1. ئامادەکردنی پڕۆژەی بەرنامەی حکومەتی داهاتو:
1-1: لیژنەیەک لەلیستە براوەکانی پەڕڵەمانی کوردستان پێکبهێنرێت بۆ ئامادەکردنی بەرنامەی حکومەتی داهاتو لە ماوەی دوو هەفتەدا.
1-2: ئەم بنەما گشتیانەی خوارەوە لەبەرنامەکەدا بچەسپێنرێن و میکانیزمی گونجاو بۆ جێبەجێکردنیان ئامادەبکرێت:
1-2-1: سەروەریی یاسا و بێلایەنکردنی دادگاکان و دەستوەرنەدان لەکاروبارەکانیان.
1-2-2: بێلایەن و بەپیشەیی کردنی هێزە چەکدارەکان بەهێزەکانی پێشمەرگە و ئاساییش و هەواڵگری و ئاساییشی ناوخۆو قەدەغەکردنی کاری حیزبی لەناو ئەم هێزانەدا.
1-2-3: هێنانەکایەی دادی کۆمەڵایەتی لەدابەشکردنی داهات و سامان و مووچە و ئاوڕدانەوە لەچینە هەژارەکانی کۆمەڵگەو، هەموارکردنی سیستمی مووچە لەقازانجی ئەوانەی مووچەیان کەمە.
1-2-4: داڕشتنی سیاسەتێکی ئابووریی ڕوون، لەسەر بنەمای پلانێکی ستراتیژیی تۆکمەو، بوژاندنەوەی ژێرخانی ئابووریی هەرێم لەروی ڕێگاوبان، پەرەپێدان و هاوچەرخکردنی گوندەکان، بوژاندنەوەی کەرتی کشتوکاڵ، بەهێزکردنی کەرتی پیشەسازی، بەدامەزراوەیی کردن و ڕووناکاندنی کەرتی سامانی سرووشتی، لەگەڵ ڕەچاوکردنی هاوسەنگی لەنێوان کەرتە ئابووریە جیاجیاکاندا.
1-2-5: باش بەکارهێنانی سامانی گشتیو، بەیاسایی کردنی بودجەی حیزبەکان.
1-2-6: دژوەستانەوە و بنبڕکردنی گەندەڵی سیاسی و دارایی و ئیداری لە ڕێی چالاککردنی دیوانی چاودێریی دارایی و دەستەی دەستپاکی و دواکاری گشتی، سەرەڕای ڕۆڵی ڕەقابی پەڕڵەمان و درووستکردنی پشکنەرایەتی وەزارەتەکان و کرانەوەی زانیاری بەڕوی میدیادا.
1-2-7: چەسپاندیی پرەنسیپی هاوبەشی ڕاستەقینە لەوەرگرتنی بڕیارە سیاسی و ئابووری و سەربازی و کارگێڕییەکانی تایبەت بەپەیوەندیی نێوان هەرێم و بەغدا، داهاتوی هەرێم، ئەو پرسانەی ڕەهەندی دەستووریان هەیە و، گەڕاندنەوەی پڕۆژەی دەستووری هەرێم بۆ پەڕڵەمانی کوردستان بە مەبەستی هێنانەکایەی سازان لەسەری.
1-2-8: ئەولەویەتدان بەگەڕاندنەوەی ناوچە جێناکۆکەکان بۆ سەر هەرێمی کوردستان لەپەیوەندی لەگەڵ حکومەتی فیدڕاڵ‌و، گەیاندنی خزمەتگوزاری بۆ ئەم ناوچانە.

2. ئەنجامدانی کۆبوونەوەی پێنج قۆڵی لەنێوان لایەنە براوەکان لەتەلاری پەڕڵەمان، بە مەبەستی ڕێککەوتن لەسەر هەڵبژاردنی دەستەی سەرۆکایەتیی پەڕڵەمان و پێکهێنانی حکومەتی داهاتو لە ماوەی دوو هەفتەدا لەبەر ڕۆشنایی ئەم بنەمایانەی خوارەوە:
2-1: ڕێزگرتن لە دەنگی هاووڵاتییان لەهەڵبژاردنەکانی 21-09-2013 و کردنی بەبنەمای سپاردنی بەرپرسیارییەتییەکان بەلایەنە براوەکان.
2-2: پەیڕەوکردنی بنەمای خاڵ لەدابەشکردنی دەستەی سەرۆکایەتی پەڕڵەمان و سەرۆکایەتی هەرێم و سەرۆکایەتی حکومەت، وەزارەت و دەستە سەربەخۆکان‌و، ئەنجوومەن و دەزگای ئاساییش، نوێنەرایەتییەکانی دەرەوە، ئەو فەرمانگە و دامەزراوانەی بەرپرسەکانیان پلەی وەزیریان هەیە.
2-3: بنیاتنانی حکومەتی کارا بەپشتبەستن بەکادری لێهاتوو شارەزا لەبەڕێوەبردنی حکومەت و کارکردن بۆ بچوککردنەوە‌ و تەرشیقکردنی وەزارەت‌ و دامودەزگاکانی لەسەر بنەمای چوستی نەک قەبەیی، دور لەبیرۆکراسی و هەڵاوسانی کارگێڕیی.
2-4: بەپیشەیی کردنی دەزگای ئیداریی هەرێم و سپاردنی کاری شیاو بەکەسی شیاو لە ڕێی درووستکردنی ئەنجوومەنی ڕاژە.
2-5: چەسپاندنی سیستمی لامەرکەزیی تەواو لەئیدارە خۆجێییەکان و پێدانی سەربەخۆیی و دەسەڵاتی دارایی و کارگێڕی زیاتر بەئەنجوومەنی پارێزگاکان‌و، شۆڕکردنەوەی دەسەڵاتی کارگێڕی و دارایی زیاتر بۆ قەزاو ناحییەکان و کۆتایی هێنانی یەکجاری بەجوت ئیدارەیی حیزبی.
2-6: پێدانی ڕۆڵ و شوێنی شیاو بەپێکهاتەکانی تری هەرێم لە حکومەت و دامەزراوەکانی تر.

3. هەنگاوەکانی هەڵبژاردنی دەستەی سەرۆکایەتیی پەڕڵەمان و پێکهێنانی حکومەت:
3-1: پاش تەواوبوونی کاری ئەو لیژنانەی کە لەتەوەرەکانی 1 و 2 ئاماژەیان پێدرا، لە ماوەی 48 کاتژمێردا بەرێککەوتنی لیستە براوەکان و بانگێشتی سەرۆکی کاتی، پەڕڵەمانی کوردستان کۆدەبێتەوە بۆ تەواوکردنی دانیشتنی یەکەمی خۆی و هەڵبژاردنی دەستەی سەرۆکایەتی پەڕڵەمان بەپێی مادەی (13 تا 15)ی پەیڕەوی ناوخۆی پەڕڵەمان‌و، ناونانی پاڵێوراو بۆ سەرۆکی حکومەت بەپێی بڕگەی (3) لەمادەی (56) لەیاسای هەڵبژاردنی پەڕڵەمانی کوردستانی هەموارکراو لە هەمان دانیشتندا.
3-2: سەرۆکی هەرێم لە ماوەی 48 کاتژمێر لە دوای تەواوبوونی پڕۆسەی ناونانی سەرۆکی حکومەت، بەپێی بڕگەی دوانزەیەم لەمادەی (10) لەیاسای سەرۆکایەتی هەرێمی هەموارکراو سەرۆکی حکومەت و جێگرەکەی ڕائەسپێرێت بۆ ئەوەی لە ماوەی دوو هەفتەدا حکومەت پێکبهێنن بۆ ئەوەی بچنە بەردەم پەڕڵەمان بە مەبەستی وەرگرتنی متمانە و پەسەندکردنی بەرنامەکەی.

4. لیستی گۆڕان لەئاستانەی بانگەشەی هەڵبژاردنەکانی نیسانی 2014 داوادەکەن کە:
4-1: سەرجەم هێز ولایەنە سیاسییەکان و کاندیدەکانیان، بەئازادی و هێمن بانگەشەی هەڵبژاردن ئەنجامبدەن و خۆبپارێزن لەبێزارکردن و ئازاردانی هاووڵاتییانی کوردستان.
4-2: بێلایەنکردنی دامودەزگاکانی حکومەت و هێزە چەکدارەکان لەپڕۆسەی بانگەشەی هەڵبژاردندا.
4-3: حکومەت بڕیارێک دەربکات کە تیایدا:
4-3-1: پیسکردنی ژینگەی هەرێمی کوردستان لە کاتی بانگەشەی هەڵبژاردنی قەدەغەبکات و سزای دارایی بۆ دابنێت.
4-3-2: دیاردەی قێزەونی سزای سیاسی قەدەغەبکات و هەر کەسێک ئەنجامیدا، سزابدرێت و لەپۆستەکەی دوربخرێتەوە.
4-3-3: هەر کەسێک بەهۆکاری سیاسی سزا درابو، مووچەکەی بۆ بگەڕێنرێتەوە تا ئەگەڕێنرێتەوە سەر کارەکەی و سەرجەم ماف و ئیمتیازەکانی لەو ماوەیەدا بۆ ئەگەڕێنرێتەوە.
4-3-4: بەکارهێنانی چەک لە کاتی هەڵمەتەکانی بانگەشەی هەڵبژاردن قەدەغەبکرێت و سەرپێچیکار سزابدرێت.
4-3-5: لیژنەی ئەمنی لە شارەکان بەسەرۆکایەتی یەکە کارگێڕییەکان و بەشداریی بەرپرسانی هێزەکانی ئاساییشی ناوخۆ پێکبهێنرێت بۆ پاراستنی سەروماڵی هاووڵاتییان و بانگەشەکاران و ڕێ لە هەر هێزێکی چەکداری تر بگیرێت کە دەستێوەردان لەکارەکانیان بکات.[1]

فراکسیۆنی گۆڕان لەپەڕڵەمانی کوردستان
30-03-2014