لە مێژووی گەلاندا هەندێک ڕووداو هەن کە دواجار ئەبنە سومبوڵ و هێمای بوونی مێژوویی ئەوان. نەورۆزیش لە بوونی مێژوویی ئێمەدا یەکێکە لەو ڕووداوانە. نەورۆز لەسەر بنەمای تێکۆشان دژی چەوسانەوەو ژێردەستی هاتۆتە گۆڕێ. لە دژی زوڵم و زۆر و داگیرکاریی و کۆیلایەتی بۆتە ئەستێرەی ئاسمانی ئازادی و ڕزگاریی.
لە پرۆسەی درێژی تێکۆشاندا، خەڵک سەرکەوتنەکانی خۆیان وەک دەستکەوت ئەهێڵنەوەو ئەیکەنە سومبوڵێکی شادی. نەورۆز بە هێمای ئاگرەوە بۆتە ڕووناکیی ڕێی ڕزگاری و ئازادی. هەروەک چۆن نەورۆز بۆ خەڵکی کورد بۆتە نمونەی تێکۆشان و سەرکەوتن، بە هەمان ناوەرۆکی شۆڕشگێڕیەوە بووە بە جەژنی زۆرێک لە خەڵکی ڕۆژهەڵاتی ناوەڕاستیش.
هەمیشە دەسەڵاتداران ئەو جەژنانەیان لە خەڵک قەدەغە کردووە کە پڕ ناوەرۆکن و بوون بە سومبوڵی تێکۆشان لەدژی ژێردەستی. کۆت و بەندیان لەسەر داناون. ئەوانەش کە پیرۆزیان کردوون، بە خائین و دوژمن ناوزەدیان کردوون.
دەولەتی ئێران هەرچەند بە فەرمی یادی نەورۆز ئەکاتەوە، بەڵام کاتێک خەڵکی کورد ئاهەنگی نەورۆز ئەگێڕن، هێرش ئەکەنە سەریان و لێیان قەدەغە ئەکەن. ڕژێمی بەعسی ئێراقیش هەمان ڕەفتاری ئەکرد و نەیئەهێشت خەڵک بەدڵی خۆیان ئاهەنگی نەورۆز بگێڕن. ڕژێمی بەعسی سوریاش بە هەمانشێوە سەبارەت بە نەورۆز درێژەپێدەری هەمان سیاسەتی نەیارانە بووە. لە ناو دەوڵەتانی داگیرکەردا، هەرە نەیاری نەورۆز دەوڵەتی تورکیا بوو. هەتا ساڵی 2010 ش تورکیا زۆر بە توندی قەدەغەی خستبووە سەر نەورۆز. نەورۆزی وەک جەژنی تورکەکانی ئاسیای ناوەڕاست ئەناساند. بەڵام ڕێگای نەئەدا کە کوردان نەورۆز پیرۆز بکەن. ئەمەش لەبەر ئەوەبوو کە کوردو کوردستانیان ئاهەنگی نەورۆزیان بە ناوەرۆکی خۆیەوەو بە ئامانجی ئازادی و ڕزگاریی ئەگێڕا.
ئێستا خەڵکی کوردستان و هاوسەنگەرانیان، بە ڕەنجی خۆیان نەورۆزیان سەپاندووە. لە سەرانسەری کوردستان و هەندەران بە هەمان ناوەرۆکە شۆڕشگێڕی و ئازادیخوازیەکەیەوە، بە شادییەکی زۆرەوە ئاهەنگی نەورۆز ئەگێڕن. خەڵکی کوردستان بە تێکۆشانی ڕەوای خۆی ملی بە داگیرکەران کەچ کرد کە ئیتر ناتوانن نەورۆزی لێ قەدەغە بکەن. کوردان لە هەر جێیەک، لە شارو گوند و زیندانیشدا نەورۆزیان کردۆتە سەنگەری خەباتی ئازادی و ڕزگاری.
ئەمڕۆ ئاگری نەورۆز لە هەموو کوردستاندا گەشاوە ترە. لە باشوورو ڕۆژاوا بە فەرمی ئاهەنگ ئەگێڕن. لە ڕۆژهەڵات و باکوریش وەک سەنگەری تێکۆشان یاد ئەکرێتەوەو بەردەوام گڕو بڵێسەی بڵندتر ئەبێت.
ئێمە ئەمساڵ لەژێر هێرشی داگیرکەراندا پێشوازیی نەورۆز ئەکەین. وا دوو مانگە دەوڵەتی تورکیا بە هەموو هێزی خۆی و بە هاوکاریی چەتەکانی داعش و ئەلنوسرە و ئەوانی دی، هێرش ئەکاتە سەر عەفرین. مناڵ و پیرو ژن کۆمەڵکوژ ئەکات، دێ و دێهات و شارۆچکان تاڵان و وێران ئەکات. لەبەرامبەر ئەم هێرشانەشدا، هێزەکانی یەپەگەو یەپەژە و قەسەدە و گەلی عەفرین، بەرخۆدانێکی بێوێنە و قارەمانانە ئەکەن. نەورۆزی ئەمسال نەورۆزی خاوەندارێتییە لە عەفرین. بەرخۆدەران و شەڕڤانانی عەفرین، هەڵگری مەشخەڵی نەورۆزی سەردەمن. پێویستە لە سەرانسەری کوردستان و هەموو قوژبنێکی ئەم دنیایەدا، بە گیانی خاوەندارێتی لە بەرخۆدانی عەفرین پێشوازی لە نەورۆز و بکرێت و یاد بکرێتەوە.
یەکێکی تر لە هێما گرنگەکانی نەورۆز، نەتەوەییبوونیەتی. نەورۆز جەژنێکی میللی و نەتەوەییە. نەورۆز باوەشی بۆ هەموو لایەکی کۆمەڵگە کراوەتەوە. پێویستە نەورۆز لەم ڕۆژە دژوارانەی خەباتدا ئەو لایەنە گرنگەی خۆی پەراوێز نەخات و پێشی بخات.
پێویستە نەورۆز ببێتە ئەو هێمایەی کە ئیتر داگیرکەران نەتوانن درز بخەنە ناو بزاڤە نەتەوەیی و ڕزگاریخوازەکانی کوردستانەوە. دوژمنی داگیرکەر هەر کە دەستی گەیشتە ناو عەفرین، سەرەتا سومبوڵی نەورۆزی خاپوور کرد. پێویستە هەموو کوردێک ڕاستیی ئەم ڕق و کینەیە ببینێ باش بیناسێت.
ئەرکی هەموومانە کە داگیرکەر لە عەفرین وەدەرنێین و جارێکی دی سومبوڵی نەورۆز لەو مەیدانەدا بەرزتر درووست بکەین.
لەم قۆناغە گرنگەی خەباتی ڕزگاریدا، پێویستە نەورۆز ببێتە مەشخەڵی ڕووناکی بۆ یەکڕیزی و هەماهەنگی تێکۆشانی خەڵکی کوردستان.
#کۆنگرەی نەتەوەیی کوردستان# بەم بیروباوەڕەوە نەورۆز لە تەواوی کوردو کوردستانیان پیرۆز ئەکات.
با نەورۆزی ئەمساڵ ی 2018 ببێتە سەنگەری تەبایی و هەماهەنگی ناوخۆیی و سەرکەوتنی زیاتر.
بە گیانی بەرخۆدانی عەفرین گڕی نەورۆز گەشتر بکەن.
نەورۆزتان پیرۆزبێت!
کۆنسەی بەڕیوەبەریی کۆنگرەی نەتەوەیی کوردستان - ک.ن.ک
#20-03-2018# - بڕۆکسل