ئەنجامنامە:
هەر پاسە کە مزانمێ درۊستکەردەو داعشی جە سەروەختو سەدەمین ساڵیادو پەیمانامەو سایکس – پیکۆی، بە مدرامانو گەلو کوردی و بە شکۆداری تەڤگەرو ئازادی کوردستانی شکست دریا و نەتاواش ئا پڵان و نەخشە کۆنەپەرەستانە جارێ تەر جە وەرهۆرزی میانی سەربگنۆنە و وەڵێ بۋزیۆنە. جەنگ و سەردەستی هێزەکانو مۆدرنیتەو سەرمایەداری جیهانی و ستاتۆ پارێزەکانو هەرێمەکەی، هەر پاسە مدرامان و هێزە ئازادیوازەکا و گەڵە چێر دەسەکا بیێ بە هۆ ئانەیە کە ڕۆچانە فاڕیای تازێ و خێرێ بەیانە وەر . تا ئی وەختە کە ئی کۆنفرانسە ملۆنە ڕاۋە، چنڎین پلانێ و نەخشێ هێزە جیهانیەکان جە هەرێمەکەنە بە تایبەت سەرو خاک و کورداۋە بریا ڕاۋە، بەڵام بە بییەو کۆشای دیموکراتیکی کە هێز جە فەلسەفەو ڕابەر ئۆجەڵانی هۆرمەگێرۆنە و سیستمو کۆنفدرالیسم و دیموکراتیکی و خەتەو یەرەمی سەرجەمشان شکەستشان ئاردەن. ئینە بە ماناو ئانەینە کە جە نەخشەو تازەو ۋەرهۆرزی میانییەنە، پێسەوجارانی یەک یا چنڎ لایەنێ نیەنێ کە بریا مڎانە ، ئانە ڕاستییەن کە سیاسەت بە بێ بنەما گێرتەی هێز و لایەنە دیموکراتیک و ئازادیوازەکان و هەر پاسە گەڵانو هەرێمەکەی مەحاڵانە.
جە ململانێکانو ئەی سەردەمەیەنەە بە جیاۋازتەر جە جارانی کە دین و نەتەوەکان پەی ناکۆکی و پارچەکەردەی بەکار بەریێنێ، جە ئیسەنە بە جەنگی نەرم و جە ڕاو تاۋنای فەرهەنگی و کەلەپووری و زۋان و شاسنامەو گەلانی، بێ ئەخڵاق-کەردەی کۆمەڵگەی و بە تایبەت قۆت کەردەی دەسەڵاتی جە دلێ نەتەوەکانە پێ جیاوازی چینایەتی نەخشەو داگیرکاری وێشا بەرانە ڕاۋە. درۊستکەردەی داعشی پێسەو وەحشیتەرین هێز و سیستمو سەرمایەداری پەی دلێنەبەردە چێرخان و شارستانیەت و دیموکراتی و وەرهۆرزو میانی، پەی ئێمە خاستەرین ۋێنا بێ و پیڵانگێڵنای سیستمو سەرمایەداری جیهانی و دەوڵەت – نەتەوەییش جە هەرێمەکەنە ۋست ڕووە. بەرکەوتەی داعشی خاڵە لاوازەکێ ئیمەش بەرستێ ۉ، کە تاومێ بە ڕێکۋستەی و پەنەیاونای ۋەراۋەرو ئا سیستم و زهنییەتەیە مدرمێۋە . جە زهنیەت و داعشینە فرە چێۋێ کە وەڵتەرەنە خاس هەستمان پەنە نەکەردێبێنی، بەرکەوتێ. ڕووەی ڕاستینەو دەوڵەتان، ڕێکۋزیا جیهانیەکان کە بە نامێ هەرمانە پەی مافو مرۆڤ مەکەرانە، هەر پاسە پلانو سیستمە داگیرکەرەکانو جیهانی و هەرێمییش ئاشکر کەرد. ئەزموونو جەنگی چەنی داعشی بە ئاگاش ئارۋدیمێۋە کە سەرەڕاو بییەو پلان و نەخشەی تایبەتی پەی پارێزنای گەل و نیشتمانی جە ۋەراۋە بە داگیرکەرەکان و زهنیەتە تۆندرەۋەکان، مشیۆم پلان و نەخشەی تایبەتیچمان پەی پارێزنای تایبەتمەندیەکانو نەتەوەکەیمان جە ۋەراۋەرو هێزە کلاسیک و دەسەڵاتوازەکان ببۆنە تا جارێ تەر تراژدیا و کۆمکۆشتەو شەنگاڵی جە هیچ بەشێ وەڵاتەکەیمانە نەوینمێوە .
پەی یاۋای بە چوارچێۋێ تایبەت کە بتاوۆنە دڵنیاییمان بدۆە پەنە ، تاومێ ئەزموونو دۋێ بەشێ کوردستانی پانیشت و وەرنیشتی هۆرگیرمێنە. ئێمە پێسەو پلاتفۆرمو هۆرام-ی پەی ۋەرگێرتەی جە هەر ڕوویدایێ نەوازیێ جە وەرهۆرزو کوردستانی و ئێرانی گەلی کوردی هۆرامیمان بە پاو ت،انای پارێزمێنە. نموونەی ۋەرچەم دەسەڵاتو پانیشتو کوردستانیەن کە پەی دەسەلاتی زیاتەری و بە بەهانێ ئاسایشیی نەتەوەیی فرەو دەنگ و ڕەنگە جیاوازەکانو کۆمەڵگە کوردیش پەراۋێز ۋستێنێ . بە بۆنەو نەمەنەی دیموکراسی و ئازادی و هەر پاسە گرنگینەدای بە بەشێ جە زۋان و تایبەتمەندی کوردی، تەرسەو فۆتیاو زۋان و ناسنامەو گەلەکەیمان جە هەرێمە جیاوازەکانە پێسەو خەتەرێ جدی تەماشە مەکریۆنە.
باورمان ئانەن بە پێچەۋانەو سیستمو دەوڵەت- نەتەوەی کە گردو نڕخەکان ، شناسنامەکان، ڕەنگ و دەنگە جیاوازەکان پەی ئەۋەمەنەی وێش مەتاونۆۊ یا پەراوێزشان مەورۆنە، سیستمو کۆنفدرالیسمی دیموکراتیکی بە ۋەرچەم گێرتەی کۆڵەکەکێ نەتەوەی دیموکراتیکی بە خاستەرین ڕاو یاوای بە ئازادی و مافەکانو وێمان و سەرجەم بەشە جیاوازەکانو نەتەوەکەیمان مەزانمێنە. باورمان ئانەن کە پارێزناو هەر نڕخ و بەهایێ، هەم پارێزای کۆمەڵگەیەن و هەم دۆلەمەندکەردەی نەتەوەکەیمانە، بە پێچەوانەکەیچشڕاستەن.
پلاتفۆرمو هۆرام-ی پێ پارێزنای تایبەتمەندیەکان گەلو کوردی هۆرامیمان بە هۆرۋچنای فەسلسەفەو ڕابەر ئۆجەڵانی جە چوارچێۋەو سیستمو کۆنفدرالیسمی دیموکراتیکی و بە بنەما گێرتەی کۆڵەکەکانو نەتەوەی دیموکراتیکی کۆشش و خەبات مەکەرۆنە. ئی کۆنفرانسە بەشێن جە کۆشیای پلاتفۆرمو هۆرام-ی پێ ئەژناسنای تایبەتمەندیەکان هۆرامانی و هۆرامیەکان بە بەشە جیاکانو کوردستانی و هەر پاسە ڕێکۋستەو هۆرامیەکان جە هەرێمو وێشانە پێ مەرزنایەرەو ڕاوەبەری ئازاد و سەربەوێ وێشان.
هۆرامان یۆ جە هەرێمەکان کوردستانیەن کە تا ئارۆیچ پایەکێ نەتەوەی دیموکراتیک و کۆمەڵگەی ئازادیش پۆۋە دیارێنێ و پارێزنێنێش. تاریخ و ۋیەردوە هۆرامانی و هۆرامیەکان خاستەرین بەڵگەن کە چەنی ژەنی و جەوانێ هۆرامانی داکۆکی جە فەلسەفەو ژیوای ئازادی بە شکۆداری و مدرامانو ئۆجەڵانی مەکەرانە. بەشداری ژەنێ جە ژیوای ڕۋانە، پارێزناو کەلتووری، ژیوگەپارێزی، ئابووری سەربەوێ، پارێزنای زۋان و شناسنامەی، ژیوای هەرەوەزیانە نمونێنێ پەی قسەکامان و سەرەراو گردو ئانیشانچە، هۆرامان پەناگە بیەن پێ ئازادیوازانێ چوون زەردەشتی، سۆڵتان ئسحاق و پیرشالیار و سەرجەم شۆرشەکان کوردی، ئەگەر هۆرامی ئاشتیواز و گەلمیر(دیموکرات) نەبییە، هۆرامان نەبێ بە پەناگەو غەیرە هۆرامیەکان
بالگێرتەی فەلسەفە ئۆجەڵانی پسۆ فەلسەفەو ژیوای ئازاد سەرو هۆرامانیرە، سەرەراو ئانەیەکە نیشانەش مڎۆنە هۆرامیەکێ ناوچە پەرەستێ و کۆنەپەرەستێ نییەنێ، بەرۋزو ئا ڕاستییەنە کە هێشتا دلێ هۆرامیەکانە، ژیوای کۆمیناڵ و هەرەوەز، یەکسانی ژەنێ و پیای، ئابووری سەربەوێ، باوەر بە گوفتمانی، ژیوگەپارێزی و گرنگیدای بە زۋانی پێسەو شناسنامەی و بەشێ جە ژیوای مەنێننێۋە. ئی کۆڵەکێ و پایێ پەی وێشان بەشێ جیانەکریەنێ جە فەلسەفەو ئۆجەڵانی پەی یاوای بە ژیوای ئازاد و یەکسانی.
کۆنفرانس بە ئامانجوو ڕێکوستەو ژیوای ئازاد و دیموکراتیک پێ گەلەکەیمان و هەر پاسە پارێزگاری جە نرخەکان کۆمەڵگەی بە تایبەت هەرمانە پێ یەکیەتی نەتەوەیی کوردی، خەبات پێ ئەرەمەرزیارەو سیستمو کۆنفدرالیسمی دیموکراتیکی جە کوردستانەنە و وێراوەبەری ئازاد و دیموکراتیکی جە هۆرامانەنە بە ئامانج و بنەما مەگێرۆنە سەرو بنەما ئا شیکارەیە کە بشێۋازێ شۆڕشگێڵی و ئازاد کریا ئی بڕیارێ دریێ:
1-ئازادی ڕێبەر ئۆجەڵانی پێسەو ئازادی گەلو کوردی و گەلە چێردەسەکان مەۋینمێنە و کۆشیای پەی ئازادی ئۆجەڵانی کۆشیایەن پەی ئازادی وێمان و پێسەو خەباتی ناۋەندی مەگێرێش دەست. هەر پاسە جە ۋیستەمین ساڵیادو گەلەکۆمەو میاندەوڵەتی کە جە 9 ئۆکتۆبرینە دەستش پەنە کەرد نەفرەت و شەرمەزاری جە گەلەکۆمەکەران مەکەرمێنە.
2- هەرمانە مەکەرمێنە پەی ۋەڵێۋستەی خەتەو ئازادی ژەنێ سەرو بنەما ژیوای ئازاد و یەکسانی جە هۆرامانەنە.
3- پەی پارێزنای نڕخە و بەهاکانو کۆمەڵگەی، ژیوگەی، زوان و کەلتوورو کوردی - هۆرامی، خەبات و وێمان پەی ئەرەمەرزنای سیستمو کۆنفدرالیسمی دیموکراتیکی جە کوردستانەنە و هەر پاسە ڕاۋەبەری ئازاد و دیموکراتیکی مەکەرمێنە ئامانج.
4- پەی ۋەڵا کەردەی فەرهەنگ و دیموکراسی و نەمەنەی سیستمو دەسەڵاتۋازی ناوەندگەرایی جە کوردستانەنە، پەی ئەرەمەرزنای کۆنفدرالیسمی دیموکراتیکی جە وەرهۆرزو کوردستانی و بەشەکاتەریچ کارا مەکۆشمێنە.
5- پێ پارێزناو بەهاکانو گەل و نیشتمانی جە ۋەرانۋەرو هەر هەڕەشێ نیزامی، کۆمەڵایەتی، ئابووری و ڕەگەزایانە ۋەرانۋەرو هێز و باوەریە نائینسانیەکانوە پێ ڕێکۋستەی و یۆۋستەو کوردی چێرو چەترێۋەنە کۆشش مەکەرمێنە.
کۆنفرانس پەی کرداری کەردەی بڕیارەکانیش چنڎ خالڵێ پراکتیکیێ پێسەوۆ پلاننامەی پەی دلێ و بەرو وەڵاتی دیاری مەکەرۆنە . پلاتفۆرمو هۆرام-ی بڕیارەکان کۆنفرانسی پێ کۆشای و خەبات و وێش بە بنەما مەگێرۆنە . هەر پاسە ئاواتەۋازەن، ئەندامێ و لاینگەرێ پاتفۆرم-ی و هەر پاسە وەڵاتپارێزێ پەی سەرکەوتەی بڕیارەکان گرد هێز و تواناشان یۆ بۋزانە.
1- بەستەی کۆنفرانسێ و فستیڤاڵێ بە پاو توانای و هێزی جە دلێ و بەروو وەڵاتی .
2- خەبات پێ یاۋنای ئامانج و بەرنامەکانو سیستمو کۆنفدرالیسمی دیموکراتیک و وێراۋەبەری ئازاد بە جەوانان و ژەنان.
3- هەرمان کەردەی پێ دەوڵەمەندکەردەی بەشوو یاۋنانەی و ورگێرتەی هەۋاڵی جە سۆشیال میدیا ، پەڵیانەکان و هەر پاسە تەلەفزیۆنەکانە .
4- هەوڵدای پەی پەیوەندی گێرتەی چەنی ڕووناکویران، نویسەران، هۆنەرمەندان و هەر پاسە مەرزنایرەو کۆمیتەکانو پڵاتفۆرمو هۆرامی جە وەڵاتە جیاوازەکانە .
5- کارکەردەی پەی پەرەپەنەدای فەرهەنگ، هۆنەر و گۆرانیێ هۆرامیێ.
6- کۆشیای پەی ئەژناسای هۆرامانی بە بەشەکانو تەرو کوردستانی و هەر پاسە بە پێچەوانەۋە.
#06-10-2018#