بەبۆنەی هاتنی #جەژنی قوربان#ەوە، چوونی هاووڵاتیان لە هەرێمی کوردستانەوە بۆ #تورکیا# بۆ گەشتکردن و بەسەربردنی پشووی جەژن لە ناوچە #گەشتیاری#یەکانی تورکیا زیادی کردووە. خاوەنی یەکێک لە کۆمپانیا گەشتیارییەکانیش دەڵێت، 15 ڕۆژە هیچ جێگایەکی گەشتکردنیان نەماوە.
ساڵانە و لەگەڵ هاتنی وەرزی هاوین و جەژنەکانی #ڕەمەزان# و قورباندا، ژمارەیەکی زۆری دانیشتووانی شارەکانی هەرێمی کوردستان ڕوو لە تورکیا دەکەن بۆ گەشتکردن و بەسەربڕدنی کاتێکی خۆش لە هاوینەهەوار و ناوچە گەشتیارییەکانی ئەو وڵاتەدا، ئەمساڵ بە بەراورد بە دوو ساڵی ڕابردوو ژمارەی گەشتیاران زیاتر بووە.
تاهیر عەبدوڵڵا بەڕێوەبەری #فرۆکەخانە#ی نێودەوڵەتی سلێمانی بە ئانادۆڵوی ڕاگەیاند، لە ئێستادا و بە بۆنەی نزیکبونەوەی جەژنی قوربانەوە، ژمارەی گەشتیاران زیادی کردووە و لە نێو فڕۆکەخانەی سلێمانی ڕۆژانە قەرەباڵخی زۆرمان لەسەرە.
لە فڕۆکەخانەی سلێمانییەوە، هەفتانە 80 تا 100 گەشتی نێودەوڵەتی ئەنجام دەدرێت، لەو ژمارەیەش لانی کەم ڕۆژانە سێ گەشتی تورکیا هەیە کە چوار هێڵی ئاسمانی تورکی و عێراقی گەشتەکانیان بۆ شارەکانی ئیستانبوڵ و ئانتالیا ئەنجام دەدەن.
بەڕێوەبەری #فرۆکەخانەی سلێمانی# باس لەوە دەکات، ڕۆژانە ژمارەیەکی زۆر گەشتیار لە ڕێگەی ئەو هێڵانەوە گەشت بۆ تورکیا دەکەن، ئەو گەشتیارانە بە تایبەت بۆ شارەکانی ئیستانبوڵ و ئانتالیا دەچن و لەوێوە دەچنە شارە گەشتیارییەکانی دیکەی تورکیا.
خاوەنی کۆمپانیایەک دەڵێت، ئەمساڵ دۆخی گەشتیاری بە بەراورد بە ساڵی ڕابردوو زۆر زۆر گۆڕاوە، ساڵی پار خەڵکی دۆخی سیاسییان لەبەرچاو دەگرت و نەیان دەویست زۆر پارە خەرج بکەن، بەڵام ئەمساڵ چەند بەرامبەر جیاوازە و خەڵکێکی زۆر گەشت دەکەن و هەموو گەشتەکانمان بە پڕی دەڕوات.
ئەو وتی: هەفتانە چەندین گەشتمان هەیە بۆ وڵاتان، بەڵام گەشتیاران زیاتر حەز بە گەشتکردن بۆ تورکیا دەکەن بە هۆی نزیکی هەردوولاوە لە ڕووی کولتووری و ئابوورییەوە، هەروەها بە هۆی بوونی گەشتی ڕاستەوخۆی نێوان سلێمانی و تورکیاوە گەشتیاران زیاتر خواستیان لەسەر گەشتکردنە بۆ ئەو وڵاتە.
ئاماژەی بەوەش کرد، بە بۆنەی هاتنی جەژنی قوربانەوە گەشتەکان زۆر زیادیان کردووە و شوێن نەماوە بۆ گەشتکردن.
ئەو وتی: بە هۆی زۆربوونی داواکاری گەشتەوە زیاد لە 15 ڕۆژە هیچ جێگایەکمان نەماوە بۆ گەشتکردنی تورکیا، بە هۆی ئەوەی زۆر زوو خەڵک شوێنەکانیان کڕیوە بۆ جەژن کە تەنها لە سلێمانییەوە زیاتر لە هەزار و 500 کەس گەشت بۆ تورکیا دەکەن لە جەژندا، ئێستا ئێمە کار لەسەر دوای جەژنی قوربان دەکەین.
لە لایەکی ترەوە، سەرۆکی لیژنەکانی قائیمقامییەتی سلێمانی ڕایدەگەیەنێت ئامادەکاریان کردووە بۆ ڕۆژانی جەژنی قوربان و لەرێگەی لیژنەکانیانەوە ڕێگە بەگران بوونی نرخی شتومەک و بەرزبوونەوەی نرخی هۆتێل و مۆتێلەکان نادرێت.
گۆران قادر سەرۆکی لیژنەکانی قائیمقامییەتی سلێمانی بە PUKmediaی ڕاگەیاند: وەک قائیمقامییەتی سلێمانی بە بەردەوامی لیژنەکانمان لەئەرکدان و لەرۆژانی جەژنیشدا بەکاری خۆیان هەڵدەستن بۆ چاودێریکردنی نرخی شتومەکاکانی ناوبازاڕو شوێنە گشتییەکان.
سەبارەت بە چاودێری نەکردنی نرخی هۆتێل و مۆتێلەکان لەرۆژانی جەژندا وتی: کاتێک ڕێنماییەکان لەلایەن وەزارەتەوە دەردەکرێت دەدرێتە دەستەکان، ئەمڕۆش مەولود جەبار سەرۆکی دەستەی گەشتوگوزار ڕایگەیاندووە چاودێری نرخی هۆتێلەکان ناکرێت و نرخیان بۆ جێگیرناکرێت، ئەوەش وەک ڕێنمایی بڵاوکراوەتەوە، بەڵام ئێمە وەک شاری سلێمانی ڕێگە بەبەرزبونەوەی نرخی هۆتێلەکان نادەین و تەنها هۆتیلە (چوارو پێنج) ئەستێرەییەکان نەبێت کە شێوازێکی تایبەتی خۆیان هەیە.
گۆران قادر وتیشی: لەوەرزە گەشتیاری و بۆنەکاندا بەرێژەیەک نرخی هۆتیلەکان بەرزدەبێتەوە، ئەوەش شتێکی ئاساییە لەبەر ئەوەی ئەوان بە درێژایی وەرزی زستان و سەرما دەچنە سوڕی متبوونەوەو کاریان کەمدەبێتەوە بۆیە لەگەڵ هاتنی ئەو ژمارە زۆرەی گەشتیاران و لۆدێکی زۆر، نرخ لەچاو کاتەکانی تردا ڕێژەیەک بەرزدەبێتەوە.
ڤیزای ستیکەری تورکیا لە سلێمانی ڕاگیراوە
ماوەی چەند ڕۆژێکە لە بنکەی داوانامای ڤیزای تورکیا لە سلێمانی پێدانی ڤیزای تورکیا جۆری ستیکەر و چونە ناوەوەی چەند جارە وەستاوە، کە زیاتر بۆ خوێندکاران و بازرگانانە کە ڤیزای ساڵی وەردەگرن. لە کاتێکدا کە لە نووسینگەکانی بەغدا و هەولێر و دهۆک بەردەوامە.
بە پێی زانیاریەکانی کوردستانی نوێ، لە ناوەڕاستی هەفتەی ڕابردووەوە ئەو جۆرە ڤیزەیە لە ژێر ناوی وەستانی سیستەم لە سلێمانی ڕاگیراوە. بەڵام بە پێی وتەی نووسینگەکانی گەشتیاری لە سلێمانی پێدانی ڤیزای گەشتیاری و ئاسايی بەردەوامە.
فرۆکەخانەی سلێمانیش ڕایگەیاندووە کە بە شێوەیەکی ڕەسمی هیچ شتێکیان لە تورکیاوە پێنەگەیشتوە و گەشتەکانی تورکیا بەردەوامە.[1]
28-08-2017