٛنە و وەخت و ناوەختەنە سەردیٛنیٛ یوٙترینی و نازیٛنیٛ کەلەبەرە گنوٙ میانشا، پا جوٙرە وەختشا گوزەرنا هەتا ساڵەو (1978ز) هەکە دەسەڵاتو ئاوەختەو ئیٛران و ئیٛراقی وەڵتەر ساڵەو (1975ز) ڕیٛککەوتەیېوەشا موٙرەکەردەبۍ پەی مرکنارەی کوردەکا و یوٙ جە بەرکەوتەیەکا ئا ڕیٛککەوتەیە ئانەبیٛ هەکە بە قوڵیی (15) کیلوٙمەترا دیمو ئیٛراقیۆ سەرحەڎەکیٛ چوٙڵیٛ کریا و دەگا مەرزیەکیٛ بە زوٙر بار کریا و ئوردوگێ زوٙرەملیٛنە گلیٛریٛ کریاوە.
پاییزو ساڵەو (1978ز) ینە ئا پیلانیٛ سەرانسەرو کوردەسانینە و بە دریٛژی مەرزو میانو ئیٛرانی و ئیٛراقینە بریا ڕاوە و هۆرامانو دیمو ئیٛراقیچ بیٛجگە شارەکڵەکاو تەویٛڵیٛ و بېیاریٛ و دەگاو ئەحمەڎ ئاوای، حیچ دەگێوەش سەرو پەیاوە نەمەنە و گردو دەگایەکا تەختیٛ کریێ و هەرچی شوٙنەمێ و دەسکردو قەدیمیاما بیٛنیٛ گرد دلیٛنە شییٛ و خەڵکەکەو هۆرامانیچ گرد ئاوارەو شارا کریا و بە ناچاریی و بە زوٙری زوٙرداریی دەسەڵاتو حزبو بەعسی عەرەبی نیشتەجاو ئوردوگایا کەردیٛ و گردشا گلیٛریٛ کریېوە ئوردوگایەکاو: خورماڵ، عەنەبە، زەمەقی، سیروانی و هەتا ساڵەیچشا گیٛڵاوە ملەرە حیچ جوٙرە خزمەتگوزاریېوە پیٛسەو ئاوەو واردەی و ئاوەروٙی و بڕێ یاگیٛنە کارەبایچشا نەبیٛ و ئوردوگاکیٛچشا بە نوختیٛ پاسەوانیی و سەروازیٛ عەرەبیٛ پەڕچین کەردیٛبنیٛ و نازیٛنیٛ مەشی باڵیٛ شانوٙ و ئاموٙشوٙ کەردەی دەگایەکایچشا و چنیەیۆ سەمەرو باخەکایچشا تاوانێوەبیٛ حەرکەس سەرش گیٛریابیێ جەزاش قەنارەدایبیٛ.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 250 جار بینراوە
ڕای خۆت دەربارەی ئەم بابەتە بنووسە!