ڕۆژنیوز – هاوکار و جیهاد
بەمەبەستی دابینکردنی بژێوی ژیان و ئاسانکاری زیاتر بۆ گەشتیاران، ژمارەیەک چێشتخانه و کەبابخانە لەسەر ڕێگە سەرەکیەکانی ناوچەی هەورامان دروستکراون، بەڵام خاوەنەکانیان ئاماژە به کەمبونەوەی بازاڕ دەکەن و گەشتیارانیش گرفتی نەبونی شوێنی مانەوەیان هەیە.
ناوچەی هەورامان بەهۆی هەبوونی سروشتێکی جوان و لەباریی کەشوهەواکەیەوه، ساڵانە بە هەزاران گەشتیاری ناوخۆیی و بیانی سەردانی دەکەن، بۆ ئه و مەبەستەش زیاتر لە 10 چێشتخانه و کەبابخانە لەسەر ڕێگە سەرەکیەکانی هەورامان دروستکراون، بەڵام هیچ ئوتێلێک بۆ مانەوەی گەشتیاران بونی نیە.
بێساران حەمەڕەحیم، خاوەنی یەکێک لە چێشتخانه و کەبابخانەکانی سەر ڕێگای بیارە – تەوێڵە بۆ ڕۆژنیوز ئەوەی خستە ڕوو: کردنەوەی چێشتخانه و کەبابخانەکان لەسەر ئەم ڕێگا سەرەکیانە گرنگی تایبەتی خۆیان هەیە، چونکە سەرەڕای ئەوەی بونەتە هۆکارێک بۆ بەدەستهێنانی بژێوی بە دەیان خێزان لە هەمان کاتیشدا ئاسانکاریەکی زۆریان بۆ گەشتیاران کردووه و هۆکارێکیش بوون بۆ ڕاکێشانی گەشتیاری زیاتر.
بێساران حەمەڕەحیم، وتیشی: ئه و گەشتیارانەی کە لە شوێنە دورەکانی وەک هەولێرو دهۆک و پارێزگاکانی تری عێراقەوە دێنە ناوچەکە ناچارن کە ڕوبکەنە ئەم چێشتخانه و کەبابخانانە، بەڵام نزیکەی ساڵێکە تێبینی ئەوەمان کردووە کە بەهۆی قەیرانی دارایی و پێنەدانی موچەوە لەکاتی خۆیدا ژمارەی ئه و کەسانە کەمی کردووە، کە پێش قەیرانی دارایی دەهاتن لە چێشتخانه و کەبابخانەکان نانیان دەخوارد، هەر ئەوەش وایکردووە کە ژمارەیەک له و چێشتخانه و کەبابخانانە دایبخەن بەتایبەت ئەوانەی کە بەشێوەی کەپر دروستکراون و بینایان نەبوو.
ئه و خاوەن چێشتخانەیه، وتیشی:" ئه و لیژنە تەندروستیانەی کە سەرپەرشتی چێشتخانه و کەبابخانەکانی ناوشار دەکەن، بەهەمان شێوە سەردانی ئێمەش دەکەن مەرجی تەندروستیمان بۆ شێوازی کارکردنمان دادەنێن".
لەسەرهەمان بابەت گەشتیارێک بەناوی هەڵمەت ئەکرەم، کە له شاری هەولێرەوە هاتبوە ناوچەی هەورامان، بۆ ڕۆژنیوز وتی: ئه و چێستخانە و کەبابخانانەی کە لەسەر ڕێگا سەرەکیەکانی ناوچەی هەورامان دروستکراون تا ڕادەیەکی باش کارئاسانییان بۆ گەشتیاران کردووە و توانیویانە خزمەت به گەشتیار بکەن، بەڵام ئەوەی بوەتە گرفت بۆ ئێمەی گەشتیاران بەتایبەت ئەوانەی لە شارە دورەکانەوە دێن، ئەوەیە کە له ناوچەکەدا هیچ هۆتێل و مۆتێلێک بونی نیە و گەشتیاران نازانن شه و لەکوێ بمێننەوە.
هەڵمەت ئەکرەم، وتیشی: به شێوەیەکی گشتی بەهۆی قەیرانی داراییەوە ڕێژەی هاتنی گەشتیار بۆ ناوچە گەشتیاریەکان ڕووی لەکەمی کردووە، چونکە من بۆخۆم سێ ساڵ بەر لە ئێستا سەردانی ناوچەی هەورامانم کردووه، لەگەڵ ئەوەشدا هەبوونی هەر کێشه و گرفتیک هۆکار دەبێت بۆئەوەی کە هاتنی گەشتیاران کەمبکاتەوە بۆ ئه و ناوچەیە بەپێچەوانەشەوە هەبونی ئاسانکاری و شوێنی مانەوە دەبێتە هۆی زیاترکردنی ڕێژەی هاتنی گەشتیار بۆناوچەکە.
ئه و گەشتیارە، ئەوەشی خستەڕوو: بۆئەوەی بتوانن ناوچە گەشتیاریەکانی هەورامان و شوێنەکانی تری کوردستان بەشێوەیەکی ستاندارد پێشوازی لە گەشتیار بکەن، دەبێت کاری زۆر لەوە زیاتریان تیادا بکرێت و حکومەت پرۆژەی ستراتیژیان تیادا ئەنجام بدات.
لای خۆشییەوە، ئەرکان حەمەصاڵح، خاوەنی یەکێکی تر لە کەبابخانەکانی هەورامان لە نزیگ گوندی بەڵخه، بۆ ڕۆژنیوز وتی:" لە ئێستادا بازاڕی ئێمەش زۆر کەمی کردووە بە بەراورد بە ساڵانی ڕابردوو، چونکە ئەگەرچی گەشتیارانیش دێنە ناوچەکه، بەڵام زۆربەی گەشتیاران خۆراک و پێداویستی لەگەڵ خۆیان دەهێنن و کەمتر ڕوو لە چێشتخانە و کەبابخانەکان دەکەن ئەوەش بەهۆی بەردەوامی قەیرانی دارایی و پێ نەدانی موچەیە لەکاتی خۆیدا".
ئەرکان حەمەصاڵح، وتیشی: ئیش و کاری ئێمە پەیوەندیەکی ڕاستەوخۆی هەیە بە باش بونی بژێوی و گوزەرانی هاوڵاتیانەوە، چونکە ئەگەر هاوڵاتیان باری ئابورییان باش بێت دێنە دەرەوە و ڕوو لە ناوچە گەشتیاریەکان دەکەن، ژمارەیەک له و گەشتیارانەش سەردانی چێشتخانه و کبابخانەکانیش دەکەن بۆ ئێمەش باشتر دەبێت، بەڵام لە ئێستادا ئەوە بەدی ناکەین و ڕۆژلەدوای ڕۆژ بازاڕمان کز تر دەبێت.