ڕۆژنیوز - سۆران و ڕێزان
مانگێک تێپەڕ دەبێت، بەسەر هاتنە ناوەی هێزەکانی سوپای عێراق بۆ ناوچە دابڕێندراوەکان، بەپێی ئامارەکانی بەڕێوەبەرایەتی پۆلیسی کەرکووک، لە ماوەی ئەم مانگەدا بە بەراورد لەگەڵ مانگی ڕابردوو، حاڵەتەکانی تەقینەوە و هەڕەشەکردن و کوشتن لە کەرکووک چوار هێندە زیادی کردووە.
درەنگانی شەوی 16ی ئۆکتۆبەری ئەمساڵ، هێزە عێراقییەکان و چەکدارانی حەشدی شەعبی هێرشییان کردە سەر شاری کەرکووک، لەپاش بەرگرییەکی کەم، هێزە کوردییەکان کشانەوە، دواتر دەسەڵاتدارانی هەرێم سەرجەم ناوچەکەکانی سنوری مادەی 140یان بۆ هێزە عێراقییەکان و چەکدارانی حەشدی شەعبی چۆڵ کرد، لەئەنجامی ئەو هێرشەشدا بە دەیان پێشمەرگە شەهید بوون و بە سەدانیش بریندار بوون.
دوای ئەو هێرشانەش ژمارەیەکی زۆر لە هاوڵاتیانی کەرکووک چەکیان هەڵگرت و لەژێر ناوی خۆبەخش ڕووبەڕووی هێزە عێراقییەکان و حەشدی شەعبی وەستانەوە و بەرگریان کرد.
هاوڵاتیانی کەرکووک و ناوچە دابڕێندراوەکان ئاوارە بوون
لەو ڕۆژەدا و لە ڕۆژانی دواتر بەشێک لە هاوڵاتیانی کەرکووک و خورماتوو و داقوق و خانەقین ئاوارەی ناوچەکانی دیکەی باشوری کوردستان بوون و لە کەمپەکاندا نیشتەجێ بوون و بەشێکی دیکەشیان دوای چەند ڕۆژێک لە ئاوارەییان گەڕانەوە ناو ماڵ و حاڵی خۆیان.
حەشدی شەعبی و هێزە عێراقییەکان دوای ئەو هێرشانە دەستیان گرت بەسەر بیرە نەوتەکان، هەروەک شێرکۆ جەودەت، سەرۆکی لیژنەی پیشەسازی و وزە، لە پەرلەمانی هەرێمی کوردستان، لە لێدوانێکی پێشوویدا بۆ ڕۆژنیوز ئاشکرای کرد کە:هەرێمی کوردستان دوای لەدەستدانی شاری کەرکووک-ەوە، زیاتر 55% ی هەناردەی نەوتی لەدەست داوە، کە بریتیین لە نەوتی کێڵگەکانی هاڤانا، بای حەسەن و نەوتی گێڵگەکانی نەوتی باکور و سەربازگەی کەیوان.
پارێزگاری کەرکووک گۆڕدرا
هەر درەنگانی شەوی 16ی مانگ حەیدەر عەبادی فەرماندەی گشتی هێزە چەکدارەکانی عێراق کە هاوکات سەرۆک وەزیرانی عێراقیشە، بە بڕیارێک ڕاکان عەلی ئەلجبوری جێگری پارێزگای کەرکووکی وەکو پارێزگاری کەرکووک بە وەکالەت دەستنیشان کرد، کە لە نەتەوەی عەرەب بوو.
پاشان لەسەر پۆستی پارێزگاری کەرکووک، ڕزگار عەلی سەرۆکی پێشووی ئەنجومەنی پارێزگای کەرکووک پارتی و یەکگرتوو بە هۆکاری هەڵنەبژاردنی پارێزگار ناوبرد و لە لێدوانێکیدا بۆ ئاژانسی ڕۆژنیوز ڕایگەیاند کە لیستی کوردستانی 26 ئەندامی ئەنجومەنی هەیە، بەبێ بەشداری ئەوانی تر دەتوانێت پارێزگار و سەرۆکی ئەنجومەن هەڵبژێرێت، بەڵام پارتی و یەکگرتوو نەچوونە کۆبونەوەکانی ئەنجومەنەوە.
هاوڵاتیانی خانەقینیش لە دوای ئەو هێرشانە بەشێکی زۆریان ئاوارە بوون، هەربۆیە دوێنێ چوارشەممە، لە شارۆچکەی خانەقینی سەر بە پارێزگای دیالە، فەرماندەی فیرقەی پێنج-ی سوپای عێراق و ژمارەیەک لە فەرماندەکانی هێزە عێراقییەکان لە سنووری پارێزگای دیالە، لەگەڵ شێرکۆ میروەیس، لێپرسراوی مەڵبەندی خانەقینی یەکێتی نیشتمانی کوردستان و قائیمقامی شارۆچکەکە و ژمارەیەک لە فەرماندەکانی پێشمەرگە، لە بینای قائیمقامییەتی شارۆچکەی خانەقین کۆبوونەوە، لە کۆبوونەوەکەشدا ڕێککەوتن لەسەر ئەوەی کە دۆسیەی ئەمنی شارۆچکەکە، بەهاوبەشی لە نێوان هەرێم و عێراق-دا بەڕێوەببرێت، بۆ ئەو مەبەستەش هێزە ئەمنییەکانی هەرێمی کوردستان دەگەڕێنەوە شارۆچکەکە.
حەشدی شەعبی لەو ناوچانە دەستیان کرد بە سووتاندنی ماڵان
بە گوێرەی زانیاریی و لێدوانەکانی ئاوارەکانی خورماتوو کە پێشتر بۆ ڕۆژنیوز ڕایانگەیاندبوو، حەشدی شەعبی دوای هێرشەکانیان بۆسەر ئەو ناوچانە دەستیان دەکرد بە سووتاندنی ماڵان و تاڵانکردنیان و دەستدرێژیان دەکردە سەر کچەکان و ڕفاندنی هاوڵاتیانی کورد و ئەشکەنجە و ئازاردانیان.
باشوری کوردستان بێجگە لە لەدەستدانی 52%ی خاکەکەی و 55%ی نەوتی هەناردەکراوی و داهاتی فڕۆکەخانەکان، پێگەی سیاسی لە عێراق و ئاستی نێودەوڵەتیدا لەدەستداوە، کە چاودێرانی سیاسی هۆکارەکەی بۆ ئەنجامدانی ڕیفراندۆم و پێداگری تاکڕەوانەی بارزانی دەگێڕنەوە بۆ ئەنجامدانی ڕیفراندۆم.
شکستەکانی دوای ڕیفراندۆم ئەوەندە گەورە بوون بۆ باشوری کوردستان، کە بارزانی ناچارکرد کە دەست لە پۆستەکەی بەربدات وەک سەرۆکی هەرێم، کە ماوەی 12 ساڵە لەو پۆستەدابوو، دوای تەواوبوونی دوو خولی یاسایی، دوو ساڵی بە نایاسایی بۆ نوێ‌ کرایەوە لە پەرلەمانەوە، دوو ساڵیشە بەنایاسایی لەو پۆستەدا ماوەتەوە.
ڕووداوە ئەمنیەکان لە کەرکووک، بۆ زیاتر لە پێنج هێندە زیادی کردووە
بە بەراورد بە مانگی ڕابردوو، ڕووداوە ئەمنیەکانی شاری کەرکووک، بۆ چوار هێندە زیادی کردووە
دوای تێپەڕ بوونی مانگێک بەسەر کۆنترۆلکردنی شاری کەرکووک لەلایەن هێزە عێراقییەکان، حاڵەتەکانی تەقینەوە و هەڕەشە کردن و کوشتن له و شارە بۆ چوار هێندە بەرز بوەتەوە.
ئاماری ڕووداوەکانی لە ڕۆژی 15-9 تاوەکو 15-10-2017
تەقینەوەی بۆمب: چوار حاڵەت، ئۆتۆمبێلی بۆمبڕێژ کراوە: یەک حاڵەت، تەقاندن ڕۆمانە: چوار حاڵەت، کوشتن: دوو حاڵەت، تەقە کردن: چوار حاڵەت، دزیکردن: چوار حاڵەت، دزینی ئۆتۆمبێل: 10 حاڵەت، دۆزینەوەی تەرمی نەناسراو: چوار حاڵەت، ڕفاندن: هیچ حاڵەتێک تۆمار نەکراوە، تەقاندنەوەی خانووی هاوڵاتیان: هیچ حاڵەتێک تۆمار نەکراوە و هەڕەشەکردن بەچەک: دوو حاڵەت، کۆی گشتی هەموو ڕووداوەکان دەکاتە 35 حاڵەت.
ڕووداوەکانی کەرکووک لە ڕۆژی 16-10 تاوەکو 13-11-2017
تەقینەوەی بۆمب: 19 حاڵەت، تەقینەوەی خۆکوژی: دوو حاڵەت، تەقینەوەی ڕومانە: 8 حاڵەت، کوشتن: حەوت حاڵەت، تەقەکردن: 29 حاڵەت، دزیکردن : 64 حاڵەت، دزینی ئۆتۆمبێل: 19 حاڵەت، دۆزینەوەی تەرمی نەناسراو: 15 حاڵەت، ڕفاندن: سێ حاڵەت، تەقاندنەوەی خانوی هاوڵاتیان: سێ حاڵەت و هەڕەشەکردن بە چەک: 12 حاڵەت، کۆی گشتی هەموو ڕووداوەکان دەکاتە 181 حاڵەت.
بەمشێوەیە ئەگەر سەیری بەرزبوونەوەی حاڵەتەکان بکەین، دەبینین کە لە کۆی گشتی حاڵەتەکاندا، بەڕێژەی زیاتر لە پێنج هێندە زیادی کردووە.[1]
16-11-2017