دواڕۆژ، عیسا عەبدولقەهار
ئەندامێکی لێژنەی پەروەردەو خوێندنی باڵا لە پەرلەمانی کوردستان ئاشکرایدەکات، لە ساڵی ڕابردوو (30) هەزار خوێندکار وازیان لە خوێندن هێناوە.
شوکریە ئیسماعیل، ئەندامێکی لێژنەی پەروەردەو خوێندنی باڵا لە پەرلەمانی کوردستان تایبەت بە دواڕۆژی ڕاگەیاند "بەپێی ئامارێکی یەکێتی مامۆستایانی کوردستان، لە ساڵی ڕابردووی خوێندن (30) هەزار خوێندکاران لە کوردستان وازیان لە خوێندن هێناوە".
وتیشی"ئەو خوێندکارانەی وازیان هێناوە، لە قۆناغی بنەڕەتی واتە لە یەک تاکو 9ی بنەڕەتی بوون".
ئەو پەرلەمانتارەی لێژنەی پەروەردەی پەرلەمان، هۆشیداریدا لە مەترسی وازهێنانی خوێندکاران لە پڕۆسەی خوێندن و وتی"ئەو ئامارەی یەکێتی مامۆستایان لەبارەی وازهێنانی خوێندکاران، مەترسیدارەو پێویستە وەزارەتی پەروەردەو حکومەتی هەرێم پەلە بکەن لەچارەسەرکردنی پڕۆسەی خوێندن".
شوکریە ئیسماعیل، لەبارەی هۆکارەکانی واهێنانی خوێندکاران وتی"هۆکار زۆرن بۆ وازهێنانی خوێندکاران، لەوانە بەشێک لە دایک و باوکان پێیانوایە منداڵەکانیان ئەگەر خوێندنیش تەواو بکەن دانامەزرێن، هەروەها بەشێکی تریان ئەو چەند ساڵە بارودۆخی مامۆستایان بینیوەو پێیانوایە منداڵەکانیان داهاتوویەکی باشیان نابێت، ئەمە جگە لە چەندین هۆکاری تر".
- 30-08-2016