پاش ئەوەی لە (19-11-2013) لیژنەی باڵای فتوای کوردستان ڕونکردنەوەیەکی بڵاوکردەوە سەبارەت به و ئیشکالیەت و مشتومڕەی لەسەر هۆنراوەی (ئەی ڕەقیب) دروست بوو، بەپێویستی دەزانین وەک کۆمەڵێک لەمامۆستایانی ئاینی و بانگخوازان چەند بەرچاو ڕونییەک بۆ جەماوەری مسوڵمانی کوردستان بڵاوبکەینەوە:
1- ڕونکردنەوەکەی لیژنەی باڵای فتوا شپرزەیی زۆری پێوەدیاره و هەستیش بەوە دەکرێت کەلایەنێک لەپشت جوڵاندنی ئەم مەسەلەوەیە تاکو لیژنەی ناوبراو ڕونکردنەوە لەسەر (هۆنراوەی ئەی ڕەقیب) بڵاوبکاتەوە.
2- لەخاڵی یەکەمی ڕونکردنەوەکەی لیژنەی باڵای فتوای کوردستاندا بۆ شەرعیەتدان بەسرودەکە پشت بەوە بەستراوە کە ئەو سرودە بەئامادەبوونی چەندین مەلاو زانای ئاینی و گەورەپیاوانی کۆماری کوردستان لەمهاباد لەبەری هەستاونەتە سەرپێ، دیارە ئەوەش ناکرێتە بەڵگە بۆ ئەوەی هۆنراوەکە کێشەی شەرعی لەسەر نەبێت.
3- ئەکادیمیای کوردی ئەوەی پشت ڕاست کردۆتەوە کە سرودەکە (مارشی نەتەوەیی) یە نەک سرودی نیشتمانی کەگوزارشت لەهەموو هاونیشتمانیان بکات.
4- لەخاڵی دووەمی ڕونکردنەوەکەیاندا لیژنەی فتوای کوردستان سەبارەت بەکۆپلەی (دینمان و ئاینمان هەر نیشتمان) دەنوسن : " وشەی (هەر)ی بۆ زیاد کراوە کەلەهۆنراوە ئەسڵییەکەدا وشەی (هەر) بوونی نیە و مەبەستیش ئەوەیە کە (بەهێندەی دین و ئاینمان نیشتمانمان خۆش دەوێت)، لێرەدا لیژنەی باڵا ئەوە ساغ دەکاتەوە کەمەبەستی شاعیر ئەوەبووە خۆشویستنی (دین و ئاین) یەکسانە لەگەڵ (خۆشویستنی نیشتمان) ئەگەر وادابنرێت ئەم لێکدانەوەی لیژنەی باڵای فتوا بۆ هۆنراوەکە بەوجۆرەیە، ئەوا یەکسان کردنی خۆشەویستی دین و ئاین وەک نیشتمان بەتەواوی پێچەوانەی چەندین دەقی قورئانە، هەرچەندە ئینسانی مسوڵمان لەسەری پێویستە نیشتمانەکەی خۆی خۆش بوێت بەڵام هیچ کات ئەو خۆشەویستییە یەکسان نییە بەدین و ئاینی.
5- لێرەوە لەلیژنەی باڵای فتوای کوردستان دەپرسین: ئایا دەتوانن ئەوەمان بەبەڵگەی شەرعی بۆ بسەلمێنن کە دین و ئاین لەخۆشویستندا هاوتای نیشتمانە؟ کەئەگەر وابێت ئەوە نەتەوەپەرستی و نیشتمان پەرستییە نەک نیشتمان خۆش ویستن، خوای پەرورەردگار دەفەرموێت : (والژین ێمنوا أشد حبا لله) البقرە -165-.
6- وشەی دین هیچ تەئویلێک هەڵناگرێ و هەبوون یان نەبوونی وشەی (هەر) لەسەر ئەو کۆپلەیە هیچ لەماناکەی ناگۆڕێت، چونکە وشەی دین زاراوەیەکی قورئانییه و خوای پەروەردگار دەفەرمووێت : (ۆرَچِیتُ ڵکُمُ الْإسْلامَ دِینًا) المائدە -3- هەروەها دەفەرمووێت : (إِنَّ الدِّینَ عِندَ اللّهِ الإِسْڵامُ) ال عمران -19-.
قسەکردنیش لەسەر مەبەستی شاعیر لەسەر ئایدیاو تێڕوانینی پێشوی شاعیرەکەیە وەک دەبینین لەهۆنراوەیەکی تریدا کەبیروبۆچونی شاعیر (دڵدار) دەردەخات دەڵێت:
بڵێ کوردستان تۆ منت خولقان
تۆ منت خولقاند پێت بەخشیم ژیان
چونکە کوردستان کوردستانی جوان
قیبلەی منی دینمی خوای بێگومان
7- لیژنەی باڵای فتوای کوردستان لەم ڕونکردنەوەیدا سەلماندویەتی کە هۆنراوەی ئەی ڕەقیب ئیشکالیەتی هەیە و سرودێکی نەتەوەییە، بۆیە پێویست دەکات لایەنە پەیوەندیدارەکان هەوڵی ئەوە بدەن هەرێمی کوردستان ببێت بەخاوەنی سرودێکی نیشتمانی کەتەعبیر لەهەموو نەتەوه و ئاین و پێکهاتەیەک بکات، یان ئەم سرودە (ئەی ڕەقیب) بەتەواوی لاببرێت، یان لەکەمترین حاڵەت دا تەعدیل بکرێت و ئەو کۆپلانەی لاببرێت کە مشت و مڕی لەسەرە.
واژۆی 341 مامۆستای ئاینی لەسەرجەم کوردستان