دواڕۆژ، #ڕەڤەند گوهەرزی#
بەرپرسی ڕاگەیاندن و چاپەمەنی هێزەکانی پاراستنی گەل (#هەپەگە#) ئاشکرای دەکات لە تەواوی باشووری کوردستاندا (هەرێمی کوردستان) نزیکەی پێنج هەزار سەربازی تورکیا بوونیان هەیە.
لەمانگی ئابی ساڵی 1996 سوپای تورکیا لە چەند ناوچەیەکی باشووری کوردستان ژمارەیەکی زۆری بارەگای سەربازیی دروستکرد و بەدەیان تانک و زریپۆشی لەو شوێنانە جێگیرکران و بە سەدان سەرباز و هێزی تایبەتی ئەو وڵاتە لەو پێگە سەربازییە جێگیرکران.
دوای شکاندنی ئاگربەست لە لایەن سوپای تورکیا لە نەورۆزی ساڵی 2013، پرۆسەی ئاشتی لەو وڵاتە کوتاییهات و جارێکیتر شەڕ و پیکدادان لە نێوان هێزەکانی پاراستنی گەل (هەپەگە) و سوپای تورکیا دەستیپێکردەوە.
لەبارەی هەبوونی بارەگاکانی سوپای تورکیا لە ناو خاکی باشووری کوردستان، ڕیڤان وڵات، بەرپرسی ڕاگەیاندن و چاپەمەنی هێزەکانی پاراستنی گەل (هەپەگە) بە دواڕۆژی ڕایگەیاند، لە سنووری دەڤەری بادینان نزیکەی 15 پێگەی سەربازیی سوپای تورکیا بوونیان هەیە.
وتیشی بەپێی زانیارییەکانمان لە ناوچەکانی (#شێلادزێ# و #بامەرنێ# و #زاخۆ# و کانی ماسێ و باتیفا) بە دەیان تانک و زریپۆش و چەکی قورس لەو پێگە سەربازییانە جێگیرکراون.
ئاماژەی بەوەشکرد دوای شکاندنی ئاگربەست لەلایەن تورکیاوە پرۆسەی ئاشتی کوتاییهات، هێزەکانمان هێرش و چالاکییەکانی خۆیان لە ناوچە سنورییەکانی نێوان باشوور و باکووری کوردستان لە ناو خاکی باکووری کوردستان لە دژی سوپای تورکیا زیاترکرد.
بەوتەی ڕیڤان، زۆربەی ئەو چالاکییانەی کە لەلایەن هەپەگەوە لە دژی سوپای تورکیا ئەنجامدەدرێن چەکە قۆرسەکانیان دەکەنە ئامانج و جیا لە کوژرانی سەربازەکانیان.
پێگەیەکی سەربازای سوپای تورکیا لە فڕۆکەخانەی ناحیەی بامەرنێی سەر بە قەزای ئامێدی لە باکووری ڕۆژهەڵاتی پارێزگای دهۆک دانراوە کە یەکێکە لە پێگە هەرە گەورەکانی ناو خاکی هەرێمی کوردستان، ژمارەکی زۆری تانک و چەکی قورسی تورکیای تێدا شاردراوەتەوە.
ریڤان لەبارەی ئه و چەکانەی تورکیا له و ناوچانە، دەڵێت لە هێرشەکانی گەریلاکانمان، نزیکەی چەند مانگێکە سوپای تورکیا تانک و زریپۆش و باجەری سەربازی خۆیان لە ناو تۆنێڵدا شاردووەتەوە، هەندێک جار بەڕۆژ دەیهێننە دەرەوەو دواتر دەیبنە شوێنەکانی خۆیان.
ئەوەشی خستەڕوو، ئێستا سوپای تورکیا لە ناو خاکی باشووری کوردستان لەو شوێنانەی کە بۆیان دەستنیشانکراوە، ناتوانن بەئاسانی هیچ جمۆجۆلێک بکەن.
بەوتەی ڕیڤان، لە ناوچەی زێلکانی سەر بە دەڤەری باشیکی سەر بە پارێزگای نەینەوا سوپای تورکیا ژمارەی سەبازەکانیان زیادکردووە، ئێستا زیاتر لە 2000 سەرباز لەو سەربازگەیەدان و لە تەواوی باشووری کوردستانیش نزیکەی پێنج هەزار سەربازی تورکیا هەن.
بنکەی سەربازی سوپای تورکیا لە ناحیەی بامەرنێ گەورەترین بنکەی سەربازیە لە هەرێمی کوردستان کە دەکەوێتە بەرامبەر ناحیەی بامەڕنی سەر بە قەزای ئامێدی لە پارێزگای دهۆک، هاوکات نزیکەی 40 تانک و زریپۆشی تێدایە.
بەپێی زانیارییەکانی دواڕۆژ سوپای تورکیا 25 بارەگای سەربازی لە سنوری ناحیەی شێلادزێ دروستکردووە.
سەبارەت بە بوونی بنکەو بارەگاکانی سوپای تورکیا لە ناوچەکە، برقی ڕێکانی، دانیشتووی ناحیەی شێلادزێی سەر بە قەزای ئامێدی بە دواڕۆژی ڕایگەیاند بۆ ماوەی چەند ڕۆژێکە بە چاو دەبینرێت کە سوپای تورکیا بارەگاکانی خۆیان لە سنوری ناحیەی شێلادزێ زیادکردووە، بە تایبەت لە سەر چیاکانی دەڤەری نێروەورێکان.
برقی ئاماژە بەوەشکرد بە زیادکردنی بارەگاکانیان لەو ناوچەیە مەترسی لە سەر ژیانی خەڵکی شێلادزێ و دەوروبەری زیادکردووە کە ئێستا نزیکەی 25 بارەگای نوێیان لەو ناوچەیە دروستکردووەو بەپێ زانیارییەکانمان سوپای تورکیا ئامادەکاریی ئۆپراسیونێک دەکات بۆ دەڤەری نێروەورێکان.[1]
#23-03-2018#