سەرەڕای هەڕەشە بەردەوامەکانی تیرۆرستانی داعش و ڕووبەڕووبوونەوەی هێزی پێشمەرگەی کوردستان بەرانبەر هێرش و پەلامارەکانی ئەو تاقمە نەگریسە، هەرێمی کوردستان سەبارەت بە کێشە ناوخۆییەکان بەرەو ئاراستەیەکی نادروست تێدەپەڕێت کە بایی ئەوەندە ناکات گیروگرفتی تری بۆ زیاد بکرێت، بەمەبەستی ڕێگرتن لە هەر ئەگەر و پێشهاتێکی نەخوازراو کە ڕەنگە ببێتە هۆی ئاڵۆزی و تێکچوونی ئاشتی کۆمەڵایەتی.
یەکێتیی پەرلەمانتارانی کوردستان ئەم پێشنیازانەی خوارەوە دەخاتە بەردەم حکومەت و پەرلەمان و لایەنە سیاسییەکان و هاوڵاتیانی کوردستان:
یەکەم: ئەنجامدانی کۆبوونەوەی بەپەلەی کەسی یەکەمی لایەنە سیاسیەکان بۆ تاوتوێکردنی بارودۆخەکە بۆ ئەوەی چارەسەری ئاریشەکان لەناو شەقام بهێنرێتەوە نێو بەرپرسیاریەتی پارتە سیاسییەکانی هەرێم.
دووەم: پتەوکردنی هەماهەنگی پەرلەمانی کوردستان و حکوموتی هەرێم لەپێناو دانانی بەرنامە و پلانی چارەسەری.
سێیەم: دانانی پلانی توکمە لەبری ملدان بۆ سۆز و کاردانەوە بۆ ئەوەی دەرفەت بخرێتە بەردەم لایەنەکان بەمەبەستی دان بەخۆداگرتن و بەخۆداچوونەوە و بەهەند وەرگرتنی ڕەوشەکە.
چوارەم: لەکاتێکدا پشتیوانی لە مافە ڕەواکانی خەڵک دەکەین لە خۆپیشاندان و داواکارییەکانیان لە هەمان کاتیش ئیدانەی هەموو شێوە توندوتیژییەک دەکەین، جێگەی داخە کە قوربانی لێکەوتەوە و بارەگاکانیش سووتاون ئەمە ئەگەر بەری پێ نەگیرێت و چارەسەری بۆ نەدۆزرێتەوە زیانی گەورە بە دۆزی ڕەوای گەلەکەمان دەگەیەنێت.
پێنجەم: داوا لە دەزگاکانی ڕاگەیاندن بەتایبەتی کەناڵەکانی تەلەفزیۆن دەکەین بە گیانێکی بەرپرسانە هەڵسوکەوت لەگەڵ ڕووداوەکانی ئەمڕۆی کوردستان بکەن بەمەبەستی هێورکردنەوە و چەسپاندنی ئاشتی کۆمەڵایەتی.
شەشەم: ئەو بۆنەیە بە هەل دەزانین کە داوا لە هەموو لایەنە سیاسییەکان بکەین بە کەمکردنەوە و ڕێکخستنەوەی وەزارەت و دام و دەزگاکانی حکومەت و بارەگاکانی خۆیان بەشێوازێکی شارستانیانە بۆ هەڵگرتنی بارگرانی لەسەر حکومەت و خەڵک.
لە کۆتاییدا ئەرکی نیشتیمانی و نەتەوەیی دەخوازی کە هەمووان لە ئاستی بەرپرسیاریەتی دابن بە پێچەوانەوە ئۆباڵی توشبوونی گەلی کوردستان بە هەر نەهامەتی و دووبەرکی دەکەوێتە ئەستۆی بەرپرسان و لایەنە پەیوەندیدارەکان، لەم کاتە ناسکەشدا ڕێزگرتن و پشتیوانی بۆ هێزی پێشمەرگەی کوردستان دووپات دەکەینەوە بە هیوای سەرکەوتنیان لە ئەرکی پیرۆزیان و گەیاندنی گەلەکەمان بۆ مافی چارەنووس و ئامانجە گەورەکە.
یەکێتیی پەرلەمانتارانی کوردستان
11-10-2015