رۆژان عومەر - سلێمانی
15-06-2014
بەپێی ڕاگەیەنراوێک لەپارێزگای سلێمانی، بڕیاردەدرێت هێنانی مریشکی بەستوو بەڕێژەی (70%) بەبەراورد بەمانگەکانی ڕابردوو کەم بکرێتەوە. ئەمەش وەک هەوڵێک بۆ پاڵپشتی کردنی بەرهەمهێنەرانی ناوخۆ و خاوەن کێڵگەکانی پەلەوەر، هەروەها بۆ زیادکردنی بەروبوومی ناوخۆیی مریشک و ڕێگریکردن و کەمکردنەوەی پشت بەستن بەهێنانی بەرهەمی بیانی کە ناهاوسەنگی لەبازرگانیدا دروست دەکات، بەتایبەت کە بەهۆی هاوردەکردنەوە بەشێکی زۆر لەدراوی قورس دەچێتە دەرەوەی وڵات.
رزگار حەمەسدیق جێگری بەڕێوەبەری کشتوکاڵی سلێمانی و پسپۆڕ لەبواری سامانی ئاژەڵ و پەلەوەر، لەلێدوانێکدا بۆ کوردستانی نوێ وتی:)بڕیارمان داوە هێنانی مریشکی بەستوو بەڕێژەی (70%) کەم بکرێتەوە، لەبەر ئەوەی بەرهەمی ناوخۆمان هەیەو بەرهەمی ناوخۆ توانیویەتی ڕێژەیەکی باش مریشکی زیندوو بەرهەم بهێنێت، هەروەها بەپێی ڕاپۆرتەکان لەمانگی چوار و پێنجی ئەمساڵدا زیاتر لەدوو ملیۆن جوجەڵە دراوەتە کێڵگە پەلەوەرییەکان و تائێستا 260 کیڵگەی پەلەوەر جوجەڵەیان وەرگرتووە.
نرخی مریشک جێگیرە
سەبارەت بەئاستی بەرهەمی ناوخۆ ئەو پسپۆڕە ئاماژەی بۆ ئەوەشکرد، ئێستا نرخی مریشک جێگیرە و لەنێوان 2350 بۆ 2750 دیناردایە، لیژنەی دیاریکردنی نرخی بەروبومیش بۆ پشتیوانی لەبەرهەمی ناوخۆ پاڵپشتی لەکێڵگە پەلەوەریی دەکات. لەڕووی بەکاربردنەوە پارێزگای سلێمانی لەمانگێکدا پێویستی بەدوو هەزارو 500 تۆن مریشک هەیە، کە لەساڵێکدا دەگاتە 30 بۆ 35 هەزار تۆن مریشک. وتیشی:)لەکوردستان بەگشتی زیاتر لەهەزار کێڵگەی پەلەوەری هەیە و بەتەنیا لەسنووری پارێزگای سلێمانیشدا 433 پڕۆژەی بەخێوکردنی پەلەوەر بەردەوام مریشک بەرهەم دەهێنن، کە لەساڵێکدا بەرهەمییان دەگاتە 20 ملیۆن مریشک.
هەردوولا قازانج دەکەن
جێگری بەڕێوەبەری کشتوکاڵی سلێمانی ڕایگەیاند، ئامانج لەکەمکردنەوەی هێنانی مریشکی بەستو بۆ کوردستان، پاڵپشتی کردنە لەژێرخانیی ئابووریی و پشتیوانی کردنی کێڵگە پەلەوەرییەکانە بۆ هاندانیان بەرەو زیادکردنی بەرهەم. باسی لەوەشکرد بەرهەمی ناوخۆ بەرهەمێکی فرێشە و لەژێرچاودێری بەڕێوبەرایەتی ڤێتێرنەری کشتوکاڵی سلێمانی بەرهەمدەهێنرێت، لیژنەی چاودێریش بەردەوام بەدواداچوون دەکەن بۆ ئەوەی نرخی مریشک بەرز نەبێتەوە.
هاوڕێ عوسمان عەزیز کەچەند ساڵێکە مریشک فرۆشە دەڵێت:)کەمکردنەوەی هاوردەنەکردنی مریشکی بەستوو کارێکی زۆر باشە، لەبەر ئەوەی ئێمەی دوکاندار زیاتر مریشک دەفرۆشین و قازانج دەکەین، ئەگەر نرخی مریشکی زیندو بەو نرخەی ئێستا بێت هەرزانە و هاووڵاتیانیش زیاتر مریشکی زیندو دەکڕن).
حەزمان لەمریشکی بەستوو نییە
نەسرین ڕەشید کە هاووڵاتیەکی شاری سلێمانییە وتی:)ئێمە مریشکی بەستوو ناخۆین، حەزمان لێی نییە، لەبەر ئەوەی مریشکی بەستوو زۆر دەمێنێتەوە، وەکو مریشکی زیندو تازە نییەو لەکاتی لێناندا تامی خۆش نییە، ئێستا نرخی مریشک باشەو هەرزانە هاووڵاتیان دەتوانن مریشکی زیندو بکڕن).
هاوکات سروە محەمەد کەدانیشتووی شاری سلێمانی دەڵێ:)بەزۆری مریشکی زیندو دەکڕم لەبەر ئەوەی تازەیە و خۆم چاکی دەکەم، بەڵام زۆر کاتیش مریشکی بەستووشم کڕێوە، لەبەر ئەوەی دوکانی مریشکی زیندومان لێوە دوور بووە. بەڵام بەڕای من مریشکی زیندو تامی خۆشترە لەمریشکی بەستوو).
خواست لەسەر مریشک زۆر دەبێ
بەرهەم نەوزاد عەبدولعەزیز خاوەنی کێڵگەی پەلەوەری هاوڕێ دەڵێ:)هاوردەنەکردنی مریشکی بەستوو بۆ کوردستان بەتایبەت پارێزگای سلێمانی کارێکی زۆر باشە و سوودێکی زۆری دەبێت بۆ خاوەن گێلگەکان و دەتوانن زیاتر بایەخ بەبەرهەمی ناوخۆی بەدەن و خواستی هاووڵاتیانیش زیاتر دەبێت لەسەر مریشکی زیندو، ئێمە لەکێڵگەکەی خۆماندا، سێ مانگ جارێک 10 هەزار جوچک داخڵی ناو کێڵگەکان دەکەین و نرخی یەک جوچک بەیەک دۆلارو پێنج سەنتە. ئەگەرحکومەتی هەرێم هاوکاری و پاڵپشتیمان بکات، ئێمەش باشتر و زیاتر خواستی ڕۆژانەی هاووڵاتیان دابین دەکەین).
- 15-06-2014