هاونیشتمانیان و هێز و لایەنە سیاسیەکان...
لە مێژوی گەلاندا، هەندێک کەس بە نەمریی ماونەتەوە کە خۆنەویستانە تەمەنی خۆیان بۆ خزمەتی گەل و مرۆڤایەتی تەرخان کردوە.
ئاپۆرای خۆرسک و، وتاف و شیوەن و گریانی بە کوڵی هاوڵاتیان، بۆ کۆچی دوایی کاک #نەوشیروان#، نیشانەی پێزانین و گەواهیدەری زیاتر لە نیوسەده لە ڕەنج و خەباتی ئه و مرۆڤەیه، بۆ خزمەتکردن بە گەل و نیشتیمانەکەی.
خزمەت وەک پێشمەرگەیەکی ئازاو خۆنەویست، وەک سەرکردە و ڕابەرێکی هەڵکەوتوی خۆڕسک، وەک سیاسیەکی پڕ لە ئەخلاق و هەڵوێست، وەک مێژونوسێکی ڕاستگۆ و ڕۆژنامەنوسێکی قەڵەم تیژ، وەک ئەدیب و کۆمەڵناسێکی وردو بە سەلیقە، دواجار وەک مرۆڤێکی خاکی و گونجاو لە گەڵ بچوک و گەورەدا.
نیشتیمانپەروەری، پێکەوە ژیان، دادی کۆمەڵایەتی و خۆشگوزەرانی، ڕوبەروبونەوەی زوڵم و زۆرداری، ئاشتی و ئارامی، نوێخوازی، ئاوەدانکردنەوە، دەوڵەتی دیموکراسی و یاسا، ئامانج و بنەمای کار و خەباتی کاک نەوشیروان بوە.
بە داخەوە لە کاتێکدا پرسە بۆ کۆچی ناوەختی ئەو دەگێڕین، چ لە سەر ئاستی ناوخۆی هەرێمی کوردستان، چ لەگەڵ بەغدا و لە ئاستی ناوچەکەشدا، لە گەڵ کۆمەڵێک قەیران ڕوبەڕوین.
لەم بۆنە خەمناکەدا ئێمە لە بزوتنەوەی گۆڕان پێمانوایه؛ چارەسەری کێشەکانی ناوخۆ، لە سەر بنەمای هاوسەنگی و ڕێزگرتن لە ئیرادەی هاوڵاتیان و سەروەری یاسا و دامەزراوەکان، ڕێگایەکی دروست و پاڵنەرێکی بەهێزە بۆ بەدیهێنانی تەواوی خواستەکانمان. لەسەر ئەم بنەمایە بزوتنەوەی گۆڕان ئامادەی چارەسەرکردنی هەمو کێشەکان و هەماهەنگی تەواوە.
هاونیشتیمانیان.. کاک نەوشیروان ڕاستە ڕێکخەری گشتی بزوتنەوەی گۆڕان بو، بەڵام بە کۆچی دوایی ئەو، زیانێکی گەورە بەر هەمومان کەوت. چونکە کەسایەتیەکی نیشتیمانی بو، بە درێژایی مێژوی خەباتی، بۆ چاکەی گشتی هەوڵیدا، خاوەندارێتی کاک نەوشیروان بۆ هەمو هاوڵاتیان و کوردستانیان دەگەڕێتەوەو، ئەرکی بزوتنەوەی گۆڕان و گۆڕانخوازانە ئەم تایبەتمەندیەی سەرکردەکەیان لەبەرچاو بگرن و بیپارێزن و بە گەورەیی بیهێڵنەوە.
هیوادارین بە خزمەتکردنی هاوڵاتیان و چەسپاندنی ئه و بەها باڵایانەی کاک نەوشیروان لە ژیانیدا بۆی تێکۆشا، ڕۆحی ئاسودە بکەین.
لێرەوه بە پێویستی دەزانین بە گەرمی سوپاسی تەواوی هاوڵاتیانی کوردستان چ لە ناوخۆ چ لە دەرەوە بکەین، سوپاسی هێزە ئەمنیەکان و دامودەزگاکانی تر بکەین، سوپاسی نوێنەری لایەنە سیاسەکانی هەرێم و پارچەکانی تری کوردستان و عێراق و وڵاتان بکەین، سوپاسی دەزگاکانی ڕاگەیاندن بکەین، سوپاسی هەر کەس و لایەنیک بکەین کە ڕاستەوخۆ و ناڕاستەوخۆ بەهەر جۆرێک بۆی کرابێت بەشداری پرسەی کاک نەوشیروانی کردوە.
لێرەوە پێیان دەڵێین؛ بەشداری ئێوه لە کورتترین پێناسەدا شەهادەتی مرۆڤدۆستی کاک نەوشیروان-ە، بەم بەشداریەتان بەشێک لە خەمەکانی ئێمەتان ڕەواندەوە. هاوکات بەهۆی ئه و کۆستە گەورەیە و دڵگەرمی و خەمی قوڵی هاوڵاتیانەوە، لێره و لەوێ ئەگەر هەر کەموکورتییەک بەرامبەر هەر کەس و لایەنێک ڕویدابێت داوای لێبوردن دەکەین.
گۆڕانخوازان دڵنیا دەکەینەوە، هەر به و جۆرەی کاک نەوشیروان نەخشەی بۆ کێشابو، ئەمانەتی پەیام و ئامانجەکانی گۆڕان وەک گلێنەی چاومان دەپارێزین و، بزوتنەوەکەمان وەک خۆی دەمێنیتەوە و ڕۆژ لە دوای ڕۆژ گەشەی پێ دەدەین و، لە پێناو چەسپاندنی بەرنامەی سیاسی و ئامانجەکانمان درێژە بە خەباتی سیاسی و مەدەنی خۆمان دەدەین. بێگومان ئاسۆی سەرکەوتن ڕونە.
لە کۆتاییدا لە خودا دەخوازین ڕۆحی کاک نەوشیروان بە بەهشت شاد بکات و، سەبوری هەمو لایەکمان بدات.
#بزوتنەوەی گۆران#
21-05-2017