هەر ژدەستپێکا هاتنا چەکدارێن #داعش# و کوشتن و ڕەڤاندنا وەلاتیێن #ئێزدی# 2745 زارۆیێن ئێزدی ئێتیم بووینە و هندەک ژلایێ ڕێکخراوان دهێنە خودانکرن و هندەک ژلایێ کەسوکارێن وانڤە و بەشەک ژوان نەچۆینە قوتابخانەیێ و تووشی گرێیێن دەروونی بووینە و پرسیارا دەیبابێن خۆ دکەن و ڤەکرنا خانییەکێ ئێتمینان بۆ 650 زارۆیێن ئێتیمێن ئێزدی هێشتا نەکەڤتییە کاری و ڕێڤەبەرییا کاروبارێن ئێزدییان دیار دکەت کو نێزیکی 1600 زارۆیێن ئێزدی ژلایێ چەکدارێن داعش بۆ کریارێن چەکداری و خۆکۆژیێ هاتینە پەروەردەکرن.
خەیری بۆزانی ڕێڤەبەرێ گشتیێ کاروبارێن ئێزدییان ل وەزارەتا ئەوقاف و کاروبارێن بۆ دواڕۆژ ڕۆهنکر کو؛ ل 3-8-2014ێ دەما داعش ب چەکێن پێشکەفتی هێرش کرییە سەر شنگال 1300 وەلاتیێن ئێزدی کوشتن و 6417 کەس ژی دەستەسەرکرن کو تێدا 3547 مێ و 2870 نێر بووینە و ئه و کچ و ژن ل بازارێن #مووسل#، تەلەعفەر، #ڕەققە# و دێرەزۆر کرین و فرۆشتن پێکرن و هەر ژبەر ڤێ کریارێ 2745 زارۆیێن ئێزدی ئێتیم بووینە.
ناڤبۆری دا دیارکرن کو؛ دگەل هاتنا داعش 340 هزار وەلاتێن شنگال و 60 هزار وەلاتیێن بەعشیقە و بەحزانێ ئاوارەی باژێڕێن هەرێما کوردستانێ و ب تایبەت دهۆک بووینە و بەشەک ژوان بەرەڤ وەلاتێن تورکیا و #سووریا# چۆینە.
بەشەکێ مەزن ژڤان زارۆیێن ئێزدی یێن هاتینە ڕەڤاندن نوکە ل مووسل نەماینە و بەرەڤ سووریا و باژێڕێ ڕەققە ڤەگوهاستینە، لڤێرە خەیری بۆزانی دیار دکەت کو؛ ل هەر جهەکێ چەکدارێن داعش بچنێ ژن و زارۆیێن ئێزدی دگەل خۆ دبەن ئەڤجا ئەگەر چۆبنە وەلاتێن وەکو سعوودیێ یان لیبیا یان هەر جهەکێ دی ئه و ژی دگەل خۆ برینە.
شەمۆ قاسم بەرپرسێ ڕاگەهاندن و ڕەوشەنبیری ل بنگەهێ لالش یێ ڕەوشەنبیری و هونەری بۆ دواڕۆژ ڕۆهنکر کو؛ پترییا ڤان زارۆیێن ئێتیم ژلایێ کەسوکارێن وان یێن پلە ئێک دهێنە خودانکرن و هەتا نوکە ژی پترییا وان پرسیارا دەیبابێن خۆ دکەن و بەشەک ژوان کو ساڤانە سەمیانێن وان ل بیرێ نەماینە و ڤێ پرسیارێ ناکەن.
ناڤبۆری دا دیارکرن کو؛ حوکمەتا هەرێمێ ڕەزامەندییا زارەکی بۆ خودانکرنا بەشەک ژڤان زارۆیان کربوو و سەر ڤێ چەندێ ژی بنگەهێ لالش یێ ڕەوشەنبیری ب نڤیسارا فەرمی داخوازا ئاڤاکرنا خانییەکێ ئێتیمان بۆ 650 زارۆیێن ئێزدی کربوو لێ هەتا نوکە بەرسڤ نەبوویە، کەسوکارێن ڤان زارۆیان ژی سەر ڤێ چەندێ ڕازینە کو ل خانیێ چاڤدێرییا زارۆیان بهێنە پەروەردەکرن و چ کێشە دگەل هندێ نینە.
شەمۆ قاسم زەلالکر کو؛ ب فەرمی داخواز ژ وەزارەتا کار و کاروبارێن جڤاکی هاتبووکرن کو مەهانە مووچەیەکێ بۆ ڤان زارۆیێ، ئێتیم تەرخان بکەت، لێ چ بەرسڤ بۆ ڤێ داخوازیێ ژی نەبووینە.
بەردەوام ل ترافیک و کولانێن باژێڕێن هەرێمێ و ب تایبەت دهۆک زارۆیێن ئێزدی دهێنە دیتن کو یێن خواستنێ دکەن یان کەرستەیەک د دەستی دایە و دڤێن بفرۆشن و جاران تووشی توندوتیژیێ دبن.
رێڤەبەرێ گشتیێ کاروبارێن ئێزدییان ل وەزارەتا ئەوقاف و کاروبارێن ئایینی ئاماژەکر کو؛ ژوان 6417 وەلاتیێن ئێزدی کو هاتینە ڕەڤاندن پتری 3 هزار هاتینە ڕزگارکرن کو 1077 ژن و 334 زەلام دگەل 800 زارۆیێن مێ و 790 زارۆیێن نێر و هەتا نوکە ژی 3416 کەس د دەست چەکدارێن داعش دا ماینە کو ژوان 1670 مێ و 1746 نێرن کو ب گۆرەی پێزانینان 1600 زارۆیێن ئێزدی ژلایێ چەکدارێن داعش ڤە بۆ کریارێن چەکداری و خۆکۆژیێ هاتینە ڕاهێنان.
بەری دو مەهان چەکدارێن داعش ڤیدیۆیەک ل مالپەرێن تایبەتێن خۆ بەلاڤکر کو تێدا دو زارۆیێن ئێزدی دەردکەڤن و ب کوردی دئاخفتن و هەرەشە دکرن و پاشی ب ڕێکا دو ترومبێلێن مینرێژکری ل سەنتەرێ باژێڕێ مووسل خۆ ب هێزێن ئیراقی ڤە پەقاندن.
خەیری بۆزانی ڕۆهنکر کو؛ ژبەر کریارێن داعش پتری 80 هزار ئێزدی کۆچبەری وەلاتێن ئەورۆپی بووینە و داخوازا ئاکنجیبوونێ کرینە و بەشەکێ مەزن ژوان هێشتا لسەر سنۆرێن تورکیا و یونانێ ماینە و ل وێرێ داخوازییا وەرگرتنا ئاکنجیبوونێ پێشکێشی کونسۆلیێن وەلاتێن ئەورۆپی کرینە.
سالم سەعید بەرپرسێ ڕاگەهاندنا کەمپێن ئاوارەیێن پارێزگەها دهۆک بۆ دواڕۆژ ڕۆهنکر کو؛ پترییا زارۆیێن ئێزدی یێن ئێتیم ژلایێ کەسوکارێن وان یێن نێزیک ڤە دهێنە خودانکرن لێ بەشەک ژوان لژێڕ چاڤدێرییا ڕێکخراوێن نێڤدەولەتی یێن تایبەت ب زارۆیان دانە و پشتی پرۆسەیا ڕزگارکرنا مووسل دەستپێکری وەلاتیێن ئەرەب ب شێوەیەکێ بەرفره ژ کەمپان دەردکەڤن و بۆ سەنتەرێ باژێڕێ مووسل دچن لێ هەتا نوکە ئێزدی نەزڤرینە سەر دەڤەرێن خۆ.
دوارۆژ
19-06-2017