جەماوەری ئازادیخوازی کوردستان ! نیوەڕۆی ئەمڕۆ، کۆمسیۆنی باڵای هەڵبژاردن، سەرەنجامی هەڵبژاردنی ئەنجومەنی پارێزگاکانی ڕاگەیاندو ڕای گشتی، لە ڕێژەی دەنگی لایەنەکان ‌و کاندیدەکان، دڵنیا کرا. پێشەکی، پیرۆزبایی سەرکەوتنی پرۆسەکە، لەگەلەکەمان ‌و، لە هەموو میدیاکان ‌و، ئەوانەی پەرۆشی پرۆسەی هەڵبژاردنێکی پاک‌و تەندروست بون، دەکەین.. ئینجا پیرۆزبایی لە تەواوی لایەن ‌و کاندیدە بەشدارەکانی هەڵبژاردنەکە ئومێدەواریشین، ئەم هەڵبژاردنەش، تاقیکردنەوەی هێژای بێ‌، بۆ پێشکەوتنی دیموکراسی‌و، پەروەردەی دیموکراسی‌و، ڕاپەڕاندنی ئەرکە بنچینەییەکانی دیموکراسی، لەعێراق‌و کوردستاندا. دڵسۆزانی کوردستان ! بەبۆنەی کۆتاییهاتنی پرۆسەی هەڵبژاردنەوە، بەهەلی دەزانین جارێکی دیکە ڕایبگەیەنن کە یەکێتیی نیشتمانیی کوردستان، هەروەکو چۆن لە (21-09-2013)دا، ڕێژەی دابەزیوی دەنگەکانی سەلماندو کاردانەوەی نەنواند؛ ئێستاش کە ڕێژەی دەنگەکانی لەسەر ئاستی عیراق، هەرێمی کوردستان، ناوچە دابڕێندراوەکان لە کوردستان، لە سلێمانی ‌و بردنەوەی پارێزگای هەڵەبجەش، بەرچاو بەرزبۆتەوە، بەم سەرکەوتنانە، یەکێتی بێباک نابێ‌ ‌و بەرپرسانە لەسەرجەم پرس ‌و بەرپرسیاریەتیەکە دەڕوانێ‌ ‌و دەشبێتە بەشێکی چارەسەری کێشەکان، لەسەر ئاستی عیراق ‌و ناوچە دابڕێندراوەکان‌و هەرێمی کوردستانیش. ئەی گەلی کوردستان ! ئێستا کە پرۆسەی هەڵبژاردن کۆتاییهات ‌و گەلەکەمان، بەوپەڕی سەربەستیەوە، چونە بەردەم سندوقەکانی دەنگدان‌و لیست‌و کاندیدی دڵخوازی خۆیان هەڵبژارد، دەنگدان‌و ئەنجامی ڕاگەیەندراوی هەڵبژاردن، بەرپرسیارێتی سیاسی‌و یاسایی‌و جەماوەریەو، دەکەوێتە سەرشانی هەموولایەک، هەتا بتوانین، بەکردەوە، دوور لە پروپاگەندەی ڕاگەیاندن، دورو لە چەواشەکاری، بنەماکانی ئەرکە هاوبەشەکان، لەسەر ئاستی عیراق، ناوچەکانی مادەی (140) و هەرێمیش، بکەینە بنچینەی هەڵوێستی سیاسی‌و بڕیارو بەرنامەی لەمەودوامان. لەناخەوە، سوپاسی گەلەکەمان بەگشتی ‌و دەنگدەرانی یەکێتی دەکەین، کە بەدەنگە سەوزەکانیان، بەدەنگی خەمخواردنی یەکێتیەکەیان، بەدەنگی وەفاداری بۆ شەهیدان، بەدەنگی زاخاودراو بەفیداکاری پێشمەرگەو پیشمەرگەی کەمئەندام، بەدەنگی کرێکاران، جوتیاران، فەرمانبەران، ئەندازیاران، پزیشکان، کارمەندانی تەندروستی، کەمئەندامان، ژنان، لاوان، وەرزشکاران، پارێزەران، نوسەران، هونەرمەندان، تەکنیکاران، کاسبکاران، دەنگدەرانی دەرەوەی وڵات، بەساڵاچوان‌و نابینایان.. بەدەنگی هەموتان، یەکێتیی نیشتمانیی کوردستانەکەتان، بەشێکی شایەنی دەنگەکانی گێڕایەوەو یەکێتیش، بەشێکی بەرچاوی نیگەرانیەکانی لەناو دەنگدەران، سەبارەت بە هەڵەکانی ڕابوردوو، بە ڕەخنەلێگرتنی هەڵەکان، ئاسایی کردەوە. ئێستاش کە یەکێتی، کەوتەوە سەر ڕێگای ڕاستەقینەی خۆی هەتا بتوانێ‌، لەم قۆناغە سیاسییە نوێیەدا، ئەرکە نوێکانی لە باری ئابوری، کۆمەڵایەتی، سیاسی، دەستوری ‌و عەدالەتەوە ڕابپەڕێنێ‌، لەهەمان کاتدا، باش دەزانین هێشتا لەناو ڕای گشتی‌و نەوەی نوێدا، هێشتا نیگەرانی سەبارەت بە یەکێتی ماوە. هێشتا، ڕەخنە لەیەکێتی دەگیرێ‌، هێشتا بەشێکی بەرچاوی دەنگدەر، لەژێر کاریگەری پروپاگەندەی ناراستدا ماوون، ئەمەش وامان لێدەکات، سوور بین لەسەر ئەوەی، کاندیدە متمانەپێدراوەکانمان لە پەرلەمانی عیراق‌و کوردستان‌و ئەنجومەنی پارێزگاکان، ئەرکەکانیان، بەدیقەت ڕابپەڕێنن. پرۆژەکانیان ڕەنگدانەوەی ئەو پەیام‌و پەیمانە بێ‌، کە لە هەڵبژاردنەکاندا، بەناوی یەکێتیەوە، بەخەڵکیان داوە. داکۆکیکاری وشیاری بەدیهێنانی دروشم‌و ئامانجەکان بن. بەڵێ‌.. جەماوەری کۆڵنەدەر ! یەکێتی، دەرس‌و پەندی لە هەڵبژاردنەکانی ڕابوردوو وەرگرتووە؛ هەڵەکانی دەستنیشانکردووە؛ چیکە، جیاوازیەکانی خۆی ناکاتە قوربانی هیچ جۆرە سیاسەتێک، دووربێ‌ لەو نەخشە ڕێگایەی کە لە ڕاگەیەندراوی کۆبونەوەی ئەنجومەنی سەرکردایەتی، ڕامانگەیاند. هەر بەم سیاسەتەش، دەتوانین، متمانەی پێدراوی ئێستامان بپارێزین‌و پاشماوەی نیگەرانیەکانی ناو خەڵکیش، بەرە بەرە بڕەوێنینەوە. یەکێتی، لە قۆناغە سیاسیە نوێکە، وردبۆتەوە. گۆڕانکاریەکانی لەمەودوا، لەبەرچاوگرتووە. دڵنیایە، نەخشەی سیاسی جیهان‌و ناوچەکەو ڕۆژهەڵاتی ناوەڕاستیش، لە دارشتنەوەیەکی نوێچەشندایە. لەناو ئەم داڕشتنەوەی نەخشەی سیاسیدا، نەتەوەی کوردو گەلانی ستەملێکراوی ڕۆژهەڵات، دەبێ‌ بەمافی چارەی خۆنوسینی دیموکراسیانە بگەن. ئەم قۆناغە سیاسییە نوێیەش، سەبارەت بەیەکێتی، هەروەکو قۆناغی دەستپێکردنی شۆڕش، هەروەکو قۆناغی ڕاپەڕین‌و ڕاگەیاندنی فیدراڵا، هەروەکو قۆناغی دوای 11/ی سپتامبەرو ڕوخاندنی ڕژێمی سەدام‌و پێکهێنانەوەی عیراقی فیدرالی دیموکرات، ئەم قۆناغە سیاسییە نوێیەش، وردە وردە، ئەرکەکانی دەکەوێتە ئەستۆی نەوەی سێهەمی یەکێتی؛ نەوەی یەکەم، نەوەی شۆڕش‌و ڕاپەڕین بوو؛ نەوەی دوەمیش، نەوەی پارێزی فیدرال‌و پارێزەرو پەرەپێدەری دیموکراسی بوو، نەوەی سێهەمیش، نەوەی هەموارکردنی دەستورو دەستوری گەلپەسەند؛ نەوەی بەدیهێنانی سۆسیال‌و، دەستەبەری تەندروستی‌و، خوێندنی هاوچەرخە؛ نەوەی گێڕانەوەی یەکجارەکی ناوچەکانی دەرەوەی هەرێمە، بۆ سەر کوردستانی نیشتمانی دایک؛ نەوەی قۆزتنەوەی هەر هەلێکی ڕەخساوە، بۆ بەدیهێنانی دوا ئامانجەکانی مافی چارەنوس. گەلی هیوادارمان ! پیرۆزتان بێ‌ سەرکەوتنی پرۆسەی هەڵبژاردن. پیرۆز بێ‌ سەرکەوتنی لیست‌و کاندیدەکانی یەکێتی. سوپاس بۆ دەنگدەری کوردستان‌و لەسەرانسەری عیراقدا. بەتایبەتی، لە شاخی حەمرینەوە، هەتا زاخۆی دەلال. سوپاستاندەکەین.. ئەی جەماوەری خەمخۆری کوردستان. جارێکی دیکە هەر ئێوە سەلماندتانەوە، کە ڕاستە ماوەیەک لە یەکێتیەکەتان نیگەران بون، بەڵام زوو هاتنەوە ناو ماڵە گەورەکەی ماڵی مام جەلال-ی دڵی گەورە؛ زوو بە هەستی دڵسۆزیتان ڕاستی‌و ناڕاستیتان لەیەک جیاکردەوە؛ زوو، بەتەنگ یەکێتیەوە هاتنەوەو هەروەکو چۆن لە شۆڕش بە سەخاوەتەوە، ڕۆڵەکانتان لە پێشمەرگایەتی‌و زیندانەکاندا دەبەخشییە یەکێتی‌و شۆڕش؛ چۆن چۆنی لەدوای ڕاپەڕینەوە تێکشکاندنی پیلانەکان لەسەر دیموکراسی، پۆل پۆل کوڕان‌و کچانتان، سەنگەرەکانی بەرەنگاری دیموکراسیتان، بەرێگای جۆراوجۆر، ئاوەدان دەکردەوە.. تەنانەت کە ڕەخنەشتان لە یەکێتی دەگرت، لە دڵسۆزیتانەوە بوو، ئێستاش، لە هەڵبژاردنی نیسانی ئەمساڵدا، کوردستانتان سەوزپۆش کرد. یەکێتیتان کردەوە ئەو هێزەی، بتوانێ‌ بەرپرسیارانە داکۆکی لە مافە بنچینەییەکانی دیموکراسی بکات‌و سوربێ‌ لەسەر جێبەجێکردنی دەستورو بەدیهێنانی ئامانجە دوورونزیکەکانی کوردو کوردستان.. لەسەرانسەری کوردستاندا. ئەی خەڵکینە ! سوپاستان دەکەین. سوپاستان دەکەین. سوپاستان دەکەین. ئەرکتان سەنگین کردین. بەڵێن بێ‌.. هەروەکو یەکێتیتان تاقیکردۆتەوە، لەمەودواش، شۆڕەسواری مەیدانی ململانێکان بین. شۆڕەسواری بەدیهێنانی مافەکانتان بین. شۆڕەسواری گێڕانەوەی کەرکووک‌و خانەقین‌و شەنگارو مەخمورو شێخان بین بۆ سەر کوردستان. شۆڕەسواری مافی چارەنوسی نەتەوەی کوردو گەلانی ئازادیخواز بین. بەبۆنەی ئەم سەرکەوتنەوە، بەبۆنەی بوژانەوەی یەکێتیی نیشتمانیی کوردستانەوە، بەبۆنەی وەفای بێوێنەی یەکێتیەکانەوە، - ڕۆحتان شادو ئاسودە بێ‌ شەهیدان. - سەرتان بەرزتر بێ‌ پێشمەرگەکان. - خەمخۆرانی دیموکراسی.. ئێوەش دڵنیابن لەبەردەوامی دیموکراسی.
مەکتەبی سیاسی یەکێتیی نیشتمانیی کوردستان
2014/5/22