پارێزگای سلێمانی بەتەنیا زیاتر لە نیوەی ڕوبەری چێنراو بە گەنمی هەرێمی کوردستان پێکدەهێنێت کەچی حکومەتی هەرێم لەو بەشەی کە لەلایەن بەغداوە بۆی دیاریکراوە، یەک لەسەر چواری گەنمی ئەم پارێزگایە وەردەگرێت.
پارێزگای سلێمانی نزیکەی یەک ملیۆن و 161 هەزار دۆنم ڕوبەری چێنراو بە گەنمی هەیە، کە دەکاتە زیاتر لە نیوەی سەرجەمی ڕوبەری چێنراو بە گەنم لە هەرێمی کوردستان، کەچی وەزارەتی کشتوکاڵی حکومەتی هەرێمی کوردستان لەکۆی 443 هەزار تەن گەنم کە لەلایەن بەغداوە بۆی دیاریکراوە تەنیا 115 هەزار تەن گەنم لە جوتیارانی پارێزگای سلێمانی وەردەگرێت.
لەکاتێکدا چاوەڕێ دەکرێت بەرهەمی ئەمساڵی پارێزگای سلێمانی زیاتر لە 600 هەزار تۆن بێت. واتە تەنیا17% ی گەنمی جوتیارانی پارێزگای سلێمانی وەردەگیرێت و ئەگەر هەیە 83%ی گەنمی جوتیارانی پارێزگای سلێمانی وەرنەگیرێت لەلایەن سایلۆکانەوە.
شاڵاو جەمال، بەڕێوەبەری گشتی کشتوکاڵی سلێمانی دەڵێت هەست بە ناعەدالەتی دەکەین لەم دابەشکردنەدا، ئێمە پێمان باش بوو دابەشکردنەکە لەسەر بنەمای ڕوبەری چێنراو بکرایە، ئەوکات نیوەی ئەو بڕەی بۆ هەرێمی کوردستان دیاریکراوە بەر پارێزگای سلێمانی دەکەوت.
بەرپرسانی وەزارەتی کشتوکاڵ و سەرچاوەکانی ئاو لە حکومەتی هەرێم، ئاماژەبەوەدەکەن، پێوەری وەرگرتنی گەنمی جوتیارانی پارێزگاکان حکومەتی عێراقی دیاریکردووە نەک ئەوان.
ئەنوەر عومەر، بەڕێوەبەری گشتی پلاندانان لە وەزارەتی کشتوکاڵ و سەرچاوەکانی ئاو بە دواڕۆژی ڕاگەیاند حکومەتی عێراق بە پێوەری ساڵانی (2009 تاوەکو 2013) شێوازی وەرگرتنی گەنمی پارێزگاکانی دیاریکردوە، لە کاتێکدا نوێنەری وەزارەتی کشتوکاڵی هەرێم، لە کۆبوونەوەیاندا لەگەڵ بەرپرسانی عێراق بەشداری کردوه و پێشنیازیانکردوە، بە پێی پێویستی و ڕوبەری چێنراو گەنم لە پارێزگاگان وەربگیرێت، بەڵام پێشنیازەکەی ئەوان ڕەتکراوەتەوە.
07-06-2017