ئا: کاروان ساڵحی
دەروازەکانی کەرکووک بۆ چونەناوەوەی مادە هۆشبەرەکان ناڕاستەوخۆ کراوەن، لەچەند دەرمانخانەیەکی نایاساییش لە لاکۆڵانەکانی شارەکەدا پەرستیاران بازرگانی بەو مادەیەوە دەکەن.
عەقید نەوزاد سەڵاحەدین، لێپرسراوی هۆبەی نەهێشتنی مادە هۆشبەرەکان لەپۆلیسی کەرکووک تەشەنەسەندنی مادە هۆشبەرەکان لەکەرکووک بە "دیاردە" ناودەبات و دەڵێت، مادەی هۆشبەر تەشەنەی کردوە بۆ نێو خوێندنگەکان.
چەند جۆرێک لەمادەی هۆبەشەر کە لەلایەن پۆلیسەوە دەستی بەسەردا گیراوە فۆتۆ: کاروان ساڵحی
عەقید نەوزاد وتی، "تائێستا سەردانی دوو قوتابخانەمان کردووە کە ئەو دیاردەیەی تێدابووە، بەڵام لەلایەن بەڕێوەبەری ئەو دوو قوتابخانەیەوە ئەو باسە شاردراوەتەوە بۆ ئەوەی قوتابییەکانیان نەدرێن بەدادگا." ناوبراو وتیشی، هێزە ئەمنییەکان وەک پۆلیس و سوپا بێبەش نین لەدیاردەی بەکارهێنانی مادەی هۆشبەر "لەڕیزەکانی پۆلیس و سوپادا خەڵکمان دەستگیرکردوە لەسەر بەکارهێنانیان."
تەنیا لە 10 مانگی ئەمساڵدا (2013) هۆبەی نەهێشتنی مادە هۆشبەرەکان 70 دۆسیەی تایبەتیان بەمادە هۆشبەرەکان کردۆتەوەو 89 کەسیش دوای دەستگیرکردنیان دراونەتە دادگا، لەکاتێکدا لەساڵی ڕابردو دۆسیەکان کەمتر بون.
هەر لەهەڵمەتەکانی ئەمساڵیاندا هۆبەی نەهێشتنی مادە هۆشبەرەکان دەستیان بەسەر (5گرام) تلیاکدا گرتووە، لەگەڵ 11 هەزارو 517 حەبی ئارتین و (2ملیۆن و هەشتاو دوو) دەنکی حەبی (ترامادۆڵ) کە ئەمانەش جۆرێکی تری مادەی هۆشبەرن.
یاسا بەهەمان شێوەی بازرگانیکردن بەتلیاک مامەڵە لەگەڵ ئەو کەسانەدا دەکات کە حەبی جۆری ترامادۆڵ و ئارتینیان پێدەگیرێت، بەپێی وتەی لێپرسراوی هۆبەی نەهێشتنی مادە هۆشبەرەکان.
ئەو جۆرانە لەمادەی هۆشبەر بەدەروازەکانی کەرکووکدا لەهەردو پارێزگای موسڵ و بەغداوە دەبرێنە ناو شارەوەو ئەو دو پارێزگایە سەرچاوەی تەشەنەسەندنی مادەهۆشبەرەکانن لەپارێزگاکە.
هۆشداریی و ترسی پۆلیس ئەوەیە تائێستا نەیانتوانیووە کۆنترۆڵی بڵاوبونەوەی ئەو دیاردەیە بکەن، کە مەترسی بۆ نەوەی ئایندەو زیادبونی تاوانی جۆراوجۆر هەیە، لەگەڵ ئاماژەدان بەکردەوەی تیرۆریستی.
عەقید نەوزاد ڕونیکردەوە کە "نەمانتوانیووە کۆنترۆڵی بازگەکان بکەین و پۆلیسی لێدابنێن، هەروەها لەڕێگای گەڕان و پشکنین توانیومانە لەنێو گەڕەکەکان چەند پەرستیارێک دەستگیربکەین کە دەیانفرۆشتن و بازرگانیان پێوە دەکردن."
هاوکات ئەوەشی خستەڕو کە "تەشەنەسەندنی ئەم دیاردەیە لەنێو کۆمەڵگەو بەتایبەت لەنێو گەنجان دەبێتە هۆی زیادبونی تاوانی (لاقەکردن، دزیی و تاوانی تری کۆمەڵایەتیی).” زیاتر وتی “لەهەموشی مەترسیدارتر ئەوەیە تیرۆریستان سود لەو کەسانە وەردەگرن کە بێهۆشن بۆ کاری تیرۆریستی و مەرامی خۆیان."
لەئێستادا ڕێکخراوی خێرخوازی کەرکووک بەهاوبەشی لەگەڵ هۆبەی نەهێشتی مادە هۆشبەرەکان چەند خولێکی هۆشیارکردنەوەیان لەوبارەیەوە دەستپێکردووە کە بڕیارە سێ مانگ بەردەوامبێت.
وەفا محەمەد، لێپرسراوی ڕێکخراوی خێرخوازی کەرکووک وتی، "لەقوتابخانەو کۆلێژو وپەیمانگەکان خولەکان دەڵێینەوە دەربارەی زیانەکانی مادەی هۆشبەرو خۆپاراستن لەو مادەیەو چۆنێتی هەوڵدان بۆ کەمکردنەوەی لەنێو کۆمەڵگەدا."
وەفا ئەوەشی وت کە "هەستمان بەتەشەنەسندنی مادە هۆشبەرەکان کردووە، لەناو قوتابخانە و دەزگا ئەمنیەکاندا بۆیە دەبێت بەری پێبگیرێت و خەڵک لەو مەترسییە گەورەیە هۆشیار بکەینەوە."
هاوکات عەقید نەوزاد سەڵاحەدین ئاماژەی بۆ ئەوەکرد کە "داواکارین بەڕێوەبەری پۆلیس و لێپرسراوەکان هاوکاربن بۆ بنبڕکردنی ئەو دیاردەیە بەتایبەت لەسلکی پۆلیس و هێزە ئەمنییەکانی تر."
- 21-10-2013