دواڕۆژ، کۆچەر عەلی
بەرپرسێکی حکومەتی هەرێم ڕایدەگەیەنێت: بەهۆی ئەنجامدانی تاوانی جۆراوجۆر 37 کەس بڕیاری لە سێدارەدانیان بۆ دەرچووه و 26 هاوڵاتی بیانیش بەهۆی پەیوەندیان بە #داعش#ەوە لە هەرێمی کوردستان دەستگیر کراون.
ئەمڕۆ سێشەممە 25ی ئەیلولی 2018، دیندار زێباری، ڕێکخەری ڕاسپاردە نێودەوڵەتییەکان لە حکومەتی هەرێم لە کۆنگرەیەکی ڕۆژنامەوانیدا ڕایگەیاند: سەرەڕای قەیرانە داراییەکان لە ماوەی چوار ساڵی ڕابردوودا حکومەتی هەرێم پێشوازی لە نزیکەی (250000) پەنابەری ڕۆژئاوا کردووە و لە هەرێم نیشتەجێ بوون لەوانە (%38) یان بەسەر (9) کەمپدا دابەشکراون (4 لە #دهۆک#، 4 لە #هەولێر#، 1 لە #سلێمانی#) و (%62) ی دیکە لە دەرەوەی کەمپەکان کە لە شارو شارۆچکەکان دەژین. هەروەها هەرێم بووەتە شوێنی حەواندنەوەی زیاتر لە یەک ملیۆن و نیو ڕاگوێزراوی خواروو و ناوەڕاستی عێراق لە پێکهاتە ئایینی و نەتەوەییە جیاوازەکان کە دوای تێکچوونی ڕەوشی ئەمنی و سەرهەڵدانی شەڕی تائیفی لە عێراق ڕوویان لە کوردستان کرد.
وتیشی: نزیکەی 70%ی ئه و خزمەتگوزاریانەی کە بۆ ئاواره و پەنابەران دابین دەکرێت لەلایەن حکومەتی هەرێمەوە بووه و تەنها 30% لەلایەن کۆمەڵگای نێودەوڵەتی و ڕێکخراوەکان دابین دەکرێت و جیا لە بەرێوەبردنی ئەم هەموو ئاواره و پەنابەرهانەش حکومەتی هەرێم ڕەوشی ژنانی لە بابەتە هەرەسەرەکیەکانی خۆی داناوە.
زێباری ئاماژەی بەوەشکرد: بەڕێوەبەرایەتی گشتی بەرەنگاربوونەوەی توندوتیژی دژی ئافرەتان لە (6) بەڕێوبەرایەتی و (28) نوسینگە و چەندین هۆبە پێکهاتووە کە ساڵانە زیاتر لە (9000) سکاڵا لە بەڕێوەبەرایەتی و نووسینگەکانی سەر بەم بەڕێوەبەرایەتیە تۆمار دەکرێت لە هەرێمی کوردستان، ئەم بەڕێوەبەرایەتیە بۆ باشتر ڕاپەراندنی کارەکان و زیاتر بە هانا چوونی کێشەکان لە نێو کەمپەکان (23) تیمی مۆبایلیان پێکهێناوە بۆ ئەوەی لە نزیکەوە ئاگاداری خزمەت بە ئاوارە و پەناهەندەکان بکەن لە سەرجەم ئه و شار وشارۆچکانەی کە ئاوارە و پەناهەندەی تێدایە لە هەرێمی کوردستان.
ئەوەشی خستەڕوو: هەوڵی تەواو دراوە بۆ پاراستنی ئە و ئافرەتانەی کە تووشی کێشە دەبنەوە و توانای گەڕانەوەیان نییە بۆ ماڵی خۆیان، دەنێردرێن بۆ شەڵتەرەکان لەوێدا پەنا دەردێن پاشان ڕەوانەی دادگا دەکرێت بۆ ئەم مەبەستەش ئۆتۆمبێل و پاسەوانی تایبەتیان بۆ دابین دەکرێت، چەندین ئافرەت لە دەزگای دادوەری دامەزراون لەوانە دامەزراندنی ژمارەیەک ئافرەت لە بواری دادوەری، دەیان ئافرەت وەک داواکاری گشتی لە هەرێمی کوردستان دامەزراون لەناویاندا (17) داواکاری گشتی لە هەولێر، (24) داواکاری گشتی لە سلێمانی و #هەڵەبجە#، (7) لە دهۆک و (1) لە #گەرمیان#، (30) دادوەری ئافرەت لە دادگاکانی تێهەڵچوونەوە دامەزروان لە ناویاندا (10) دادوەر لە هەولێر، (14) لە سلێمانی و هەڵەبجە، (5) لە دهۆک و (2) گەرمیان. (94) لێکۆڵەری دادوەری و (289) یاریدەدەری لێکۆڵەری دادوەری لە هەرێم دامەزراون.
رێکخەری ڕاسپاردە نێودەوڵەتییەکان ڕوونیشیکردەوە: حکومەتی هەرێم هەوڵی جددیشی داوە بۆ ڕێگری کردن لە بازرگانی بە مرۆڤ بەگشتی و منداڵان بەتایبەتی و ئه و کەسانەی بازرگانیان بە منداڵانەوە کردوە دەستگیرکراون و لەلایەن دەزگا پەیوەندیدارەکان ڕێکاری یاسایی بەرانبەر ئه و تۆمەتبارانە وەرگیراوەکە ئەم منداڵانەیان بەکارهێناوە، ژمارەی ئه و منداڵانەی کە لە تۆمارەکانی بنکەکانی پۆلیسی نەوجەوانان لەهەرێمی کوردستان تۆمارکراون گەیشتووەتە (786) منداڵ کە تەمەنیان لەخوار (18) ساڵە.
هێمای بۆ ئەوەشکرد: بابەتێکی دیکە کە گوشاری زۆری خستووەتە سەر حکومەت لە ماوەی ڕابردوودا شەڕی داعش بووە، لە ماوەی ساڵانی نێوان 2014-2016 دوو هەزارو 652 کەس بە تۆمەتی پەیوەندییان بە داعشەوە دەستگیرکراون و هەزارز 110 کەس تۆمەتی پەیوەندی کردنیان بە داعشەوە بەسەردا ساغ بۆتەوە بە بەڵگەوە و سزادروان و حوکمی ئەم تاوانبارانەش بریتی بووە لە زیندانی لە نێوان سێ ساڵ تا زیندانی تاهەتایی بەپێی قەبارەی ئه و تاوانەی ئەنجامیانداوە، لەم ژمارەیەی دەستگیر کراون (870) کەسیان بێتاوان دەرچوون و ئازاد کراون، (682) کەسیشیان تا ئێستا لە قۆناغی لێکۆڵینەوەدان.
د. دیندار زێباری ڕاشیگەیاند: حکومەتی هەرێم زیاتر لە پێنج هەزار له و ئێزیدییانەی لە چیای شنگاڵ گەمارۆ درابوون ڕزگاری کردن و گواستراونەتەوە بۆ پارێزگاکانی کوردستان بە هەماهەنگی لەگەڵ ئاژانسەکانی نەتەوە یەگرتووەکان لە کوردستان شوێنی حەوانەوەی تایبەتیانن بۆ دابینکراوە.
لە هەرێمی کوردستا 26 کەس بە تۆمەتی پەیوەندیان لەگەڵ داعش دەستگیر کراون کە ڕەگەزنامەی تورکی و سوریان هەبووە.[1]
#25-09-2018#