ئەمەریکا لەسەر دەستگیرکردنی قەشەیەک شەڕێکی سەختی ئابوری دژ بە تورکیا دەستپێکردووە، بەهای لیرەی ڕسواکردو ئەردۆغان و دەوڵەتەکەی کردە پۆڕی خوراو هێندەی نەمابوو فاتیحەی لەسەر بخوێنین، تەنها بەمەبەستی پاراستنی شکۆی هاوڵاتیەکی ئەمەریکی و دانانی سنوورێک بۆ سەرەڕۆی و دەستدرێژیەکانی ئەردۆغان و دەوڵەتەکەی!!..
کەچی ببینن بە بەرچاوی خۆمان و دنیاوە چەندین ڕۆڵەی ئێمە (زەکی شەنگالی و هەڤاڵەکانی) لە شەنگال شەهیدکران بزانە تەنانەت پرسەنامەیەکیشمان نووسی؟!
ئەوەتا... ئەردۆغان بەبێ سڵکردنەوە شانازی ئەکات بە کوشتنی ڕۆڵەکانمانەوه و خۆی وێنه و ڤیدیۆی شەهیدکردنی سەرکردەی نەتەوەیی و سمبولی بەرخۆدانی گەلەکەمان بڵاوئەکاتەوە.!! ئێمەش پاش بینینی ئه و دیمەنانه و تەواوبوونی دراما تورکیەکە بە تیشێرت و پانتۆڵ و جوتێک کالەی تورکیەوە ئەچینە مارکێت و مۆڵەکان و عەرەبانەکەی دەستمان پڕئەکەین لە خواردن و خواردنەوەی تورکی هەر لە دۆشاو و برنج و نیسک و نۆک و شیرەوە هەتا قاپ و قاچاخ و مەوادی پاکردنەوەی ماڵ..!! دواتریش بۆ مۆبیلیات و ئێکسسواری ماڵ و کەلوپەلی تر سەرێک لە سەنتەرەکانیان ئەدەین و دارو دیوارو ئەرزی ماڵەکانمان بە (مەید ئین تورکی) ئەڕازێنینەوە وەک ئەوەی کە نە بامان دیبێت و نە باران..
ئاخر ئه و بێهەڵوێستی و سەرکزیە وائەکات هیچ ئیعتبارێکمان نەبێت و خوێنی ڕۆڵەکانمان هێندە هەرزان بێت و زوو وشکبێتەوە بەبێ حەق و حیساب..
هەر ئەوەشە وایکردوە کە هێزێکی زۆر لە سنوری سلۆپی و گێمان و جزیرە کۆبکاتەوه و هەرکاتێک ویستی هێرش بکات بیکات...
ئاخر ئەوان باش ئەزانن ئێمە بایی چەندین، باش ئەزانن کوێخاو ئاغاکانمان موریدی خۆیانن و بەیەک فیکە لەسەر یەک قاچ بۆیان ئەوەستن!!..
باش ئەزانن سەدان کوردیش تیرۆر بکات چەندین ڕۆڵەشمان شەهید بکات و هەموو خاکەکەشمان ببێژێت و داگیری بکات.. کەس فزەی لێوەنایەت چونکە ئێمە لەناوخۆماندا یەک نین.. ئێمەین کەڕو لاڵ و کوێر بووین لەپێناو بەرژەوەندیەکانمان، ئێمەین ناتوانین سەرکزی بە سەربەرزی بگۆڕینەوە.. ئێمەین نامانەوێت کۆت و بەندی ژێردەستی بپسێنین و بۆ ئازادی و سەربەستی گەلەکەمان قوربانی بدەین..!!!! ئێمەین کە لە فەرهەنگەکاماندا چیتر خۆشەویستی بۆ خاک و گەل و نیشتمان بەدی ناکرێت...
ئەم دۆخە تاکەی بەردەوام دەبێت؟ دیوەخانەکەی پەرلەمان کەی دێتەدەنگ؟ فراکسیۆنەکان؟ حیزبەکان؟ سیاسیەکان؟ ڕۆشنبیرو چالاکوانان؟
کەی دێنە دەنگ؟؟ دە وەرنە دەنگ با ڕشتنی خوێنی ڕۆڵەکانمان هێندە ئاسان تێنەپەڕێ و چیتر ئه و دەستدرێژیانە قبوڵ نەکرێ...
ئەرێ ئێوەیەک کە خۆتان کردوەتە ڕابەرو دەمڕاست و نوێنەرمان بەراستی پێتانوایە کە بتوانن مافی گەلە خێر لەخۆ نەدیوەکەمان بستێنن لە کاتێکدا کە لە نوسینی پرسەنامەیک بترسن؟؟
هەزاران سڵاو لە گیانی پاکی زەکی شەنگالی و هەڤاڵەکانی..
ڕوحتان شادو ئاسودەبن..
دڵنیابن کە هەزاران کوڕو کچی ئازا کاروانی تێکۆشانی ئێوە درێژە پێدەدەن....
نەفرەت لە کەوا سوورانی بەرلەشکری داگیرکەر!!..
رۆحت شاد کاکە زەکی
#شاناز ئیبراهیم ئەحمەد#
#20-08-2018#