1929 - 2012
نڤیسکار و زانیارێ کوردی یێ ناڤدار کارلەنێ چاچانی
ڕۆژا 9-ئێ نیسانێ سالا 2012-ئان زانییار و نڤیسکارێ کوردی ناڤدار، دۆکتۆرێ دیرۆکزانییێ، سەرۆکێ پارا کوردزانییێ یا ئینستیتووتا ڕۆهلاتزانییێ یا ئاکادێمییا ئەرمەنیستانێیە زانیستییێ کارلێنێ چاچانی د 83 سالییا تەمەنێ خوە دا ل یێرێڤانێ چوو ل سەر دلۆڤانییا خوە.
کارلێنێ چاچانی 25-ئێ کانوونێ سالا 1929-ئان ل گوندێ جەرجەریسێ ل ئەرمەنیستانێ ژ دییا خوە بوویە. ناڤێ گووندێ وان ناها دێرکە. ئەو گووندەکی کوردێن ئێزیدی یە ل ناڤچەیا ئەلەگەزێ. کارلێن هەما د بجووکتییێ دا تەربییەت-تۆرێن کوردی ل بەر دەستێن پیرکا خوە مەیرێ و کالکێ خوە چاچان دستینە، یێن کو باش هاژ نموونێن زارگۆتنا گەلێری، ئەرف-ئەدەت و ڕابوون-روونشتنا جڤاکا نەتەوی هەبوون. ئەو ب ڕووهێ والاتپارێزییێ نەبیێ خوە پەروەردە دکن و ناسییا وی ددنە جەوهارێن زارگۆتنا کوردا. ل سەر مەریفەتا کارلێن یا ئەفراندارییێ ئوسان ژی باڤێ وی ئارامێ چاچان باندوورا خوە دهێلە، یێ کو د دەما خوە دا گەلەک نموونێن زارگۆتنێ تۆمار کرییە و وەک پرتووک چاپ کرییە.
کارلێنێ چاچانی سالا 1948-ئان مەکتەبا گوندێ ئەلەگەزێ یا ناڤین کوتا دکە و هەما وێ سالێ ژی د ئینستیتووتا ڕەوانێ یا دەرسدارامادەکرنێ دا، ل فاکوولتێتا درۆکێ تێ قەبوولکرنێ.