ڕێکەوتی 21ی سەرماوەزی ساڵی 1359ی هەتاوی لە گەڕەکی چەمی وەڵی خان و لە ماڵی سەکینە خانم هەڵکەوتوو لە تەکیەی شێخ عەبدولکەریم کە#سنە#زانی و لە نێو بنەماڵەێکی عیرفانی ئەم شارە لە دایک بووە.
وریا کوڕی گەورەی وەستا محیەدین فەرەجی و کوڕەزای حاجی خەڵیفە سەلیم فەرەجی یەکێک لە شاعیران و مەداحانی گەورەی کوردستانە کە لە زۆربەی ڕێوڕەسمەکانی مەولوودنامە، مێعراجنامە و وەفاتنامەکانی #سەقز# بەشدار بووە و بە هۆی ئەوەی کە باوک و مامەی ناوبراویش خەڵیفە ئەحمەد فەرەجی لەم ڕێوڕەسمانەدا بەشدار بوون، وریا بەرەو عێرفان ڕاکێشراوە و دواتر هۆگریی بە ئامێری دەف پەیدا کردوە.
دەسپێکی کاری هونەری ناوبراو لەگەڵ ئامێری دەف بۆ قۆناغی سەرەتایی قوتابخانە ئەگەڕێتەوە و ئەو کات ماڵی ئەوان لە شەقامی سەعدی هەڵکەوتبوو و باوکی سەرەتا وریای بە مەبەستی فێرکردنی ئامێری زەرب بۆ لای هونەرمەند عەلی تاهێری ڕەوانە ئەکات و وریای بچکۆلانە سەرەڕای تەمەنی کەمی خۆی بۆ ماوەی پێنج ساڵ لەوێ سەرقاڵی فێربوونی مۆسیقا بە شێوازێکی زانستییانە ئەبێت.
سەرەتا بە هۆی کاڵ و کرچی و تەمەنی کەمەوە فێربوونی هەموو شێوازەکانی ژەنینی ئەم ئامێرە بۆ ئەو دژوار ئەنوێنێت، بەڵام پاش تێپەڕینی چەندین ساڵ وریا بە باشی بەسەر ئامێرەکەدا زاڵ ئەبێت و لە ساڵی 1368ی هەتاوی و لە تەمەنی 8 ساڵیدا بۆ یەکەم جار لەگەڵ بەڕێز ئازاد میرزاپوور لە شاری بانە ئەچێتە سەر شانۆ و ئەمە یەکەمین ئەزموونی وریا لە بواری هونەریدا ئەبێت.
ناوبراو قۆناغی سەرەتایی قوتابخانە لە خوێندنگەی وەحدەت تەواو ئەکات و ساڵی 1370ی هەتاوی بۆ قۆناغی ناوەندیی ئەچێتە قوتابخانەی 22ی ڕێبەندان و لە ساڵی دووهەمی ناوەندییدا لە گرووپی سروودی قوتابخانەکەیاندا بەشداری ئەکات و ئەتوانێ پلەی یەکەم لە ئاستی سەرجەم قوتابخانەکانی شاری سەقز مسۆگەر بکات.
لە قۆناغی ناوەندیی دا زۆرتر ئاوێتەی مۆسیقا ئەبێت و لە بواری فکریشەوە باشتر خۆی تەیار ئەکات و ئەو هەستەی لا درووست ئەبێت کە ئەبێ بە شێوازێکی زانستییانەتر درێژە بە کاری موسیقا بدات. هاوکات لەو ساڵانەدا هاوڕێ لەگەڵ باوەگەورەی، لە زۆربەی مەولوودنامەکانی سەقزدا بەشدار ئەبێت و وردە وردە هۆگریی بە ئامێری دەف پەیدا ئەکات و ساڵی 1374ی هەتاوی بە کردەوە دەست ئەداتە دەف زەنی و تا هەنووکە درێژە بەم هونەرە ئەدات.
هونەرمەند وریا فەرەجی هەنووکە لەگەڵ کۆمەڵێک گرووپی جیاواز، وەک: گرووپی عێرفان بە سەرپەرەشتی باوکی، گرووپی حەیران بە سەرپەرەشتی ئارش خورشیدی، گرووپی هۆرە بە سەرپەرەشتی عەلی تاهێری، گرووپی لاوانی لاوژە بە سەرپەرەشتی سیامەک عەبدوڵڵایی، گرووپی ژیار بە سەرپەرەشتی عەلا نەباتی و چەندین گرووپی دیکەی هونەری هاوکاری دەکات.
لە بواری کار و چالاکییە هونەرەییەکانیدا جگە لە بەدەست هێنانی کۆمەڵێک پلەی جیاواز لە قۆناغەکانی سەرەتایی، ناوەندیی و دواناوەندیی ئەم چالاکییانەی خوارەوەی بەڕێوەبردوە:
1 ساڵی 1382ی هەتاوی لە فستیڤاڵی لاوانی ڕۆژئاوای ئێراندا بەشداری کردوە و هاوڕێ لەگەڵ گرووپەکەی پلەی هونەری بەدەست هێناوە.
2 ساڵی 1383ی هەتاوی لە فستیڤاڵی مۆسیقای کوردی بەشداری کردوە.
3 ساڵی 1384ی هەتاوی پلەی یەکەمی لە فستیڤاڵی مۆسیقای کوردیدا بەدەست هێناوە.
4 ساڵی 1385ی هەتاوی لە فستیڤاڵی مۆسیقای کوردیدا دوو پلەی لە بواری ئامێری زەرب و دەف دا بە دەست هێناوە و هەروەها پلەی دووهەمی گرووپ نەوازی و گرووپی حەیران مسۆگەر کردوە.
5 ساڵی 1386ی هەتاوی لە بەشی تەک نەوازی فستیڤاڵی مۆسیقای سەقزدا پلەی یەکەم و لە بەشی گرووپیشدا بە سەرپەرەشتی خۆی دیسانەوە پلەی یەکەمی مسۆگەر کردوە.
6 ساڵی 1388ی هەتاوی لە فستیڤاڵی شانۆی کوردیدا بە هۆی دانانی ئاهەنگی مۆسیقای شانۆی سیدەوان لە دەرهێنانی عەلیڕەزا ئیسماعیلی پلەی یەکەمی بەدەست هێناوە.
7 ساڵی 1388ی هەتاوی لە فستیڤاڵی بەیت و حەیران لە شاری #سەردەشت#، پلەی یەکەمی ئامێرە کوبەییەکانی بە دەست هێناوە.
8 ساڵی 1388ی هەتاوی لە فستیڤاڵی فێرگەکانی مۆسیقای سەرجەم وڵاتی ئێران، پلەی یەکەمی مسۆگەر کردوە.
9 ساڵی 1388ی هەتاوی هاوڕێ لەگەڵ گرووپی مۆسیقای لاوانی لاوژه، بەشداری لە فستیڤاڵی مۆسیقای ڕۆژئاوای ئێران کردوە.
10 ساڵی 1388ی هەتاوی بە هۆی دانانی ئاهەنگی مۆسیقای شانۆی مەش مەش قولی خان لە دەرهێنانی وریا شاکری، پلەی یەکەمی لە فستیڤاڵی شانۆی سەرشەقامی سەقز بە دەست هێناوە.
هونەرمەند وریا فەرەجی هەنووکە بەرپرسایەتی گرووپی ئامێرە کووبەییەکانی حەزینی لە ئەستۆیە و لە فێرگەکانی مۆسیقای هۆرە و لاوژه، وەک ڕاهێنەری ئامێری دەف ڕۆڵ ئەگێڕێت و جگە لەوەش ئێستا سەرقاڵی نووسینی کتێبێکە کە لە شێوازەکانی ڕاهێنانی دەف زەن و ڕیتمەکانی دەف زەنی پێک هاتووە و هەمووی کۆکراوە و بەرهەمی ئەزموونی چەندین ساڵەی خۆی لەم بوارەدایه.