لەدرێژەی پەلامارەکانی بۆ سەر سەروەری خاکی هەرێمی کوردستان و عێراق، شەوی ڕابوردوو، فرۆکە جەنگییەکانی حکومەتی تورکیا، بوردومانی گوندەکانی دۆڵی باڵەیان-یان،لە سنوری قەزای چۆمانکردووە. بەداخەوەبەهۆیەوە، لەگوندی سەرکان (4) هاوڵاتی مەدەنی، بەناوەکانی (کاکە مستەفا وەرتی، کاکە سمایل ئاغا وەرتی، دەرباز محەمەد یونس، شەرۆ مەحمود)، کە ئەندامی #یەکێتیی نیشتمانیی کوردستان# بوون و لەگوندەکەیاندا،بەبێ ئەوەی تاکە چەکدارێکی تیابێ، سەرقاڵی ژیانی ئاسایی خۆیان و بەرێکردنی جەژنی نەورۆز بوون، بوون بە قوربانی سیاسەتی شەڕنگێزی لە ناوچەکەدا.
سەرباری ئیدانەکردنی ئەم کردەوە تاوانکارییە و پەزاندنی سەروەری خاکی هەرێمی کوردستان و عێراق و بەئامانجگرتنی هاوڵاتیانی مەدەنی لەو گوندانەی، کە هیچ جۆرە جموجۆلێکی چەکداری تیانیە. پێویستە دەوڵەتی تورکیا کۆتایی بەم پەلامارانە بیهێنێت. بێگومان لەرووی یاساییەوە بەرپرسیارێتی قەرەبووکردنەوەی ماددی و مەعنەوی کەسوکاری شەهیدان و زیانلێکەوتووەکان دەکەوێتە ئەستۆی حکومەتی تورکیا، کە بەئاشکرا تیرۆری ئاسمانی بەسەر هاوڵاتیانی مەدەنیدا دەسەپێنێ.
ئەم کردەوانە لەکاتێکدایە، ئاماژەکانی داگیرکردنی عەفرین و هەڕەشەکان لەسەر کۆبانی و منبج و ڕمێلان و قامیشلۆ، بوردومانی گوندەکانی هەرێمی کوردستان، نیشانەی ئەوەن لەدوای سەرکەوتن لەشەڕی بەرەیی بەرامبەر بە داعشە تیرۆریستەکان، بەرنامەی تری ئیقلیمی لەئارادایە و ڕۆژهەڵاتی ناوەڕاست و ناوچەکە، بەرەو ڕووبەرووبونەوەو تەقینەوەی گەورە دەچێت، سەرەنجام مەترسی گەورە لەم هەلومەرجە مێژووییەدا ئەوەیە، کێشەکان لەنێوان زڵهێزەکان و دەوڵەتانی ئیقلیمی، بە زیان بۆ سەر ستراتیژی چارەسەری دیموکراسی و خەباتی چارەنوسخوازانەی نەتەوەی کورد بشکێتەوە و ڕێکەوتنێکی تری وەک (لۆزان) لەناوچەکەدا بسەپێنرێتەوە.
سیاسەتی پەرەپێدانی شەڕ لەلایەن حکومەتی تورکیاوە، بەو ئامانجەیە کە نەخشەی سیاسی و جوگرافی ناوچەکە، لە بەرژەوەندی ئاکپارتی بشکێتەوە.
لەبەرامبەر ئەم دۆخە مەترسیدارەدا، دیسانەوە دووپاتی دەکەینەوە، بەداخەوە تائێستا سیاسەتی هێزە سیاسیەکانی بەشەکانی کوردستان، نەک دەرکی ئەم پیلانگێڕانیە مەترسیدارانەیان دژبە ئیردەی کورد نەکردووە. بەڵکو کێشە سیاسیەکانی نێوان هێزە کوردستانیەکان لە ڕۆژئاواو باشور زیاتر لێکترازاوە. ئەمە لەکاتێکدایە لەدوای کارەساتی (16)ی ئۆکتۆبەر، تائێستا حکومەتی عێراقی ئامادەنیە سەرجەم کێشەکان چارەسەربکات ومادەی (140) و تەواوی دەستور جێبەجێ بکات.
هەروەها ڕۆژئاواش لەبەردەم پیلانێکی عەسکەری ترسناکدایە، باشوری کوردستانیش لەبەردەم هەڵبژاردنێکی چارەنوسازدایە. بەڵام بەداخەوە جگە لە بەیاننامە و سۆز دەربرین، لەبەرامبەر قوربانیەکان، هیچ جۆرە ستراتیژێکی نوێ بۆ چارسەری کێشە و ناکوکی لەنێوان هێزە سیاسیەکانی بەشەکانی کوردستان، بۆ بەرپەرچدانەوەی ئەم پیلانە مەترسیدارانە لەئارادانیە.
یەکێتی، دیسان جەختدەکاتەوە، بۆ ئەوەی هاوڵاتیانی ئێمە لە هیچ بەشێکی کوردستان دووچاری زیاتر لەم کارەساتانە نەبنەوەو پیلانە گەورەکان بەدڵی ئەو حکومەتانە نەسەپێنرێ، کە مافە دیموکراسیەکانی گەلەکەمان ناسەڵمێن، دووپاتیدەکەینەوە، چارەسەری ناوخۆیی هێزە کوردستانیەکان لەلایەک و دەستەبەرکردنی پشتیوانیەکی زیاتری نێودەوڵەتی لەلایەکی تر. هەروەها کات لەدەست نەدرێ بۆ چارەسەرکردنی کێشەکان لەناو عێراق بەپێی دەستورو بەزووترین کات چارەسەرکردنی قەیرانە داراییەکانی گەلەکەمان باشە.
لەکۆتاییدا پرسە و سەرەخۆشی ئاراستەی کەسوکاری شەهیدەکان و خەڵکی تێکۆشەری ناوچەی دۆڵی باڵەیان دەکەین و شەهیدکردنی ئەو پۆڵە کادرە گەنجەی یەکێتی، بەزیانێکی گەورە دەزانین.
راگەیاندنی مەکتەبی سیاسی
یەکێتیی نیشتمانیی کوردستان
#22-03-2018#