دوای دەیان ساڵ لە سەرکوت و کۆمەڵکوژی و وێرانکاری کە لەلایەن دەوڵەتە شۆڤینستە یەک لە دوای یەکەکانی عیراقەوە لە دژیان پیادەکراوە، سەرئەنجام خەلکی کوردستان، ڕۆژی 25 سەپتەمبەر لە ژێر گوشار و هەرەشەیەکی گەورە و فراوانی ناوخۆیی و ناوچەیی و جیهانیدا، ڕیفراندۆمڕیفراندۆمیان ئەنجامداو بەدەنگی زۆرینە وتیان بەڵێ بۆ جیابونەوەو سەربەخۆیی کوردستان.
بەدوای ئەم بڕیارەی خەڵکی کوردستاندا، دەسەڵاتدارانی شۆڤێنیست و تائفی لەبەغداو دەوڵەتانی سەرکوتگەرو کۆنەپەرستی ناوچەکەو جیهان لە پێناو بەرژەوەندی و نەخشەکانیان لە ناوچەکەدا، خەریکن بە ناوی پاراستنی یەکپارچەیی خاکی عێراقەوە هەرەشە لەخواست و دەنگی سەربەخۆی خەڵکی کوردستان دەکەن؛ هەر لە هەرەشەی سنورداخستن و ڕێگرتنی هاتوچۆ و گەمارۆی ئابوریەوە تائاستی مانۆری سەربازی. لەهەمویان ڕیسواتر هەڵوێستی ئەنجومەنی ئاسایشی نەتەوە یەکگرتوەکانە کە ڕێگا دەکاتەوە بۆ عەبادی و مالکی و پەرلەمانی بەغدا و دەوڵەتی ئەردۆگان و مەلاکانی ئێران، پەنجەی سزادانی خەڵکی کوردستان ڕابوەشێنن و فەزای ترس و دڵەراوکێ بڵاوبکەنەوە، بۆئەوەی پاشەکشە بە هەنگاوەکانی دوای ڕیفراندۆم بکەن. ئەم هەڵوێستانەی ئەنجومەنی ئاسایش و دەوڵەتانی کۆنەپەرستی ناوچەکەو ئەمریکاو هاوپەیمانەکانی تەواوی بانگەشەکانی حزبەکانی کوردایەتی بە درۆ دەخاتەوە کە ئەو دەوڵەت و دامەزراوە ئەمپریالیستانەی وەکو دۆستەکانی خەلکی کوردسان و مافی مرۆڤ و ئاسایشی جیهانی دەناساند. مێژوی ئەو ڕێکخراوو دەوڵەتانە پرە لە شەرعیەتدان و بەڕێخستنی سیاسەتی داگیرکاری و شەری دراندانەو وێرانکاری و کوشتاری بەکۆمەڵی مرۆڤ لە تەواوی جیهاندا.
ئەمرۆ جەماوەری خەڵکی کوردستان تەنیا لەبەرئەوەی سەرەتاییترین مافی خۆیان پیادە بکەن، خراونەتە ژێر باری گوشار و هەرەشەی برسیکردن و تەنانەت پەلاماری سەربازیش! حکومەت و پەرلەمانی ناسیۆنال- فاشیست و تایفەگەری بەغدا، ڕژێمی مەلا چنگ خوێناویەکانی ئێران، دەوڵەتی فاشیستی ئەردۆگان، دەستیان کردوە بە جۆرەها مانۆڕی سەربازی و کەڵبەی خویناوی سوپا و میلیشیاکانیان نیشانی خەڵکی کوردستان دەدەن، بۆئەوەی ناچاریان بکەن لە بڕیاری ڕیفراندۆم پەشیمان ببنەوەو مل بدەن بەو بڕیارانەی بە زۆر بەسەریاندا دەسەپێنرێت.
خەڵکی کوردستان 3 ساڵە بەرامبەر بەربەریەتی داعش ڕاوەستاون. 3 ساڵە ئەم خەڵکە بەشێوازی جۆرواجۆر بەرگری لە خۆیان و لە مەدەنیەت دەکەن. بەرامبەر بەدڕندەیەک دەجەنگن کە دەستکردی ئەمریکا و دەوڵەتانی ئەمپریالسیت و ڕژێمە گوێلەمستە ناوچەییەکانیانە. کەچی ئەمڕۆ لەگەل دەستبردن بۆ سەرەتاییترین مافی خۆیان کە بریتیە لە ڕیفراندۆم بۆ هەلبژاردنی ئایندەی دڵخوازی خۆیان، دەکەونە بەرامبەر گەلەکۆمەیەکی گەورەی جیهانی و ناوچەیی. ئەگەر ئەم لۆژیکە ڕێگای پێبدریت، ئیتر سەراسەری جیهان دەبێتە کۆیلە و دیلی دەستی ئەم دەوڵەتە سەرکوتگەر و ئەمپریالیستیانە.
خەڵکی ئازادیخوازی جیهان!
ریکخراوە کرێکاری و سۆشیالیستی و مرۆڤدۆستەکانی جیهان!
خەڵکی کوردستان تەنها بەهۆی پیادەکردنی مافێکی سەرەتایی خۆیەوە، کەوتوەتە بەردەم هەڕەشەیەکی گەورە و هەمەلایەن! گەلەکۆمەیەکی گەورەی ناوچەیی و جیهانی دەیەوێ ئیرادەی ئەم خەڵکە ستەمدیدەیە بشکێنێ و ملکەچی بکاتەوە بەو ئەسارەتەی دەیان ساڵە لە دژی بەڕێوەدەبرێت. خەڵکی کوردستان پێویستی بە هاوپشتی و بەدەنگەوەهاتنی ئیوە هەیە. دەنگی نارەزایەتیتان بەرز بکەنەوە، گوشار بخەنە سەر دەوڵەتانی زلهێز و نەتەوە یەکگرتوەکان بۆ دەستهەڵگرتن لەم گوشارانە ولە دەست ئاوەڵاکردنی دەوڵەتانی فاشیستی ئیسلامی و قەومی ناوچەکە کە هەڕەشە لە خەلکی کوردستان بکەن. ئێوە بوون فریای خەڵکی کۆبانی کەوتن و سەرکەوتنێکتان بۆ مرۆڤایەتیی ئازادیخواز تۆمارکرد. ئەمرۆش کاتی ئەوەیە بۆبەرگری لە مرۆڤایەتی و ئازادی، دەنگتان بەرزکەنەوە. پشتیوانی لە خواستی خەڵکی کوردستان بکەن بۆ دامەزراندنی دەوڵەتی سەربەخۆ.
کرێکاران، خەلکی ئازادیخوازی عێراق!
ئەوەی خەڵکی کوردستان لە ڕیفراندۆمی 25ی سەپتەمبەردا بریاریان لەسەر داوە، تەنها ڕاگەیاندنی ئەوەیە کە دوای دەیان ساڵ لە ستەم و شەڕ و کوشتارێک کە هەموو جەماوەری خەڵکی عیراق قوربانیەکەی بوون، دەیانەوێ جیاببنەوە و لەگەل خەڵکی عیراقدا وەکو دوو دراوسێ و دۆست و پشتوپەنا و هاوکاری یەکتربن. بەڵام دەسەڵاتدارانی عێراق دەیانەوێ خۆڵ بکەنە چاوی خەڵکی عێراقەوە. دەیانەوێ شەڕی نەتەوەیی و تائیفی و کۆمەڵکوژی بەرپا بکەن. ئەمانە دەیانەوێ میراتە فاشیستیەکانی ڕژێمی ئەنفالچی و کیمیابارانی بەعس زیندووبکەنەوە. ئێمە بانگەوازتان دەکەین نەک هەر فریوی ئەم هاتوهاوارە فاشیانەیە مەخۆن، بەڵکو بەهەموو تواناوە بەرامبەری ڕاوەستن و هاوپشتی و هاوچارەنوسی خۆتان لەگەل خەڵکی کوردستان نیشانبدەن. دەستی ئەم سەرکوتگەرانە ببەستن لەوەی خەڵکی کوردستان بخەنە ژێرگوشارو هەڕەشەوە. خەڵکی کوردستان نەک هیچ کێشە و ناکۆکیەکی لەگەڵ خەڵکی کرێکار و ئازادیخوازی عەرەبزمان نییە، بەڵکو ئەوان بە هاوچارەنوسی خۆیان دادەنێن. ئەوە دەوڵەتانی فاشیستی عیراق و شەڕو ڕکەبەری نەتەوەیی ناسیۆنالیزمی کورد و عەرەبە کە پێکەوە ژیانی ئەم خەڵکەیان دژوار کردوە. دوای دەیان ساڵ ستەم، خەڵکی کوردستان دەبێت ئازادبن لەوەی چۆن ئایندەی خۆیان دیاری دەکەن. خەڵکی ئازادیخوازی عێراقیش پێویستە پشتیوانی لەم مافە سەرەتاییەی خەڵکی کوردستان بکەن.
کریکاران، جەماوەری ئازادیخوازی تورکیا و ئێران!
ئەحزابی سیاسی و ڕیکخراوەکانی لایەنگر لە ئازادی و مرۆڤایەتی لە ئێران و تورکیا!
دوو دەوڵەتی سەرکوتگەر و مرۆڤکوژی ئەردۆگان و مەلاکانی ئێران زۆر دڕندانە خەڵکی کوردستانی عێراقیان خستوەتە بەردەم هەرەشەی هەمەلایەنە، تەنها لەبەرئەوەی ئەو خەڵکە دوای دەیان ساڵ ستەم و کوشتاری بەکۆمەڵ لە ڕیفراندۆمێکدا بریانداوە ئیتر لە گەڵ عێراق نەمێننەوەو دەوڵەتێکی سەربەخۆ دروست بکەن. ئەم دوو دەوڵەتە کۆنەپەرستە جگە لە هەڕەشە و گوڕەشەکانیان، هانی دەمارگیری نەتەوەپەرستی تورکی و فارسی دەدەن بۆ تێکدانی فەزای نێوان خەڵکی ناوچەکە. خەڵکی کوردستان هیچ کێشەو گرفتێکی لەگەڵ هیچ خەڵکێکی دیکە نیە. خۆی بە هاوپشت و هاوچارەنوسی هەموو جەماوەری کرێکارو ئازادیخوازی ناوچەکە و جیهان دەزانێت. ئێمە بانگەوازتان دەکەین دژی سیاسەتە دژی ئینسانیەکانی ئەم دوو دەوڵەتە فاشیستە ڕاوەستن و هاوپشتی خۆتان لەگەڵ خەڵکی ستەمدیدەی کوردستان نیشان بدەن.
حزبی کۆمۆنیستی کرێکاریی کوردستانحزبی کۆمۆنیستی کرێکاریی کوردستان
28-09-2017