سڵاو لە سەرجەم ئەو دۆستانەی کە دڵیان بۆ ئاشتی و ئازادی بە ئاگری نەورۆز گڕی گرتووە!
سڵاو لە گەلی خۆمان دەکەم، ئەو گەلەی لە میزۆپۆتامیای لانکەی شارستانییەکاندا ئاگری نەورۆزی بۆ شادی و ئاهەنگی هۆشیاربوونەوە و دیمۆکراسی گۆڕیوە.
لە ڕێی ئێوەوە خۆشەویستیی خۆم بۆ تەواوی گەنجان و ژنانی وڵاتەکەم دەنێرم.
ئەوانەی لە دڵیاندا جێگەیان بۆ ئاشتی کردووەتەوە، هەر کەسێکی خوازیاری بیستنی دەنگی ئێمە و سەرانسەری تورکیا بانگ دەکەم لە چوارچێوەی ڕوحی هاوکاریی چەندین سەدەییدا یەک بگرن.
جەژنی گەلانی ڕۆژهەڵاتی ناوەڕاست و ئاسیای بێشکەی مێژووی شارستانییەکانیش پیرۆز دەکەم.
پڕ بە دڵ سڵاو بۆ هەمووتان دەنێرم. سڵاو!..
ئێمە لە نەورۆزی پار و لە ڕۆژێکی وەک ئەمڕۆدا ئەو ئاگری شەڕەمان کوژاندەوە کە وردیلە نامەم، گیان، ئەڤین و ڕەنجەکانی دەکرد بە خۆڵەمێش و هەر لەو ڕۆژەدا مەشخەڵی هەستانەوەی گەورەمان داگیرساند.
گەلی خۆشەویستی تورکیا!
مێژوو پێشانمانی داوە ئەگەر ڕابەرایەتییەکی بەبڕیاری ئاشتی نەخرێتەڕوو، ئەوا کێشە مێژووییەکان بە ڕەوتی خۆیاندا دەڕۆن و بە شێوەیەکی گشتی لەگەڵ وەرچەرخانی زۆر زیانبەخشدا وەڵام بەرهەم دەهێنن.
شتێک کە لە بەردەممانە و پێویستی بە وەڵامی زۆر بەدەستوبردە، ئەم پرسیارەیە: ئایا بە کودەتای یەک لە دوای یەک یان بە دیموکراسییەکی تەواو و ڕادیکاڵەوە لەسەر ڕێگەی خۆمان بەردەوام دەبین؟
ئەو دۆخە بەرجەستەیەی کە لە نەورۆزی ڕابردووەوە تا ئەمڕۆ ئێمەی تێداین، گوزارە لەو ڕێگەیە دەکات کە بەتەواوی دەستی بە جیابوونەوە کردووە. ڕێژیمی گەلەکۆمەچی-کودەتاچیی پشتبەستوو بە مۆدێرنیتەی کاپیتالیستی 200 ساڵە یان ئەوەتا دەست بە خۆیدا دەهێنێتەوە و بەردەوام دەبێت، یان پەیوەندییە مێژوویییەکانی تورک-کورد بە فراوانترین ڕیفۆرمی دیموکراتیدا دەرباز دەکات و بە ڕێژیمێکی دەستووریی دیموکرات میکانیزمەکانی گەلەکۆمەچی-کودەتاچی تێکدەشکێنێت و خۆی ڕاست دەکاتەوە. ئیدی وادەی هەموو قەدبڕ و شێوازە کاتییەکان بەسەرچووە.
ئەوەی تا ئەمڕۆ بەڕێوە براوە، پرۆسەیەکی دانوستاندن و گرنگ بوو. هەردوو لایەن لەو پرۆسەیەدا نیاز و واقعیبوون و بەکارهاتووییی یەکدییان تاقی کردەوە. سەرباری خۆگرانکردنی حکوومەت و بەڕێوەبردنی تاکلایەنە و هەڵوێستی خۆدزینەوە و دوورکەوتنەوە لە داڕشتنی بناغەی یاسایی، هەردوو لایەن بە بڕیارەوە لەم تاقیکردنەوەیەی هەوڵی ئاشتیدا دەرچوون. پرۆسەکانی دانوستاندن ئەگەرچی گرنگن، بەڵام پەیوەستبوون لە خۆناگرن. هەر لەبەرئەوەیشە ناتوانن متمانەی تەواو بۆ ئاشتیی یەکجاری پێک بهێنن. لەم قۆناغەدا کە پێی گەیشتووین، پێداویستیی چوارچێوەیەکی یاسایی بۆ بە سیستەماتیککردنی دانوستاندنەکان خۆی دەسەپێنێت.
ئاشتی لە شەڕ دژوارترە، بەڵام هەموو شەڕێکیش ئاشتییەکی هەیە. ئێمە لە بەرگری لە خۆکردندا نەترساین، لە ئاشتیشدا ناترسین.
بەرگری لە خۆکردنی ئێمە لە دژی گەلانی برا نەبووە، بەڵکو لە دژی سیستەمی ستەمکاری بە ڕەفتار خۆسەپێن، ئەوانی تر بە هیچ نەزان، لەناوبەر و نکۆڵیکار بووە. لەو سۆنگەیەوە ئاشتیمانیش بۆ حکوومەت و دەوڵەتەکان نا، بۆ گەلانی ئەنادۆڵ و کوردستان و میزۆپۆتامیایە، ئەو گەلانەی کە بەها هەزاران ساڵ دێرینەکانی ئەم خاکانەیان هەرس کردووە و ئامادەکاری بێوێنەی میراتی کولتووریی جیهانن. ئەرکی حکوومەتە بەهەندبوونێکی گونجاو لەگەڵ ئەو ڕاستییە پێشبخات.
ڕێپێوانی گەورەی ئاشتیی ئێمە لە ئۆسلۆوە بۆ پاریس، لە جنێڤەوە بۆ لجێ، لە ئۆپەراسیۆنەکانی کەجەکەوە تا هەڵوێستی ستەمکارانەی دژ بە گیراوانی نەخۆشمان دووچاری چەندین هێرش بووەتەوە. ئەوەی سەرلەبەری ئەو گەمە چەپەڵانە تێکدەدات و باڵادەستیی گلادیۆی نێودەوڵەتی دەهێنێتە لەرزە و پووچەڵی دەکاتەوە، ئەم بزووتنەوەیەیە؛ واتا ئێوەن. تێکۆشانی ئێمە ڕۆڵێکی گەورەی هەبووە لە بنکۆڵکردنی سەرجەم سیستەمە خۆسەپێنەکانی هەرێمەکەدا. ئەرکی مێژووییی سەرشانمانە وەک پێویست هۆشیار بین بەرامبەر بەو گەلەکۆمە نێودەوڵەتییانەی کە لە شێوازی جۆراوجۆردا ڕووبەڕوومان دەبنەوە.
لەلایەکی تر، زمان و شێوازێکی بەرپرسیار میتۆدە ڕەگەزپەرستەکانی شەڕی دەروونی پووچەڵ دەکاتەوە و هەمان کات دەبێت بە خەسڵەتی بنەڕەتیی ئاشتیی ئێمە.
ئەم ئاشتییە لە ڕۆژڤا و سەرانسەری هەرێمەکە تەنیا بە چارەسەرگەلی دەستوریی دیموکراتی پتەو دەبێت.
ژنان بەو توانای ئازادی و یەکسانییەوە کە بەدەستیان هێناوە و بەو بەهایانەی ئاکار و جوانییەوە کە خستوویانەتە سەر پرۆسەی پێشکەوتنی کۆمەڵگەی دیموکراتی، هەڵگری ڕاستەقینەی ئەم ئاشتییە دەبن.
بزووتنەوەکەمان وەک بزووتنەوەی گەنجان دەستی پێکرد و بەردەوام بە گەنجی ماوەتەوە. هەر گەنجانیش لە بەرامبەر هێرش و گێچەڵەکانی دژ بە ئاشتیدا داکۆکیکاری لە بەزین نەهاتووی ئاشتی دەبن.
گەلی کۆچەرمان لە ئەوروپا و سەرانسەری جیهان دەبن بەو دەنگەمان کە لە جیهاندا بۆ ئاشتی و ژیانی ئازاد و شکۆمەندانە هاوار دەکات.
گشت ئەو هەڤاڵانەمان کە ڕوویان لە بێئومێدی وەرگێڕاوە و لە هەموو شوێنێک بە ویستی بێوێنەی خۆیان و بێ چاوترووکاندن ژیان و تەندروستی و ئازادیی خۆیان بەخشیوە، پشت و پەنای سەرەکیی ئێمەن.
گەلانی تورکیا بە بەسەرهاتی هەزار ساڵەی برایەتییەوە کاریگەرترین وەڵام دەبن لە بەرامبەر وتەوتی ڕەگەزپەرست و جوداخواز و لووتبەرز و ئەو قسە نەفرەتییانەی کە بۆنی خوێنیان لێ دێت.
بە بڕوابوونم بە وڵاتێکی ئازاد و تەواو دیموکرات کە تیایدا هەموو ئاین، گەلان، کولتوور و ڕەنجەکان هەست بە ئازادیی خۆیان دەکەن و بە شۆڕشگێڕترین هەستەکانمەوە سڵاو لە هەمووتان دەکەم.
هەموو ئەوانەی خۆیان بەرامبەر چاخی خۆیان و مرۆڤایەتی بە بەپرسیار دەزانن، بانگیان دەکەم ببن بە بەردی بناغەی ئاشتییەکەمان.
سڵاو لەوانەی لە پێناوی برایەتیی گەلاندا ئەرکیان خستووەتە ئەستۆی خۆیان.
بژی نەورۆز!
بژی برایەتیی گەلان!
عەبدوڵڵا ئۆجەلان
گرتووخانەی ئیمرالی
21-03-2014