دواڕۆژ، #کۆچەر عەلی#
بەهۆی بەردەوامی دیاردەی سواڵکردن لە شوێنە گشتییەکان و ترافیکەکان، لیژنەکانی قایمقامی #هەولێر# هەڵمەتێکیان بۆ دەستگیر کردنی #سواڵکەر#انی دەستپێکرد و بەپێی ئامارێکی قایمقامییەتی هەولێریش ساڵی ڕابردوو زیاتر لە هەزار و 286 سواڵکەر دەستگیرکراون.
نەبەز عەبدولحەمید، قایمقامی هەولێر، بە دواڕۆژی ڕاگەیاند، هەرچەندە ساڵی پار ژمارەیەکی زۆریان لە خەڵکی سواڵکەر لە شوێنە گشتییەکان و ترافیکەکان دەستگیرکرد، بەڵام ماوەی چەند ڕۆژێکە دیاردەی سواڵکردن لە هەولێر سەری هەڵداوەتەوە.
وتیشی دوێنێ چوارشەممە 3ی کانونی دووەمی 2018 تیمەکانی پۆلیسی شارەوانی لە ناو شاری هەولێر هەڵمەتێکی دەستگیرکردنی ئه و سواڵکەرانەیان دەستپێکرد و زیاتر لە 50 کەسیان دەستگیر کردووە و دواتر ڕادەستی پۆلیسی نەهێشتنی تاوانیان کردن.
نەبەز عەبدولحەمید، ئەوەشی خستەڕوو، بەشێک له و کەسانە بەناوی سواڵکردن لە دەرگای ماڵان دەدەن، بەڵام گەر بزانن خاوەن ماڵ لە ماڵ نیە دەرگاکە دەکەنەوە و کەلوپەل دەدزن و هەندێ جاریش پارە و زێر لە خەڵک دەدزن.
بە پێی ئاماری لیژنەکانی قایمقامی هەولێر لە ماوەی ساڵی ڕابردوودا 741 سواڵکەریان دەستگیر کردووە کە تەمەنیان لە خوار 18 سالی بووە و لە ترافیکلایتەکان سواڵیان کردووە و بە هەمان شێوە 545 سواڵکەری تریشیان دەستگیر کردووە کە تەمەنیان لە سەروی 18 ساڵییەوە بووە.[1]
#04-01-2018#