بۆ هاوسۆزی بەرخۆدانی خوشک و برایانمان لە #عەفرین# و بەشداری ماتەمینی لەگەڵ کەسوکاری شەهیدانی عفرین، مەراسیمی یادکردنەوەی (23)ەمین ساڵیادی دامەزراندنی YNDK و هەموو چالاکیەکمان لەم بارەیەوە ڕادەگرین.
- جەماوەری وڵاتپارێزی کوردستان...
- حزب و لایەن و ڕێکخراوەکانی کۆمەڵگەی مەدەنی...
- کەسوکار و بنەماڵەی سەربەرزی شەهیدانی کوردستان...
دوای ئەوەی لەشکری داگیرکەری تورکیا گەورەترین هێرشی کردە سەر کانتۆنی عفرین و ڕۆژئاوای کوردستان و، ماوەی دوو مانگە تورکیا بەهاوکاری چەتەکانی بەناو (سوپای سوریای ئازاد) و تاقمی تیرۆریستی داعش و، بە بەشداری دەیان فڕۆکەی جەنگی و سەدان تانک و تۆپ بۆردومانی ناو شاری عەفرین دەکەن و هەزاران سەرباز و چەتەی ڕژێمی تورکیا لە زەمینەوە بەچەکی قورس هێرش دەکەنە سەر شاری عفرین و بەهۆیەوە سەدان هاوڵاتی سڤیل شەهید و بریندار و ئاوارەبوون، ئەوەی تورکیا بەرامبەر عفرین دەیکات کۆمەڵکوژییە و لەچوارچێوەی ئه و پیلانانەدایە کە وڵاتانی ناوچەکە دژی گەلی کوردستان پەیڕەوی دەکەن، تورکیا هەر بە عفرین نەوەستاوە بەڵکو چەند ڕۆژێکیشە بەهەمان مەبەست هاتۆتە ناو خاکی باشووری کوردستان، ئەوەی جێگەی داخە زلهێزانی وەکو ڕوسیا و ئەمریکا و ڕێکخراوەکانی نەتەوه یەکگرتووەکان UN و وڵاتانی ئەوروپا بەرامبەر ئەو کۆمەڵکوژییە بێدەنگن و ئارەقەی شەرمەزاریان لێدەتکێت.
بەرخۆدانی شەرڤانان و خەڵکی خۆڕاگری عفرین بۆ ماوەی دوو مانگ لە ناو شارێکی بچوکدا گورزی کوشندەیان لە لەشکری تورکیادا، کە دووەمین سوپایە لەناو ناتۆدا، ئەو ئیرادەیەی لە عفرین پیشاندرا، گەرەنتی سەرکەوتنی گەلی کوردستانە لە ڕۆژئاوای وڵات و هەموو بەشەکانی کوردستان، گەلی کوردستان کە سەدان ساڵە بەئیڕادەوە بەرگری لەخاک و وڵاتەکەی دەکات، جارێکی دیکە ئەو ئیڕادەیەی لەعفرین دژی داگیرکەران و دوژمنان پیشاندا.
ئێمە له یەکێتی نەتەوەیی دیموکراتی کوردستان YNDK ئه و کۆمەڵکوژییەی تورکیا دەرهەق بە عفرین دەیکات بەتوندی ئیدانە و شەرمەزار دەکەین، لەهەمان کاتدا پشتیوانی خۆمان بۆ خۆڕاگری و بەرخۆدانی شەرڤانان و خەڵکی عفرین و خەباتی ڕەوای گەلی ڕۆژئاوای کوردستان دەردەبڕین و، لێرەوە پرسە و سەرەخۆشی خۆمان بە ماڵباتی شەهیدان ڕادەگەیەنین و هیوای زوو چاکبوونەوەش بۆ بریندارەکان دەخوازین، بە باوەڕی ئێمە هێرش بۆ سەر عفرین هێرشە بۆ سەر تەواوی کوردستان، بۆیە ئەڕکی هەموو لایەکمانە دژی ئەو پیلانانە بوەستینەوە، باشترین وەڵامیش بۆ بەرپەرچدانەوەی ئەم هێرشە و تەواوی پیلانەکانی داگیرکەران یەکدەنگی و یەکڕيزیمانە, لەم پێناوەشدا پێویستە هەموو هەوڵێکمان بخەینە گەڕ و هەموو ڕێگایەک بگرینەبەر، تا کۆمەڵگەی نێودەوڵەتی بەهانای خەڵکی عفرينەوە بێن و لەو جینۆسایدە ڕزگاریان بکەن.
ئه و ڕووداوانە هاوکاتن لەگەڵ جەژنی نەورۆز و (23)ەمین ساڵیادی دامەزراندنی YNDK، ئێمە لە یەکێتی نەتەوەیی دیموکراتی کوردستانYNDK ڕایدەگەیەنین بۆ هاوسۆزی بەرخۆدانی خوشک و برایانمان لە عفرین و بەشداری ماتەمینی لەگەڵ کەسوکاری شەهیدانی عفرین، مەراسیمی یادکردنەوەی (23)ەمین ساڵیادی دامەزراندنی YNDK و هەموو چالاکیەکمان لەم بارەیەوە ڕادەگرین و، ڕایدەگەیەنین بەرخۆدان و خۆڕاگڕی عفرین بەرۆحی نەورۆزەوە بەردەوامە و لەکۆتاییشدا سەرکەوتن بۆ عفرینە و، شاری عفرین دەبێتە گۆڕستان بۆ جەندرمەکانی تورک و چەتە و تیرۆریستان.
- نەمری و سەربەرزی بۆ شەهیدانی عفرین و تەواوی شەهیدانی کوردستان.
- مردن و ڕوورەشی بۆ دوژمنان و داگیرکەرانی کوردستان.
مەکتەبی سیاسیی
یەکێتی نەتەوەیی دیموکراتی کوردستان YNDK
#19-03-2018# هەولێر- باشووری کوردستان